दुर्घटनामा एकको मृत्यु १२ घाइते 

नारायण शर्मा

नवलपरासी — पूर्वी नवलपरासीमा भएका दुई सवारी दुर्घटनामा १ जनाको मृत्यु भएको छ भने १२ जना घाइते भएका छन् । बिहान पौने ५ बजेतिर रजहर चोकदेखि करीब ५ सय मिटरपूर्व पूर्व-पश्चिम लोकमार्गअन्तर्गत ओएसिस चोकमा बसले पैदलयात्रीलाई ठक्कर दिँदा पैदलयात्रीको घटनास्थलमै ज्यान गएको इलाका प्रहरी कार्यालय रजहरले जनाएको छ ।

प्रहरीका अनुसार पूर्वबाट पश्चिम जाँदै गरेको लु २ ख १४९३ नम्वरको वसले देबचुली १६ रजहरकी ७५ वर्षीया वृद्धा राधिका अधिकारीलाई ठक्कर दिदाँ घटनास्थमै उनको मृत्यु भएको हो ।
त्यस्तै पूर्व-पश्चिम राजमार्गअन्तर्गत मध्यबिन्दु ८ चोरमाराको फूलबारीमा २ वटा सवारी साधन जुद्धा १२ जना घाइते भएका छन् । उनीहरुध्ये २ जना सख्त छ । चोरमारा प्रहरीका अनुसार बुधबार बिहान पश्चिमबाट पूर्वतर्फ जाँदै गरेको ना ७ ख ६३ नम्बरको ट्रक र विपरीत दिशा काठमाडौंबाट सुर्खेतका लागी छुटेको बस फूलबारीमा ठोक्किएर दुर्घटना भएको हो ।

सख्त घाइते २ जनाको पुरानो मेडिकल कलेज भरतपुरमा र अन्य घाइतेको मध्यबिन्दु सामुदायिक अस्पताल डण्डामा उपचार भइरहेको प्रहरी कार्यालय चोरमाराका प्रहरी नायव निरीक्षक भीमप्रसाद धितालले जानकारी दिए । दुबै सवारी साधनका चालक र सवारी साधन प्रहरीले नियन्त्रणमा लिएको छ ।

प्रकाशित : असार १८, २०७६ ०९:४१
प्रतिक्रिया
पठाउनुहोस्

मुख्यमन्त्री लिग आजदेखि

कान्तिपुर संवाददाता

इलाम — नयाँ खेलाडीलाई अवसर सिर्जना गर्दै क्षमतावान खेलाडी उत्पादन गर्ने उद्देश्यले आयोजित मुख्यमन्त्री लिगअन्तर्गत इलाममा बुधबारदेखि समूह ‘ग’ का खेल हुँदै छन् । सदरमुकामस्थित टुँडिखेलमा हुने प्रतियोगितामा इलामको रेडहर्स क्लव, झापाको सैनिक युथ क्लब, ताप्लेजुङको प्रगतिशील युवा क्लब र पाँचथरको सयपत्री स्पोर्टिङ क्लबले भाग लिने छन् । 

असार २१ सम्म चल्ने लिगका विजेता र उपविजेताले विराटनगरमा असार २६ देखि हुने सुपर सिक्समा स्थान बनाउने छन् । सोमवार उदयपुरबाट औपचारिक रूपमा १ नम्बर प्रदेशस्तरीय लिग सुरु भएको हो । प्रदेश १ सरकारको १ करोड र अखिल नेपाल फुटबल संघको ३३ लाख रुपैयाँको लागतमा लिग सुरु भएको हो ।

विजेताले ५ लाख उपविजेताले ३ लाख रुपैयाँ प्राप्त गर्नेछन् । प्रदेश विजेताले राष्ट्रिय र अन्तर्राष्ट्रिय लिग खेल्ने अवसर पाउने छ । सुपर सिक्समा पुगेका बाँकी टिमले ५० हजार रुपैयाँ प्राप्त गर्ने एन्फा केन्द्रीय सदस्य तथा प्रतियोगिता आयोजक कमिटीका उपाध्यक्ष निरोज खड्गीले जनाए । प्रदेश १ स्तरीय लिगमा १४ टमको सहभागिता छ ।

प्रकाशित : असार १८, २०७६ ०९:२९
पूरा पढ्नुहोस्
प्रतिक्रिया
पठाउनुहोस्