होटलमा लगानी थपिँदै

प्रकाश बराल

बागलुङ — आन्तरिक पर्यटकको आगमन बढेसँगै यहाँका व्यवसायीहरूले होटलमा लगानी थपिरहेका छन् । आधुनिक शैलीका रेस्टुरेन्ट र सुविधासम्पन्न कोठा थपेर उनीहरूले लगानी बढाएका हुन् ।

बागलुङमा पर्यटक आउने क्रम बढेको छ । पर्यटक बढेपछि होटलमा लगानी थप्ने क्रम पनि बढेको छ । करोडौं लगानीले बनेको एक होटल । तस्बिर : प्रकाश
ZenTravel

पाहुना रिझाउन आफ्नै सवारीसाधनको सुविधा पनि दिन थालेका छन् । ‘सय जनासम्म मैले राख्न सक्छु । धेरै पाहुना आए भने अरू होटलमा पनि कुरा गरी बासको व्यवस्था मिलाउँछौं,’ होटल संघका अध्यक्ष निलेश राजभण्डारीले भने, ‘आएका पाहुनालाई दोहोर्‍याएर फर्कने अवसर सिर्जना गर्न खोज्दैछौं ।’

लगानीसँगै पाहुना स्वागतको संस्कारलाई होटलहरूले ध्यान दिइरहेको उनको भनाइ छ । राजभण्डारीले सञ्चालन गरेको होटल पिस प्यालेसमा अहिलेसम्म ५ करोड लगानी भइसकेको छ ।

Meroghar

सदरमुकाममा उनको जस्तै रेड एप्पल, दी राजन, समिट, शीतल र हिल भ्यूजस्ता ठूला लगानीका होटलहरू थपिएका छन् । होटल थपिएसँगै पाहुनाको आगमन पनि बढेका छन् । सहकारी, विद्यालय, क्याम्पस, आमा समूह र अन्य विभिन्न क्षेत्रका मानिसले बागलुङलाई घुमघामको गन्तव्य बनाउन थालेपछि परम्परागत तरिकाभन्दा लगानी थपेर व्यवसाय सञ्चालनका लागि व्यवसायीको चासो बढेको हो ।

‘साना–ठूला गरी करिब सयत होटल सदरमुकाममै चलिरहेका छन्,’ राजभण्डारीले भने, ‘परम्परागत तरिकाबाट चलेका केही होटलबाहेक पर्यटक भित्र्याउन सुविधा थप्दै लगेका होटलले झन्डै ३० करोड लगानी गरिसकेका छन् ।’ ४ वर्षअघि एकैपटक ५ करोड लगानीमा रेडएप्पल सञ्चालनमा आएको थियो । ५० जनालाई एट्याच बाथरुमको सुविधासहितका कोठा दिनेगरी होटल सञ्चालनमा ल्याइएको प्रबन्ध निर्देशक वसन्तकुमार श्रेष्ठले बताए । होटल म्यानेजमेन्ट अध्ययन गरेका युवा यो व्यवसायतर्फ आकर्षित छन् ।

दशकअघि करोड लगानी भएको होटल समिटले आधा करोड लगानी थपेर बागलुङकालिका मन्दिर नजिकै रेस्टुरेन्टसमेत खोलेको छ । धार्मिक पाहुनालाई खाने, बस्ने व्यवस्थापन गर्न खुलेको यो होटलले पाहुनालाई बजारमा भित्र्याउन सहयोग गरेको छ । होटलले पर्यटक तान्न कार्यक्रम हल पनि बनाउन थालेका छन् । ‘ठूलो समूहमा आएका पाहुनाले खाने, बस्नेसँगै छलफल र बैठक हल सोध्छन्,’ होटल संघका पूर्वअध्यक्ष अर्जुन चोखालले भने, ‘अब बाससँगै पाहुनाको चाहना बुझ्नुपर्ने भयो ।’ संसारकै अग्लो कलश निर्माणस्थल पञ्चकोट भ्रमण, शालिग्राम संग्रहालय, बागलुङकालिका र स्थानीय होमस्टे गाउँ बन्न थालेपछि पर्यटक बढेका हुन् ।

अधिकांश होटलमा आकर्षक सज्जासहितका रेस्टुरेन्ट, वाइफाइ, इन्टरनेट र सवारीको पार्किङ सेवा विस्तार गरिएका छन् । ‘राष्ट्रिय गौरवका २ राजमार्गले जोड्ने भएकाले पर्यटक भित्र्याउन धेरैले लगानी थपेका छौं,’ चोखालले भने, ‘गुणस्तर र प्याकेजका कार्यक्रम दिन सकियो भने होटल व्यवसायको भविष्य राम्रो हुन्छ ।’ कालिका मन्दिरमा भारतीय धार्मिक पर्यटक बढेको उनले बताए ।

व्यवसायीले ढोरपाटन र मुक्तिनाथ जाने प्रस्थानविन्दु बनाउने पहल पनि थालेका छन् । ‘गेट वे अफ मुक्तिनाथ’ नाम दिएर व्यवसायीले बागलुङबाटै मुक्तिनाथका लागि नियमित जिप र बस छुट्ने व्यवस्था गरेका थिए । वर्षाका कारण त्यो सेवा यतिबेला नियमित हुन सकेको छैन ।

ढोरपाटन र मुक्तिनाथतर्फका सडक कालोपत्रे बनाउन उनीहरूले सांसदहरूको ध्यानाकर्षण पनि गराएका छन् । संघका अनुसार दैनिक १० हजार पर्यटकलाई सदरमुकाममा खान, बस्न स्तरीय सेवा दिन सकिन्छ । बुर्तिबाङ र गलकोटतर्फका होटल जोडदा यो संख्या बढ्ने राजभण्डारीले बताए ।

प्रकाशित : भाद्र ५, २०७५ ०९:०९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पस्लाङमा होमस्टे सुरु

भूकम्पले घरहरूमा क्षति पुर्‍याएपछि बन्द होमस्टे गत वैशाखबाट सञ्चालन
मगर समुदायको बाहुल्य पस्लाङ गाउँमा स्थानीयको रहनसहन बुझ्न पर्यटक आवागमन बढ्यो
कान्तिपुर संवाददाता

गोरखा — भूकम्पको ३ वर्षपछि गोरखा नगरपालिका ५ पस्लाङमा होमस्टे सेवा पुन: सुरु भएको छ । गोरखा बजार नजिकै ‘लुकेको गाउँ’ का रूपमा परिचित पस्लाङका १२ घरमा होमस्टे सुरु गरिएका हुन् ।

०७० असारबाट १५ घरले यहाँ होमस्टे चलाएका थिए । भूकम्पले घरहरू क्षति पुर्‍याएपछि सेवा बन्द भएको थियो । ‘भूकम्पले भत्काएका केही घर बने, ती घरमा गएको वैशाखबाट मान्छे राख्न थालेका छौं,’ होम सञ्चालक समितिका अध्यक्ष मानबहादुर रानाले भने, ‘घरहरू बन्दै जाँदा अब पहिलेको भन्दा धेरैमा होमस्टे हुनेछन् ।’

मगर समुदायको बाहुल्यता रहेको उक्त गाउँमा स्थानीयको रहनसहन बुझ्न पर्यटक आउने गरेका छन् । सदरमुकामबाट पैदल ३० मिनेटमा पुगिने पस्लाङमा होटलहरूमा बस्न नरुचाउनेहरू बास बस्न पुग्छन् । ‘गाउँले परिवेश बुझ्न र आर्गानिक खानेकुरा खान पाहुनाहरू यहाँ आउँछन्,’ रानाले भने । हाल १२ घरबाट सेवा सुरु गरिएको र चालु वर्षभित्रै २८ घरबाट सेवा प्रदान गर्ने स्थानीयले योजना बनाएका छन् ।

भूकम्पअघि ७० पाहुना राख्न सक्ने क्षमताको उक्त गाउँको होमस्टेमा हाल ३५ जनासम्म बास बस्न सक्ने रानाले बताए । ‘भूकम्पको घर बनाउँदा पाहुना कोठा भनेर छुट्याएको छ । हामी गाउँका सबै घरलाई होमस्टे बनाउने तयारीमा छौं,’ उनले भने, ‘हाल सेवा सुरु भयो भनेर प्रचारका लागि केही घरबाट थालिएको हो ।’ होमस्टेमा आउने पाहुनाका लागि प्रतिव्यक्ति ६ सय रुपैयाँ लिने गरिएको उनले जनाए ।

६० भन्दा बढी घरधुरी मगर समुदाय रहेको पस्लाङमा पाहुनालाई स्वागतका लागि मारुनी नाच पनि देखाउने गरिन्छ । ‘पाहुनाको इच्छाअनुसारका खानेकुराको व्यवस्था छ,’ स्थानीय विमला रानाले भनिन्, ‘कोदोको ढिँडो र रोटी, गुन्द्रुकको अचार, भटमास, घैया धानको भात, तरकारीहरू सबै आर्गानिक कुरा खुवाउँछौं ।’ करेसाबारीमा लगाएको तरकारीमा विषादीको प्रयोग नगर्ने निर्णय गाउँस्तरमै भएको छ ।

सबैजसो घरले पाहुनालाई खुवाउनका लागि भन्दै लोकल कुखुरा पालेका छन् । सदरमुकाम नजिकैको ठाउँ भए पनि यहाँ पुगेपछि गाउँले जीवन र रहनसहन बुझ्न सकिने स्थानीयको दाबी छ । भूकम्पले भत्काएका अन्य घर निर्माणलाई पनि तीव्रता दिइएको छ । ‘चारजना मान्छे एक दिन राख्न पाए २४ सय कमाइ हुन्छ,’ स्थानीय मानबहादुर रानाले भने, ‘यहाँ मान्छे नआउने पनि होइनन्, गएको जेठ–असारमा मात्र ६०/७० विदेशी पर्यटक आएर बसे ।’

भूकम्प जाँदा ढुंगा–माटाले बनेका परम्परागत घरहरू भत्किएपछि यहाँ हाल पक्की घरहरू बनाइएका छन् । ‘पहिले बार्दली भएको, रातो माटोले लिपेर कमेरो लगाएका घरहरू थिए,’ उनले भने, ‘पुरानो मोडेलका घरमा पर्यटक रमाउँथे । त्यस्ता घर भूकम्पले बढी नै भत्काएपछि हाल पक्की घरमै सबैको ध्यान छ ।’

गोरखाको ऐतिहासिक स्थल गोरखा दरबार र संग्रहालय घुम्न आएका आन्तरिक तथा बाह् पर्यटकलाई ध्यानमा राखेर उक्त ठाउँमा होमस्टे पुन: सञ्चालनमा ल्याइएको हो । सदरमुकामका अन्य भागको तुलनामा पस्लाङ गाउँका घरमा भूकम्पले बढी क्षति पुर्‍याएको थियो ।

प्रकाशित : भाद्र ५, २०७५ ०९:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×