सिन्धुलीको जंगलमा दुई दिनदेखि डढेलो

बीपी राजमार्गको घेराबन्दी हालेर लागेको डढेलोका कारण सवारी साधन तथा यात्रुहरुले सास्ती बेहोरिरहेका छन् । डढेलोको लप्काले गाडीलाई सडक पार गर्न मुस्किल भएको यात्रु ईश्वरीलाल श्रेष्ठले सुनाए । चारैतिरबाट वनको सबै नष्ट हुनेगरी डढेलो लाग्दा निभाउने प्रयास कसैले नगरेकोमा उनले चिन्ता व्यक्त गरे ।

डढेलोका कारण संरक्षित वन नष्ट हुने तथा नजिक रहेका घरगोठमा आगलागी हुने भन्दै स्थानीय त्रसित छन् । सदरमुकामको च्याउकोट, कमलामाई, खाडीखोला र कोप्चेखोला सामुदायिक वनमा समेत डढेलो सुरु भएको छ । घाँसको लोभमा गोठाला तथा घाँसीहरुले आगो सल्काइदिने भएकाले स्थानीयले नियन्त्रणका लागि खासै प्रयास गर्दैनन् । घर तथा बस्ती नै आगलागी भएमा मात्र कोकोहोलो हुने गरेको छ ।

डढेलोले संरक्षित साल तथा अन्यजातका रुखहरु, वनस्पति, चराचुरुङ्गी र जीवजन्तुलाई प्रत्यक्ष असर गर्ने डिभिजन वन कार्यालयले जनाएको छ । जिल्लाको चुरे क्षेत्र र महाभारत क्षेत्रमा समेत भररात जंगलमा डढेलो लागेको प्रष्टै देखिन्छ । डढेलो नियन्त्रणका लागि वन कार्यालयमा १० जना अग्निनियन्त्रक टोली छ । डढेलो लागेको खबर पाएमा तत्काल टोली परिचालन हुने डिभिजन वन प्रमुख कृष्णराज न्यौपाने बताउँछन् । स्थानीयले डढेलो लागेको बारे जानकारी नदिएको उनले बताए ।

सिन्धुली नेपालकै साल जातको रुखहरु प्रशस्त भएको १० जिल्लामा पर्छ । जिल्लाको ९ वटा स्थानीय तहमध्ये कमलामाई र दुधौली नगरपालिका, मरिण र हरिहरपुरगढी गाउँपालिकामा चुरे क्षेत्रको जंगल पर्दछ । सिन्धुलीमा हालसम्म पाँचसय पाँचवटा सामुदायिक वन समूह रहेका छन् । एक लाख ५० हजार हेक्टर जंगल उपभोक्तालाई संरक्षणको जिम्मा दिइएको छ ।