अधिकांश योजना सडकका

जिल्ला समन्वय समिति, प्रदेश सांसद र स्थानीय तहका प्रमुख तथा प्रतिनिधिको परामर्शका आधारमा योजना छनोटको प्राथमिकतामा सडक 
कान्तिपुर संवाददाता

गोरखा — गोरखा क्षेत्र १ का प्रतिनिधिसभा सदस्य हरिराज अधिकारीले स्थानीय पूर्वाधार विकास साझेदारी कार्यक्रमअन्तर्गत छनोट गरेका २० मध्ये ९ वटा योजना सडकका छन् ।

ZenTravel

जिल्ला समन्वय समिति, प्रदेश सांसद र स्थानीय तहका प्रमुख तथा प्रतिनिधिको परामर्शका आधारमा योजना छनोट गरिएको उनले बताएका छन् ।

सडकका योजनालाई प्राथमिकतामा राखेर खानेपानी, सामुदायिक भवन, खेलमैदान र विद्यालयका योजनामा पनि बजेट विनियोजन गरिएको छ । भीमसेन गाउँपालिका ३ काशिखोला–चौतारा हँुदै धावा र गण्डकी गाउँपालिका, फुजेल, आमडाँडा, पौवा, कौदी र रानीस्वाँरा सडक स्तरोन्नतिका लागि ५०/५० लाख रुपैयाँ छुट्याइएको छ ।

आरूघाट गाउँपालिका ४ थुमी–जामुने–बाँसपुर सडक स्तरोन्नति तथा विस्तार, घ्यापिन्थोक, साततले भीर, पीपलडाँडा र सहिद लखन गाउँपालिका ४ ताक्लुङ राइनास–जुम्लीचौतारासडक स्तरोन्नतिका लागि २०/२० लाख रुपैयाँ विनियोजन गरिएको छ ।

भीमसेन गाउँपालिका ७ बोर्लाङ–नारायणपुर–झप्री–बिर्दी–रूखाथुम सडक स्तरोन्नतिका लागि २५ लाख, गोरखा नगरपालिका ४ फिनाम सरस्वती मावि मधुघाट–जामुने सडकका लागि १० लाख छुट्याइएको छलफलमा सहभागी जिल्ला समन्वय समितिका कर्मचारी गोपी कोइरालाले बताए ।

गोरखा नगरपालिका ६ छहरे चण्डेनी पोखराथोक काप्राबोट हुँदै गोरखकाली मन्दिर सडक तथा गण्डकी गाउँपालिका ७ र ८ वडा कार्यालय जोड्ने सडक स्तरोन्नतिका लागि१५/१५ लाख रुपैयाँ छुट्याइएको छ ।

चुमनुव्री गाउँपालिका ३ सिर्दिवास फिलिम सामुदायिक भवन निर्माण र धार्चे गाउँपालिका ३ उहिया माथिल्लो गाउँ सामुदायिक भवन निर्माणका लागि २०/२० लाख रुपैयाँ विनियोजन गरिएको छ । चुमनुव्री गाउँपालिका ६ छेकम्पारमा खानेपानी मर्मत तथा विस्तार र धार्चे गाउँपालिका ६ काशिगाउँ खेलमैदान पूर्वाधार निर्माणका लागि १०/१० लाख रुपैयाँ छुट्याइएको छ ।

धार्चे गाउँपालिका ५ माछाखोला सामुदायिक भवन निर्माणमा २५ लाख, भीमसेन गाउँपालिका १ गैराथोक बरामगाउँ–मसेल–धारापानी चापाखोला खानेपानी मर्मत तथा सडकको ट्रयाक निर्माणका लागि १५ लाख छुट्याइएको छ ।

सहिद लखन गाउँपालिका १ इनारचौर बक्राङ खहरे बहुद्देश्यीय सामुदायिक भवन सम्पन्न गर्न १० लाख, गण्डकी गाउँपालिका ५ भगवती दर्बुङ सामुदायिक भवन निर्माणका लागि २० लाख र भुम्लीचोक आइडाँडा आधारभूत विद्यालय चेपाङ छात्रावास भवन सम्पन्न गर्न १५ लाख छुट्याइएको छ । गोरखा नगरपालिका १ ताप्ले बाह्रबिसे लिफ्टिङ खानेपानी चालु आयोजना निर्माण गर्न २० लाख र नवज्योति मावि डण्डीडाँडा कम्पाउन्ड निर्माणका लागि १० लाख रुपैयाँ विनियोजन गरिएको छ ।

बजेट जति सडकमा
बागलुङ (कास)– स्थानीय पूर्वधार विकास साझेदारी कार्यक्रमअन्तर्गत बागलुङका दुई निर्वाचन क्षेत्रको ८ करोड रुपैयाँ बजेटमा सडक निर्माणका योजनालाई मात्रै प्राथमिकता दिइएको छ ।

नगरपालिका र गाउँपालिकाले बनाएका योजनामध्ये दुई वा दुईभन्दा बढी तहको साझा कार्यक्रमलाई प्राथमिकता दिएर बजेट विनियोजन भएको जिल्ला समन्वय अधिकारी नारायण सापकोटाले बताए । स्थानीय तहले परिषद्मार्फत अधिकांश बजेट सडकमै खर्चेका थिए । साझेदारी कार्यक्रमको बजेटलाई पनि सडक पूर्वाधारमै लगाइएको हो ।

क्षेत्र १ को ४ करोड रुपैयाँबाट बागलुङ नगरपालिका, जैमिनी नगरपालिका, काठेखोला गाउँपालिका र बरेङ गाउँपालिकालाई ९ लाख ९५ हजार रुपैयाँको दरले विनियोजन भएको हो । २० हजार प्रशासनिक खर्च राखिएको छ ।

क्षेत्र नम्बर २ तर्फको बजेटमा भने गलकोट नगरपालिकालाई ७० लाख, ढोरपाटन नगरपालिकालाई ५९ लाख, बडिगाड गाउँपालिकालाई ७९ लाख, निसीखोलालाई ५० लाख, तमानखोलालाई ६० लाख र ताराखोलालाई ८० लाख विनियोजन गरिएको छ ।

क्षेत्र १ ले बनाएको तित्याङदेखि बुकेनी भकुन्डे सडकलाई ७१ लाख, भकुन्डेदेखि रायडाँडा सडकलाई ७१ लाख, गुल्मी सिमाना घट्टेखोला हुग्दीशिर हुँदै सिरानीखोल्सो मोटरबाटोका लागि ४२ लाख ६५ हजार, बरेङ नाम्दुक मोटरबाटो स्तरोन्नतिका लागि ९९ लाख ५० हजार, रेश–कादेश–लेखानी बिहुँ हुँदै तंग्राम सडकलाई ७१ लाख र भीमपोखरा–चिप्लेभीर–धम्जा जोड्ने सडकलाई पनि ७१ लाख विनियोजन गरिएको छ । स्थानीय तहले ती योजनालाई प्राथमिकतामा राखेपछि सांसादको बजेट त्यसैमा पारिएको हो ।

क्षेत्र २ तर्फ भने २१ वटा टुक्रे योजनामा बजेट राखिएको छ । सबैभन्दा ठूलो रकम खुंखानी–नर्जा सडक ट्रयाक खोल्नका लागि ५० लाख र ताराखोला विद्युतीकरणका लागि ५० लाख रुपैयाँ छुट्याएको छ । अन्य सबै योजना १० लाखदेखि ३० लाख रुपैयाँसम्मका छन् ।

ती सबै योजनामध्ये केही खेलमैदान निर्माणको भए पनि अधिकांश सडक मर्मतकै लागि लगाइएको हो । ‘गाउँपालिका र नगरपालिकाले पनि सडककै लागि खर्चेका छन् । सांसदले पनि सडकमै बजेट राख्दा सामाजिक र युवाहरूको व्यक्तित्व विकासको क्षेत्र ओझेलमा परेको छ,’ जिल्ला खेलकुद विकास समितिका अध्यक्ष धनबहादुर परियारले भने, ‘शैक्षिक, खेलकुद र स्वास्थ्य क्षेत्रको प्रवद्र्धनमा बजेट दिने कोही देखिएनन् ।’ पूर्वाधारको नाउँमा धेरै रकम पानीमा बगेको उनले टिप्पणी गरे ।

कतिपय बजेट अघिल्लो वर्ष पनि परेर काम भएका योजनामा छन् । गत वर्ष ट्रयाक खोलेर मर्मतसमेत गरिएको डाँडाखेत सुखौरा, बाँयखोला निसीतर्फको सडक, तित्याङ–भकुन्डे सडकलगायतमा निरन्तर बजेट पारिएको हो ।

‘बजेट सदुपयोग गर्न सकेमा धेरै काम हुन्छ तर हरेक वर्ष खर्च गरे पनि सडक बगेरै जाने गरेको छ,’ बागलुङ नगरपालिका ११ का वडाध्यक्ष ज्ञानेन्द्र गौतमले भने, ‘वास्तविक आवश्यकतामा खर्च बढाउनुपर्ने देखिन्छ ।’ सडकको खण्ड नतोक्दा हरेक वर्ष सदरमुकाम छेउमै बढी खर्च भएर गन्तव्यमा नपुग्ने गरेको उनले बताए ।

प्रकाशित : मंसिर १, २०७५ ११:१२
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

विद्यालय छाडेर शिक्षक धर्नामा

नेपाल शिक्षक महासंघको अगुवाइमा १६ वटा पेसागत संगठनका शिक्षकद्वारा शुक्रबार शिक्षा विकास तथा समन्वय इकाइ ठप्प 
कान्तिपुर संवाददाता

बागलुङ — शिक्षा क्षेत्रमा २० प्रतिशत बजेटको मागसहित २६ सूत्रीय माग राखेर शिक्षकले थालेको आन्दोलन चर्केको छ । नेपाल शिक्षक महासंघको अगुवाइमा १६ वटा पेसागत संगठनका शिक्षकले शुक्रबार शिक्षा विकास तथा समन्वय इकाइ ठप्प पारे ।

बिहान १० बजे पुगेका शिक्षकले धर्ना दिँदा कार्यालयको काम पूरै ठप्प भएको समन्वय अधिकारी कुश्मराज उपाध्यायले बताए ।

शिक्षा ऐन अद्यावधिक हुँदाहुँदै स्थानीय तहले ऐन, निर्देशिका र कार्यविधि बनाएर द्वन्द्व सिर्जना गरिएको शिक्षकले आरोप लगाएका छन् । ‘हामीले शिक्षक काउन्सिल गठनदेखि तहगत शिक्षा ऐनलाई एकरूपता बनाउन माग गरेका थियौं,’ महासंघका अध्यक्ष कृष्णप्रसाद आचार्यले भने, ‘नमूना विद्यालय घोषणा पनि सरकारले हचुवाको भरमा गरेको छ । त्यस्तो प्रवृत्ति अन्त्यको माग गरेका छौं ।’

कार्यविधि रसूचकका आधारमा शिक्षक, विद्यालय र समग्र शिक्षा क्षेत्रको अनुगमन र मूल्यांकन गर्ने प्रावधान राख्नुपर्ने उनले बताए ।

शिक्षकहरू धर्नामा गएकाले यहाँका सबै सामुदायिक विद्यालयको पढाइ प्रभावित भएको थियो । झोला बोकेर विद्यालय हिँडेका विद्यार्थीहरू घर फर्केका थिए । शिक्षकले नेपाल शिक्षक महासंघलाई आधिकारिक शिक्षक ट्रेड युनियनको मान्यता दिन पनि माग गरेका छन् ।

गत जेठदेखि आन्दोलनमा उत्रेका शिक्षकको माग पूरा नभएकाले विद्यालय नै ठप्प पार्नेसमेतका कार्यक्रम ल्याउन लागेको चेतावनी पनि दिएका छन् । स्थानीय तहले आफूखुसी नियम बनाएर ऐनको अधिकार कुल्चेको उनीहरूको आरोप छ । ‘ऐनले दिएको अधिकार प्रयोग नगरी शिक्षक नियुक्ति र सरुवा आफूखुसी गर्दा विद्यालयको पढाइ प्रभावित भएको छ,’ नेपाल शिक्षक युनियनका पूर्वअध्यक्ष जगन्नाथ आचार्यले भने, ‘हामीले वर्षौंसम्म चाहिएको शिक्षक पाउन सकेका छैनौं ।’ आवश्यक नपर्ने शिक्षक भर्ना गर्ने चलखेल पनि भएको छ ।

शिक्षक संघ–संगठनसँग सरकारले गरेका सम्झौता पालना नभएकोमा पनि उनीहरूले आक्रोश पोखेका छन् । स्थायी, अस्थायी, राहत, बालविकासलगायतका धेरै प्रकारका शिक्षक राखेर विभेदीकरण गरिएको पनि उनीहरूको आरोप छ । उनीहरूले राष्ट्रिय मर्यादाक्रमको सूचीमा समेत शिक्षक नराखेको आरोप लगाए ।

उनीहरूले महिला शिक्षकको प्रसूति बिदा ६ महिना कायम गर्नुपर्ने र सो अवधिका लागि सट्टा शिक्षक राख्न पाउनुपर्नेसमेत माग गरेका छन् । ‘सट्टा शिक्षक राख्न नपाउने, सुत्केरीले पनि बिदा नपाउने हुँदा पढाइ प्रभावित भएको छ,’ धौलागिरि वीरेन्द्र माविकी प्रधानाध्यापक विमला गुरुङले भनिन्, ‘बिरामी शिक्षकले पढाउन नसक्ने, अर्को नियुक्ति गर्न नपाउने बाध्यता हटाइनुपर्छ ।’

शिक्षकले निजामती सेवा सरहको सुविधा पाउनुपर्ने मागसमेत गरेका छन् । शिक्षकका माग पूरा गर्दा राज्यलाई समेत फाइदा पुग्ने उपाध्यायले बताए । पटक–पटक शिक्षामा पुगेको अवरोध हट्ने र गुणस्तरीय शिक्षाको विकासमा योगदान पुग्ने भएकाले शिक्षकका माग पूरा गर्नैपर्ने देखिएको उनले बताए ।
दिनभर धर्नामा

स्याङ्जा (कास)– आन्दोलित शिक्षक स्याङ्जाको जिल्ला शिक्षा समन्वय इकाइको कार्यालयको प्रांगणमा शुक्रबार दिनभर धर्नामा बसेका छन् ।

महासंघ जिल्ला अध्यक्ष पशुपति पाण्डेको नेतृत्वमा करिब सयजना शिक्षक धर्ना बसेका थिए । स्थानीय तहमा शिक्षा अधिकार २३ वटा मात्र रहेकोमा सबै अधिकार स्थानीय तहले नै खिचेको बताउँदै उनीहरूले बाँकी अधिकार केन्द्रमा नै कायम हुनुपर्ने माग राखेका छन् ।

सुत्केरी बिदा ६ महिनाको माग गर्दै धर्ना बसेको उक्त टोलीले शिक्षक सेवा आयोगलाई संवैधानिक बनाउने, संवैधानिक राष्ट्रिय शिक्षा आयोग गठन गर्ने, विद्यालय तहको शिक्षालाई संघ, प्रदेश र स्थानीय तहको साझा अधिकारको सूचीमा राख्ने र सबै प्रदेश र स्थानीय तहले बनाउने तहगत शिक्षा ऐनमा एकरूपता हुनुपर्ने माग राखेका छन् ।

प्रकाशित : मंसिर १, २०७५ ११:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×