काम रोके पुनर्निर्माणका प्राविधिकले

कान्तिपुर संवाददाता

गोरखा — भूकम्पपछिको पुनर्निर्माणमा खटिएका प्राविधिकहरू काम ठप्प पारेर आन्दोलनमा उत्रिएका छन् । राष्ट्रिय पुनर्निर्माण प्राधिकरणको जिल्ला आयोजना कार्यान्वयन भवन एकाइको कार्यालयमा उनीहरूले गरेको तालाबन्दी भने प्रहरीले खोलेको छ । 

गोरखाको राष्ट्रिय पुनर्निर्माण प्राधिकरण जिल्ला आयोजना कार्यान्वयन एकाइ (भवन) मा तालाबन्दी गर्न भेला भएका प्राविधिक । तस्बिर : हरिराम उप्रेती/कान्तिपुर

आन्दोलनमा हस्तक्षेप भएको भन्दै इन्जिनियरहरूले नाराबाजी गरेका छन् । निर्माणमा भूकम्प प्रतिरोधी मापदण्ड पुगे/नपगेको, पीडितलाई प्राविधिक सल्लाह र किस्ता सिफारिसलगायत काम छाडेर प्राविधिकहरू यतिबेला सदरमुकाम केन्द्रित छन् । ‘नियुक्तिमा भौगोलिक, प्रोत्साहन, यातायात, महँगी र सञ्चार भत्ता मासिक उपलब्ध गराउने भनेर लेखिएको छ,’ प्राविधिक गणेश गिरीले भने, ‘तर चालुआवको ९ महिनासम्म कुनै पनि भत्ता पाएका छैनौं ।’ ०७३/७४ मा उक्तभत्ता प्राविधिकहरूलाई उपलब्ध गराइएको थियो । आव सकिन लागेकाले भत्ता गुम्ने चिन्तामा दबाबस्वरूप आन्दोलनमा उत्रनुपरेको प्राविधिकहरूले बताएका छन् । माग सम्बोधन नभएसम्म फिल्डमा नखटिने उनीहरूको भनाइ छ ।

भूकम्पको केन्द्रविन्दु जिल्लाका ११ स्थानीय तहमा २ सय प्राविधिक पुनर्निर्माणको काममा खटिएका छन् । गाउँमा आवश्यक सुरक्षासहित काम गर्ने वातावरणको सिर्जना, दुर्घटना लगायत स्वास्थ्य बिमा लागू गर्न तथा सञ्चयकोषका लागि पहल हुनुपर्ने पनि उनीहरूको माग छ । माग पूरा नभएसम्म चरणबद्घ आन्दोलन गर्ने राष्ट्रिय पुनर्निर्माण प्राधिकरण हक–हित संरक्षण संघर्ष समिति अध्यक्ष बलराम घिमिरेले बताए । प्रत्येक स्थानीय तहमा ‘फोकल पर्सन’ तोकेर संघर्षका कार्यक्रम अघि बढाउने उनले बताए ।
तालाबन्दी संघर्षको उत्तम विकल्प नरहेको र माग सम्बोधनको प्रक्रियामा रहेकाले फिल्डमा खटिएर कामलाई निरन्तरता दिन भवनकी प्रमुख सुनीता श्रेष्ठले प्राविधिकलाई आग्रह गरिन् । केन्द्रीय आयोजना कार्यान्वयन एकाइले आइतबार प्राविधिकको माग सम्बोधनका लागि प्रस्ताव पेस भइसकेको र निर्णय प्रक्रियामा रहेको व्यहोराको पत्र पठाएको उनले जानकारी गराइन् । तर ९ महिनासम्म आलटाल हुँदै आएको भन्दै प्राविधिकहरूले भने संघर्षका कार्यक्रम जारी राख्ने अडान लिएका छन् ।

प्रकाशित : चैत्र ५, २०७५ ०९:१७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

भारतीय सडकले नेपालमा क्षति

मनोज बडू

दार्चुला — भारतले महाकाली नदी किनारमा निर्माण गरिरहेको सडकले नेपालतर्फ क्षति पुगेको छ । पैदल बाटो ठाउँठाउँमा भत्किएको छ । नदी थुनिएर ड्याम बनेको छ ।

भारतले नेपालसँग जोडिएको उत्तरपश्चिम सीमा क्षेत्र लिपुलेकसम्म जोड्ने सडकलाई उच्च प्राथमिकतामा राखेर २ वर्षदेखि निर्माण तीव्र बनाएको छ । त्यसको असर भने नेपालतर्फ परेको हो । विस्फोट गराएर सडक निर्माण गर्दा दुम्लिङदेखि महाकाली सीमा क्षेत्रमा नेपालतर्फको घोडेटो बाटो, स्थानीयको घर र घरपालुवा जनावरलाई क्षति पुगेको स्थानीयले बताए । उक्त क्षेत्रमा नदी थुनिएर ३ वटा ठूला ड्याम बनेका छन् ।

व्यास गाउँपालिका २ अन्तर्गतका विभिन्न ३ ठाउँमा नदी थुनिएर ड्याम बनेपछि नेपालतर्फको घोडेटो बाटोमा क्षति पुगेको स्थानीयले बताए । व्यास गाउँपालिका २ को घाँटीबगड, बयालीधार र नज्याङमा नदी थुनिएर ठूलो ड्याम बनेको व्यास गाउँपालिका १ का वडाध्यक्ष अशोक बोहराले बताए । ‘ठूलो मात्रामा विस्फोटक पदार्थ पड्काएर सीमा नदी वारि नेपालतर्फ धेरै क्षति पुगेको छ,’ उनले भने, ‘व्यास क्षेत्रमा जाने बाटो भत्किएको छ । नदी वारिपट्टि धेरै रुखहरू भाँचिएका छन् ।’ ३ ठाउँमा बनेका ठूला ड्याम एकै पटक खुले तल्लो क्षेत्रमा ठूलो क्षति हुनसक्ने उनको भनाइ छ ।

दुई देशको सीमा क्षेत्र पर्ने उत्तर पश्चिमी नाका व्यास गाउँपालिका २ घाँटीबगड, बयानीधार क्षेत्रमा भारतले सडक निर्माण गरिरहेको छ । बीचमा महाकाली नदीले दुवै देशको सीमा छुट्याएको छ । दुवै देशबाट उत्तरतिर जाँदा महाकाली नदी किनार भएर बाटो छ । भारततर्फ अहिले उक्त क्षेत्रमा सडक निर्माण भइरहेको छ ।

नेपालतर्फ घोडेटो बाटो छ । व्यास गाउँपालिका २ दुम्लिङदेखि घाँटीबगडको माथिल्लो भेगसम्मको पूरै बाटो भत्किएर अवरुद्ध भएको छ । गत आर्थिक वर्षमा गाउँपालिकाले व्यास जोड्न निर्माण गरेको बाटोसमेत भत्किएको उनले जानकारी दिए ।

प्रकाशित : चैत्र ५, २०७५ ०९:१४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT