रामेछाप — निर्माण व्यवसायीले तोकिएको अवधिमा काम नगरेका कारण रामेछापमा पर्ने मध्यपहाडी राजमार्ग निर्माण अझै पूरा हुन सकेको छैन । रामेछापमा मध्यपहाडी राजमार्गको ४४ किलोमिटर खण्ड छ । त्यसमध्ये अझै साढे ४ किमिको ट्र्याक नै खनिएको छैन । ट्र्याक खनेको खण्डमा पनि तोकिएको मापदण्ड पूरा गरिएको छैन । 

मध्यपहाडी सडक आयोजना पूर्वी खण्डका आयोजना प्रमुख दीपेन्द्र पाण्डेका अनुसार निर्माण व्यवसायीलाई तोकिएको अवधिमै निर्माण सम्पन्न गर्न आयोजनाले बारम्बार पत्राचार गरेको छ । तर अझै आशालाग्दो गतिमा काम अघि बढेको छैन ।

पाण्डेका अनुसार पुस मसान्तसम्म मात्र म्याद भएको लोहनी एन्ड सिद्धबाबा निर्माण सेवाले ट्र्याक खोल्ने काम गरे पनि सन्तोषजनक नभएकाले सुधारका लागि पत्राचार गरिएको छ । ठेक्का सम्झौताको ९३ प्रतिशत भुक्तानी पाइसकेको उक्त कम्पनीले सित्खा क्षेत्रको ट्र्याक खोल्ने जिम्मा लिएको थियो । तोकिएको मापदण्डअनुसारको निर्माण नगरेकाले मापदण्डबमोजिमको निर्माण गर्न उक्त कम्पनीलाई पत्राचार गरिएको हो । ‘हामीले पत्राचार गरिसकेका छौं,’ पाण्डेले भने, ‘म्यादभित्र डिजाइनबमोजिमको सडक नबनाएको खण्डमा ठेक्का तोडेर कालोसूचीमा राख्ने प्रक्रिया थाल्छौं ।

रामेछाप खण्डमा पर्ने लुभुखोला, सित्खाखोला र तामाकोसीमा निर्माण गर्नुपर्ने पुलको काम पनि अधुरै छ । आयोजनाले विभिन्न खण्डमा ठेक्का लगाएकोमा केही खण्डमा भने काम भइरहेको छ । केही दिनअघि रामेछापका प्रमुख जिल्ला अधिकारी शोभाखर रेग्मीको अध्यक्षतामा भएको बैठकमा समयमा काम नगर्ने निर्माण व्यवसायीलाई ठेक्का तोडेर कालोसूचीमा राख्ने प्रक्रिया थाल्ने निर्णय भएको थियो । ‘अब हामी त्यही निर्णयलाई टेकेर आवश्यक कदम चाल्छौं,’ उनले भने ।