विद्यालयमा पोसाक ढाका

अंग्रेजी माध्यमबाट पढाइ हुने स्कुलमा विद्यार्थीलाई मासिक शुल्क अनिवार्य छैन । विद्यार्थीलाई आवश्यक किताब, कापी, कलम साथै पोसाकको समेत व्यवस्था विद्यालयले गरेको छ ।
आश गुरुङ

लमजुङ — छात्रा ढाकाको चोली र फ्रकमा छन् । छात्रले ढाकाकै भोटो र सुरुवाल लगाएका छन् । टाई र बेल्ट प्रयोगमा छैन । बेंसीसहर नगरपालिका ३, गाउँसहरको लमजुङ दरबार नजिकै हेभेन हिल एकेडेमीमा छात्राछात्रको स्कुल पोशाकमा नेपालीपन झल्किन्छ ।

लमजुङको बेंसीसहर ३ मा रहेको हेभेन हिल एकेडेमीमा छात्राछात्र ढाकाद्वारा निर्मित पोसाकमा । तस्बिर : आश/कान्तिपुर

बिहान साढे ९ बजेदेखि खुल्ने स्कुलमा प्रार्थनाअघि विद्यार्थीलाई नेपाली तथा अंग्रेजी र्‍याम प्रस्तुत गरी नाच्न लगाइन्छ । कमजोर विद्यार्थीका लागि ‘हर्स थेरापी’ गरिएको छ । घोडचढीले विद्यार्थीमा आत्मविश्वास बढ्ने र बढाउने विश्वास स्कुलको छ । ‘नेपालीपन झल्काउन हामीले ढाकाको लुगा प्रयोगमा ल्यायौं । विद्यार्थीमा आत्मविश्वास बढाउन हर्स थेरापी गर्दै आएका छौं’ प्रिन्सिपल शम्सेरबहादुर थापाले भने ।

एकेडेमीमा १ सय १० विद्यार्थी छन । अंग्रेजी माध्ययमबाट पढाइ हुने स्कुलमा विद्यार्थीलाई मासिक शुल्क अनिवार्य छैन । विद्यार्थीलाई आवश्यक किताव, कापी, कलम साथै पोसाकको समेत व्यवस्था विद्यालयले गरेको छ । उनका अनुसार हरेक शनिबार विद्यार्थीलाई खाना पकाउन सिकाइन्छ । यसबाट बालबालिकामा सिर्जनात्मक क्षमताको विकास हुने उनले बताए । बालबालिकाले विभिन्न परिकार खान पाउने भएकाले कुपोषणबाट बचाउन र पढाइप्रति रुची बढाउन थप मद्दत मिलेको उनले दावी गरे ।

‘विद्यार्थीलाई पूर्ण बालमैत्री वातावरणमा पढाउने गरिएको छ’ उनले भने । उनले गत डिसेम्बरमा दुबईको एक संस्थाबाट ‘टिचिङ एक्सिलेन्ट अवार्ड–२०१८’ समेत पाएका थिए । यस वर्ष बेलायती संस्था भार्की फाउन्डेशनले एक मिलियन अमेरिकी डलरको ‘ग्लोबल टिचरङ प्राइज’ को उत्कृष्ट ५० मा उनी छानिएका थिए । अन्तिममा उनी विजयी हुन सकेनन् । ‘म नेपालबाट यो पुरस्कारका लागि ५० जनामा पर्ने एक्लो शिक्षक थिएँ । पुरस्कार प्राप्त नभएपनि विश्वभरबाट ५० जनामा छानिनु नै ठूलो कुरा ठानेको छु’ उनले भने । उनका अनुसार उक्त पुरस्कारका लागि विश्वभरका ३० हजार शिक्षकले फर्म भरेका थिए ।

गाउँमा मावि कक्षा पढेपछि कक्षा ११ र १२ पढ्न शम्सेर बेंसीसहर झरे । उच्च शिक्षाका लागि काठमाडौं गए । नगरकोटमा एउटा होटलमा काम गरे । गाउँ फर्केर उनले हेभन हिल होटल खोले । उनको होटलमा विदेशी पर्यटक आउन थाले । उनीहरूको सम्पर्कबाट स्कुल पढाउन भोलेन्टियर विदेशी आउन थाले ।

उनीहरूको सहयोग साथै स्वदेशी तथा विदेशी सहयोगबाट असाहय तथा गरीब परिवारका विद्यार्थी पढाउन थालेको उनले बताए । ‘अहिले खाना, खाजा, ड्रेस, कापीकलम सवै व्यवस्था उहाँहरूले गर्नुहुन्छ’ उनले भने । ‘म ३६ वर्षको भएँ । युवाले गाउँको सेवा गर्नुपर्छ भनेर लागेको छु,’ उनले भने । उनका अनुसार ८ जना शिक्षकको तलब पनि स्वदेशी तथाविदेशी सहयोगबाटै जुट्छ ।

प्रकाशित : असार ११, २०७६ ०९:५२
प्रतिक्रिया
पठाउनुहोस्

कन्याद्वारा बाबुको काजकिरिया

प्रताप रानामगर

दमौली — सुरुमा छोरीले काजकिरिया गर्न हुँदैन भन्ने आबाज उठेको थियो । तर यो अन्धविश्वासमात्रै रहेको भन्दै आँबुखैरेनी–२ मार्कीचोकका तीन दिदीबहिनी यतिबेला बाबुको क्रियामा छन । २० वर्षीया चिज मगर र उनकी दुई बहिनी १८ वर्षकी बिनीता र १६ वर्षीया सविना मगर बाबु प्रितमको काजकिरियामा बसेका हुन । तीनैजना छोरीले बाबुको शवमा दागबत्ती पनि दिएका थिए । 

‘सामाजिक कुरीति र अन्धविश्वास अन्त्यका लागि तीन जना दिदीबहिनी बाबुको काजकिरिया गरेका हौं,’ चिजले भनिन्, ‘समाजका केही मान्छेले छोरीले काजकीरिया गर्नु हुँर्दैन भनेका थिए । हामीले त्यसलाई मान्नुपर्छ भन्ने ठानेनौं ।’ अन्तिम संस्कारका लागि बाबुलाई घाटसम्म पुर्‍याएर दागबत्ती दिएको पनि उनले बताइन् ।

बाबाले तिमीहरूनै मेरो छोरा हौ भनेको सम्झेपछि आत्मबल बढेको र अन्धविश्वासविरुद्ध लाग्न प्रेरणा मिलेको उनले बताइन । सुरुमा केहीले कुरा काटे पनि अहिले भने त्यस्तो केही नसुनिएको दिदीबैनीले बताए । काजक्रियामा खासै समस्या नभएको र आफन्त, इष्टमित्र आएर रेखदेख गरिरहेको सविनाले बताइन । छोरीसँगै आमा ४४ वर्षीया मनमाया मगर पनि किरियामा छिन् । छोरीहरूले बाबुको इच्छा अनुसारै क्रिया गरेको उनले बताइन । ‘छोरा नभए पनि के भोर छोरीले छोरा जस्तैसबै कष्ट गरेका छन छोरीले,’ उनले भनिन् ।

छोरीहरूको इच्छा अनुसार नै दाइको काजकिरियामा संलग्न गराइएको काका थमबहादुर मगरले बताए । ‘दाईको पनि इच्छा थियो । छोरीहरूको स्वास्थ्यमा ध्यान दिएका छौं । समाजका मान्छे आलोपालो गरेर रेखदेख गरेका छन,’ उनले भने । तीनै कन्या नानीले बाबुको काजकिरिया गरेर राम्रो उदाहरण दिएको स्थानीय सोलबहादुर चितौरे मगरले बताए ।

गाउँमा अहिलेसम्म छोरीले काजकिरिया गरेका थिएनन । मगर दिदीबैनीले सामाजिक विकृती हटाउन साहस गरेर सकरात्मक सन्देश दिएको उनको भनाइ थियो । घरको आर्थिक अवस्था दयनीय छ । तीनै जना नानीहरू पर्ढ्दै छन् । तीन जनाको पढाइ खर्च नै चुनौती छ । सहयोगी मनलाई पढाइ खर्चका लागि सहयोग गरिदिन उनले आग्रह गरे ।

ठूली छोरी चिज आबुखैरेनी क्याम्पसमा शिक्षा शास्त्रको स्नातक दोस्रो वर्षमा अध्ययनरत छिन् । विनिता रामशाहमा कक्षा १२ मा र कान्छीछोरी सविना एक्टिभ स्कुलबाट एसईई दिएर बसेकी छिन् । बाबुको असार १ गते निधन भएको थियो ।

प्रकाशित : असार ११, २०७६ ०९:५१
पूरा पढ्नुहोस्
प्रतिक्रिया
पठाउनुहोस्