मुख्यमन्त्री जम्कट्टेलले चैत ८ मा विश्वासको मत लिने
मकवानपुर — वाग्मती प्रदेशका मुख्यमन्त्री शालिकराम जम्कट्टेलले चैत ८ मा विश्वासको मत लिने भएका छन् । उनले उक्त दिन विश्वासको मत लिनका लागि तयार गरिदिन प्रदेशसभा सचिवालयलाई आग्रह गरेका थिए । सोहीअनुसार प्रदेशसभा सचिवालयले चैत ८ गते दिउँसो ३ बजेका लागि बैठक बोलाएको प्रदेशसभा सचिवालयका प्रमुख सचिव कृष्णहरि खड्काले जानकारी दिए ।
राष्ट्रपतिको चुनाव अगाडि राप्रपा सरकारबाट बाहिरिँदै सरकारलाई दिएको समर्थन फिर्ता लिएपछि मुख्यमन्त्रीले विश्वासको मत लिनुपर्ने अवस्था सिर्जना भएको हो । राप्रपाले सरकारमा सहभागी आफ्ना तीन जना मन्त्रीलाई फिर्ता बोलाएको थियो ।
गत पुस २६ मा वाग्मती मन्त्रिपरिषद् गठन हुँदा नेकपा (एमाले), नेकपा (माओवादी केन्द्र) र राप्रपाको संयुक्त गठबन्धन बनेको थियो । वाग्मती प्रदेश सरकारको वर्तमान मन्त्रिपरिषद्मा माओवादी केन्द्र र एमालेका मात्रै मन्त्री रहेका छन् ।
प्रकाशित : चैत्र २, २०७९ १५:५५
