सडक डिभिजनका चालकको मृत्युपछि प्रदर्शन

पीडितलाई क्षतिपूर्ति र अनुसन्धानको माग गर्दै मृतकका आफन्तले जिल्ला प्रहरी कार्यालय घेराउ गर्नुका साथै दोलखा सिंगटी सडक अवरुद्ध पारेका छन् । उनीहरूले जिल्ला प्रहरी कार्यालय अगाडि टायर बालेर प्रदर्शन गर्नुका साथै सडक अवरुद्ध पारेका हुन् ।

जेठ ८ गते माता मनकामना कन्ट्रक्सन निर्माण कम्पनीले निर्माण गरिरहेको सडक निर्माणको काममा डिभिजन सडक कार्यालय चरिकोटबाट गएका भीमेश्वर नरगपालिका- १ का ३४ वर्षीय नारायण थामी तामाकोशी नदीमा मृत फेला परेका थिए ।

उनीहरूले प्रहरीविरूद्व नाराबाजी गर्नुका साथै ठेकेदारलाई कारबाही र उचित क्षतिपूर्ति दिनुपर्ने माग राखेका छन् । पीडितले सडक अवरुद्ध पारेपछि दोलखा, सिंगटी चरिकोटको यातायात प्रभावित बनेको छ । डिभिजन सडकमा कार्यालय टिपर चालक रहेका थामीलाई सडक कार्यालयबाट निर्माण कम्पनीले कामका लागि निर्माण गरिरहेको क्षेत्रमा लगेको थियो ।

उनी गत ७ गते तामाकोशी नदीमा बेपत्ता भएका थिए । दोलखाका प्रहरी प्रमुख दिपक खड्काले निर्माण कम्पनी र मृतकको परिवारबीच सहमित भएको बताएका छन् । पीडित पक्षले भने आफूहरूसँग कुनै सहमित नभएको भन्दै तीन दिनदेखि मृतकको शव बुझ्न मानेका छैनन् ।