वाग्मतीमा लम्पी स्किनविरुद्ध खोप अभियान सुरु

शुक्रबार एक समारोहका बीच मकवानपुरको मकवानपुरगढी गाउँपालिकास्थित एक गाई फार्ममा प्रदेशका कृषि तथा पशुपन्छी विकासमन्त्री प्रकाश श्रेष्ठले पशु स्वास्थ्यकर्मीलाई भ्याक्सिन हस्तान्तरण गर्दै अभियानको शुभारम्भ गरेका हुन् । अभियानअन्तर्गत प्रदेशका १३ जिल्लाका ७६ हजार २ सय ७५ गाई–भैंसीमा लम्पी स्किनविरुद्धको खोप लगाउने लक्ष्य मन्त्रालयको रहेको छ ।

गाईभैंसीमा लम्पी स्किन लाग्न नदिन पूर्वतयारीस्वरूप प्रदेशका सबै स्थानीय तहमा प्रभावकारी रूपमा खोप अभियान सञ्चालन गर्न लागेको मन्त्री श्रेष्ठले बताए । नागरिकलाई सरकारको अनुभूति दिलाउने र आर्थिक रूपले सक्षम बनाउने पहलस्वरूप प्रदेश सरकारले अभियान अघि बढाएको उनको भनाइ थियो ।

मन्त्रालयका सचिव विनोदकुमार भट्टराईले स्थानीय तहको समन्वयमा पशु सेवा कार्यालयमार्फत खोप अभियान सञ्चालन गरिएको जानकारी दिए ।

लम्पी स्किन नियन्त्रणका लागि प्रदेश सरकारले यस आर्थिक वर्षमा ७३ लाख रुपैयाँ बजेट विनियोजन गरेको छ । लम्पी स्किन रोगबाट गाई–भैंसीको मृत्युदर ३ दशमलव १ प्रतिशत रहे पनि दुध उत्पादनमा ८० प्रतिशतसम्म घट्ने भएकाले यो अभियान संचालन गरिएको सचिव भट्टराईले बताए । ‘लम्पी स्किनविरुद्ध ६२ हजार ९ सय ७५ डोज खोप लगाउने तयारी छ,’ उनले भने, ‘उक्त खोप लगाउन प्रदेशका १३ जिल्लामा ३ सय ७६ जना भ्याक्सिनेटर खटाइएको छ ।’

मन्त्रालयका अनुसार गत आवमा यस रोगबाट प्रदेशमा ११ हजार २ सय १८ गाई–भैंसी मरेका थिए । ३७ हजार ८९ गाई–भैंसी संक्रमित भएका थिए भने २ लाख ५६ हजार ७ सय ५९ पशु प्रभावित बने । गत आवमा २ लाख ४५ हजार २ सय २२ गाई–भैंसीलाई लम्पी स्किनविरुद्धको खोप लगाइएको थियो ।