ठडिँदै विद्यालय

हरिराम उप्रेती, प्रकाश बराल

गोरखा/बागलुङ — भूकम्पले क्षतिग्रस्तमध्ये गोरखाका २ सय ९० विद्यालयको निर्माण सकिएको छ । ५ सय १३ विद्यालय क्षतीग्रस्त बनेकोमा २ सय ११ निर्माणाधीन रहेको भूकम्प पुनर्निर्माण प्राधिकरण जिल्ला आयोजना कार्यान्वयन एकाइ (शिक्षा) का प्रमुख विष्णुप्रसाद मिश्रले बताए ।

अरु १२ विद्यालयको पनि स्रोत सुनिश्चित भएर निर्माण तयारीमा छन् । साढे २ सय आधारभूत र ४० माविको भवन निर्माण सम्पन्न भएको हो । ‘आयोजनाकै समय अझ २० महिना छ, आर्थिक वर्ष ०७७/७८ सम्ममा सबै विद्यालय पुनर्निर्माण सक्ने लक्ष्य राखेका छौँ,’ उनले भने ।

जिल्लाका केही विद्यालय सरकारी तवरबाट निर्माण भएका छन् भने केही दातृ निकाय र राष्ट्रिय तथा अन्तर्राष्ट्रिय संघसंस्थाले निर्माण गरिरहेका छन् । जाइकाले ६१, भारतीय दूतावासले १० विद्यालयको जिम्मा लिएका छन् । जाइकाले ६१ मध्ये २१ वटा निर्माण सम्पन्न भएर हस्तान्तरण भइसकेको एकाइका प्राविधिक सुरज श्रेष्ठले बताए ।

२२ विद्यालय भवन निर्माणको अन्तिम चरणमा छन् भने १८ विद्यालयको काम आधा सकिएको छ । दूतावासले जिम्मा लिएको मध्ये ३ भवनको निर्माण सुरु भएको छ । ‘अरू सर्भेको चरणमा छन्,’ उनले भने । केही विद्यालय एसियाली विकास बैंकको ऋण सहयोगमा निर्माण हुँदै छन् । केही विद्यालय निर्माणको माग भइरहेको उनले बताए । ‘अस्थायी संरचना बनेका ठाउँमा समस्या भएका गुनासा आइरहेका छन्, त्यसलाई पक्की भवनले रिप्लेस गर्न केहीको माग छ,’उनले भने ।

निर्माणाधीन र बन्न बाँकी विद्यालयका विद्यार्थी अस्थायी सिकाइ केन्द्रमा अध्ययन गर्दै आएका छन् । अस्थायी संरचनाका कारण विद्यार्थी र शिक्षकलाई समस्या परेको छ । सिरानचोकको संसारी महेन्द्र माविका प्रधानाध्यापक भोजराज कोइरालाले भौगोलिक अवस्था सुहाउँदो कक्षाकोठा निर्माण नहुँदा फाइबर तातेरै बस्न सक्ने अवस्था नरहेको बताए ।

यस्तै बागलुङमा पनि पुनर्निर्माण प्राधिकरणको जिल्ला कार्यान्वयन एकाइमार्फत ४० विद्यालय बनिरहेका छन । भवन निर्माण अन्तिम चरणमा पुगेको एकाइ प्रमुख रेणुकुमारी पाण्डेले बताइन् । बिहुँको खोलातीर प्राविले अन्तिम मूल्यांकन गरिसकेको छ । अन्यले असार मसान्तमा काम सकेर अन्तिम किस्ता भुक्तानी लैजाने पाण्डेले बताइन् । आगामी वर्षका लागि थप ३८ विद्यालय बनाउने योजना उनले सुनाइन् । भूकम्पले क्षति पुगेका १ सय १२ विद्यालयमध्ये प्राथमिकताका आधारमा भवन बनाउने काम गरिएको हो ।

बागलुङ नगरपालिका–११ को महाविद्याजन माविले ४ वर्षदेखि अस्थायी संरचनामा पढाउँदै आएकामा अबको केही समयभित्रै नयाँ भवनमा पढाउन पाउनेछ । भवन असारभित्रै सकिने प्रधानाध्यापक रामबहादुर केसीले बताए ।

एकाइमार्फत गत वर्षको ६३ लाख बजेटबाट ४ कोठे भवन र चालु वर्षको ७३ लाख बजेटबाट ४ कोठे भवन निर्माणाधीन छ । यो विद्यालयमा अझै अपुग भएपछि शिक्षा विभागको १६ लाख रुपैयाँबाट २ कोठे भवनसमेत निर्माण गरिएको छ ।

प्राधिकरणले सूचीकृत गरेको मध्ये बागलुङ कम क्षति भएको जिल्लामा छ । कम क्षति भएका जिल्लामा ढिला गरी प्रवेश गरेकाले निर्माणको काम पनि ढिलाइ भएको हो ।

प्रकाशित : असार ६, २०७६ १०:३७
प्रतिक्रिया
पठाउनुहोस्

अटेरी ग्राहकलाई कारबाही

कान्तिपुर संवाददाता

तनहुँ — समयमा विद्युत् महसुल नबुझाउने ग्राहकलाई विद्युत् प्राधिकारण तनहुँ वितरण केन्द्रले कारबाही प्रक्रिया अगाडि बढाएको छ । केन्द्रले अनधिकृत रूपमा विद्युत् उपभोग गर्ने तथा मिटर रिडिङको २ महिनासम्म पनि महसुल बुझाउन नआउनेलाई कारबाही थालेको हो ।

चालु आर्थिक वर्षको जेठ मसान्तसम्म विद्युत् महसुल बुझाउन नआउने ८५५ जना ग्राहकको लाइन काटिएको केन्द्रका प्रमुख ई. शिवनारायण गोशलीले बताए । ‘मिटर रिडिङ गरेको ६० दिन बढी पुग्दा पनि महसुल तिर्न नआउने ग्राहकको कुनै पनि बेला लाइन काट्ने अभियान चलाइएको छ,’ उनले भने ।

बिल काटेको ६ दिनभित्र महसुल बुझाएमा २ प्रतिशत छुट दिइन्छ र ८ दिनदेखि २२ औं दिनभित्र महसुल बुझाएमा बिलअनुसारको महसुल लाग्ने व्यवस्था छ । यतिसम्म सुविधा दिँदा पनि उपभोक्ताहरू समयमा विद्युत् महसुल बुझाउन नआउने ग्राहकको ६० दिन कटेपछि लाइन काट्ने गोशलीले बताए । यस्तै, मिटर रिडिङ गरेको २३ औं दिनदेखि ३० औं दिनसम्म विद्युत् महसुल बुझाएमा ५ प्रतिशत थप दस्तुर लाग्नेछ ।

विनियमावलीमा उल्लेख भएअनुसार मिटर रिडिङ गरेको ३१ औं दिनदेखि ४०औं दिनसम्म विद्युत् महसुल बुझाएमा १० प्रतिशत थप दस्तुर लाग्नेछ भने ४१औं दिनदेखि माथि थप २५ प्रतिशत दस्तुर लाग्नेछ । ६० औं दिनसम्म विद्युत् महसुल नबुझाएमा बिनासूचना जुनसुकै समयमा पनि विद्युत् लाइन काटिने व्यवस्था छ ।

केन्द्रले चालु आर्थिक वर्षको जेठ मसान्तसम्म विद्युत् महसुल नबुझाउने ग्राहकको लाइन काटी १ करोड ४१ लाख ३७ हजार ३५९ रुपैयाँ बाँकी बक्यौता असुल गरेको छ । लाइन काटिएका ८५५ मध्ये बक्यौता बुझाइसकेका ७३७ ग्राहकको लाइन पुनः जोडिएको केन्द्रले जनाएको छ ।

केन्द्रले अनधिकृत रूपमा विद्युत् प्रयोग गर्ने १२१ लाई पनि कारबाही गरी ६ लाख १ हजार ९८५ रुपैयाँ बराबरको रकम असुल गरेको छ । केन्द्रले छड्के निरीक्षणमा मिटर बाइपास गर्ने, मिटर पूरा खपत हुन नदिने, मिटरमा अन्य वस्तु प्रयोग गर्ने, मिटरको सिल तोड्ने/बिगार्नेलाई कारबाही गरेको हो ।

गोशलीका अनुसार चालु वर्षमा ३४१ बन्द/बिग्रेका मिटर फेरिएको छ भने करिब १ हजार १४९ ग्राहकहरूको मिटर रिसिलिङ तथा करिब १२ सय ग्राहकको मिटर छड्के निरीक्षण गरिएको छ । निरीक्षणले आव २०७४ श्रावण महिनासम्म भएको विद्युत् चुहावट २४.८८ प्रतिशतबाट अहिले ५.९७ प्रतिशतमा झार्न सफल भएको गोशलीले बताए ।

प्रकाशित : असार ६, २०७६ १०:३५
पूरा पढ्नुहोस्
प्रतिक्रिया
पठाउनुहोस्