सडक कामचलाउ मात्रै

साँघुरो बाटो त्यसमाथि पानी जमेको खाडलले स्वाभाविक रुपमा सवारी हाँक्न असहज भएको हो
नवीन पौडेल

नवलपुर — स्थानीय तहले कुल बजेटको ५० प्रतिशत रकम सडक र पुल निर्माणमै खर्च गरे । सडक कालोपत्रेदेखि स्तरोन्नतिमा खर्च गरे पनि जिल्लामा रहेका अधिकांश सडकको अवस्था जीर्ण छ । गर्मीमा धुलो र वर्षायाममा खाडलमा पानी जमेर हिँडडुल गर्न अप्ठ्यारो छ । 

कावासोती नगरपालिकाका प्रमुख प्रशासकीय अधिकृत रोशन ज्ञवाली र अन्य कर्मचारी मंगलबार करिब ४ बजे पूर्वपश्चिम राजमार्गको इन्द्रचोकबाट कुमारवर्ती जाने बाटोमा सरकारी प्लेटको गाडीमा हुइँकिएका थिए । तर सडक भने खाल्टाखुल्टी र पानी जमेको कारण सवारी हाँक्न असहज भयो ।

साँघुरो बाटो त्यसमाथि पानी जमेको खाडलले स्वाभाविक रूपमा सवारी हाँक्न असहज भएको हो । जसोतसो प्रशासकीय अधिकृतको सरकारी गाडी बाटो पार गरे पनि स्थानीय भने नगरपालिकाको गाडी सधैं ओहोरदोहोर गर्ने सडकको यो अवस्था हुँदा पनि मर्मत नगर्दा आफैलेदुःख पाएको भन्दै गुनासो गरे ।

यो एउटा प्रतिनिधि घटनामात्र हो । पूर्वी नवलपरासीको सदरमुकाम कावासोती नगरपालिकाको अधिकांश सडक जीर्ण छन् । डन्डाबाट गोछडा जाने करिब ८ किलोमिटर सडकको अवस्था झनै जीर्ण छ । पर्यटकीयस्थल अमलटारी जाने यस सडकले पर्यटकलाई गिज्याइरहेको छ ।

कावासोती १७ का कमलराज शर्माले जनप्रतिनिधिले आफ्नो टोल र राजनीतिक प्रभावको आधारमा सडक निर्माण गर्ने आरोप लगाए । ‘बढी प्रयोग हुने सडकमा कसैको पनि ध्यान पुगेको छैन,’ उनले भने, ‘जनप्रतिनिधिका आफ्नो टोल र सिफारिसको आधारमा मात्र सडक निर्माण भएको छ ।’ कावासोती फलफूल चोकबाट विष्णुनगर हुँदै पहाडी भेग जाने सडकको अवस्था अझै जोखिमपूर्ण छ ।

पूर्वपश्चिम राजमार्गको अवस्था पनि उस्तै छ । दिनहुँ हजारौं सवारी गुड्ने यस सडकको गैंडाकोटदेखि कावासोतीसम्मको सडकमा खाडल पर्दा साना सवारी हिँडडुल गर्न असहज भएको छ । खाडलकै कारण सवारी दुर्घटना पनि हुने गरेका छन् । कावासोती नगरपालिकाका उपप्रमुख प्रेमशंकर मर्दनियाले निर्माण क्रममा रहेका सडकमा वर्षामा हिलो हुनु स्वाभाविक भएको भन्दै केही समयमै सडक पुनर्निर्माण हुने बताए ।

‘अहिले एकै पटकमा सबै काम गर्न सम्भव भएन,’ उनले भने, ‘वर्षापछि बाँकी रहेका काम हुनेछन् ।’ जिल्लाको अन्य स्थानीय तहको अवस्था पनि उस्तै छ । पहाडी भेगका स्थानीय तहमा ठूला सवारी चल्न नसक्दा स्थानीयले सास्ती खेप्नुपरेको छ ।

प्रकाशित : श्रावण २, २०७६ ०९:५१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

अपांगमैत्री संरचना नहुँदा परिचयपत्र लिन सास्ती

बिना थापा

कास्की — पोखरा–११ फूलबारीकी ३२ वर्षीया दुर्गादेवी घिमिरे जन्मजातै अपांग हुन् । उनको न हात चल्छ, न खुट्टा । ह्विलचियरमा हिँड्ने उनी सहयोगीबिना कहीँ जान सक्दिनन् । पोखरा महानगरपालिका कार्यालयमा सोमबार अपांग परिचयपत्र लिन आएकी उनले सास्ती खेप्नुपर्‍यो ।

महानगरपालिका कार्यालयको संरचना अपांगमैत्री नहुँदा परिचयपत्र बनाउन आएका अपांगले सास्ती भोग्छन् । दुर्गादेवीका बुबा बेदराज घिमिरेले महानगर कार्यालय नै अपांगमैत्री नहुँदा दुःख पाएको बताए । ‘छोरीलाई बोक्न पनि सम्भव छैन,’ उनले भने, ‘घरबाट ट्याक्सीमा सजिलो गरी ल्यायौं तर महानगर छिरेपछि गाह्रो भयो ।’ परिचत्रपत्र बुझ्ने कोठासम्म पुग्दा कतै अग्लो र कतै होँचो ठाउँ हुँदा ह्विलचियर गुडाउन अप्ठेरो भएको उनले सुनाए ।

उनले परिचयपत्र वितरण प्रणाली समेत व्यवस्थित नभएको गुनासो गरे । ‘बूढो मान्छेले सकिनसकी ह्विलचियर भित्र लगियो, भित्र छिरेपछि पनि धेरै समय कुर्नुपर्‍यो,’ उनले भने, ‘न सिस्टम छ न कार्यालय भवन अपांगमैत्री छ, सबै भद्रगोल देखियो ।’ परिचयपत्र वितरण गर्ने कोठासम्म पुग्ने बाटो मात्रै अपांगमैत्री बनाए धेरै सहज हुने उनी बताउँछन् । भने, ‘अपांगमैत्री बाटो बनाउन नसके मूल गेट छिर्नेबित्तिकै परिचयपत्र वितरण गर्दा हुन्छ ।’

परिचयपत्र लिन महानगर पुगेका भरतविक्रम बानियाँले गेटदेखि नै ह्विलचियर छिराउन गाह्रो हुने बताए । गेटबाट प्रवेश गरेपछि ठाउँठाउँमा कर्मचारीले मोटरसाइकल पार्किङ गरेर राख्दा बाटोमा अवारोध पुगेको उनले सुनाए । ‘मोटरसाइकलवाल कता हुन्छ जानकारी हुँदैन, महानगरले कुनै चासो देखाएको छैन,’ उनले भने, ‘सुरक्षा गार्डलाई सवारीसाधन हटाउन भने पनि वास्ता गर्दैनन् ।’ परिचयपत्र बाँड्नुमात्रै ठूलो कुरा नभएकोले अपांगमैत्री संरचनामा पनि महानगरले ध्यान दिनुपर्ने उनको तर्क छ ।

परिचयपत्र वितरणलाई व्यवस्थित बनाउन अपांगको अवस्था र दर्ता संख्या हेर्नुपर्ने सुझाव उनले दिए । परिचयपत्र लिने ठाउँ खचाखच हुँदा पानीमा भिज्नुपरेको गुनासो उनले गरे ।

पोखरा–१६ अर्मलाबाट परिचयपत्र लिन महानगर कार्यालय आएका मनोज गुरुङले परिचयपत्र लिन उस्तै सास्ती खेपे । उनले परिचयपत्र लिन दिनभर कुरेर बस्नुपरेको उल्लेख गरे । ‘दृष्टिविहीन, बौद्धिक अपांग, शारीरिक अपांग गरी छुट्याएर बाँड्ने हो भने समय लाग्ने थिएन,’ उनले भने ।

महानगर उपप्रमुख मञ्जुदेवी गुरुङले ३८ वर्ष अघि बनाएको संरचना भएकोले अपांगमैत्री बनाउन सम्भव नभएको बताइन् । ‘अपांगलाई महानगर आउन कसरी सहज गर्ने भन्नेमा सचेत छौं,’ उनले भनिन्, ‘संरचना साँघुरो छ । अब नयाँ भवन नबन्दासम्म विकल्प छैन । नयाँ बन्ने भवन अपांगमैत्री बनाउँछौं ।’ परिचयपत्र लिनेको संख्या धेरै भएको दिनमा सोहीअनुसार व्यवस्थापन गर्ने उनले जनाइन् ।

महानगरले ६ महिनाअघिदेखि अपांग परिचयपत्र बाँड्न सुरु गरेको हो । हरेक महिनाको अन्तिम सोमबार महानगरभित्रका अपांगले परिचयपत्र बुझ्छन् । महानगरले हालसम्म २ सय ४८ अपांग परिचयपत्र वितरण गरिसकेको छ ।

प्रकाशित : श्रावण २, २०७६ ०९:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT