डाक्टर कुट्नेलाई कारबाही माग गर्दै प्रदर्शन
मकवानपुर — हेटौंडामा डाक्टर कुटपिट घटनामा संलग्नलाई कारबाहीको माग गर्दै युवाहरुले यहाँ शान्तिपूर्ण प्रदर्शन गरेका छन् । उनीहरूले हेटौंडाको बुद्धचोकमा उभिएर प्लेकार्डसहित प्रदर्शन गरेका हुन् ।
गत साउन २५ मा डेंगीबाट चितवनमा मृत्यु भएका हेटौंडा–१२ का राजेश प्रधानका आफन्तले अस्पतालभित्रै प्रवेश गरेर डाक्टरको लापर्बाहीका कारण बिरामीको मृत्यु भएको भन्दै डा. प्रशान्त बिडारी र डा. विकास थापालाई कुटपिट गरेका थिए । घटनामा संलग्नलाई कारबाही गर्नबाट स्थानीय प्रशासन र प्रहरीले ढिलाई गरेको भन्दै युवाहरू सडकमा उत्रिएका हुन् ।
प्रदर्शनमा सहभागी युवा विकेशलाल श्रेष्ठले अस्पतालजस्तो संवेदनशील र आकस्मिक सेवा प्रदान गर्ने स्थानमा डाक्टरमाथि कुटपिट हुनु असाध्यै दुःखद् भएका कारण मौन रूपमा प्रदर्शन गरिएको बताए ।
