वाग्मतीका नवनियुक्त ८ मन्त्रीले लिए शपथ- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

वाग्मतीका नवनियुक्त ८ मन्त्रीले लिए शपथ

सुवास विडारी

मकवानपुर — वाग्मती प्रदेशका नवनियुक्त मन्त्रीहरूले पद तथा गोपनीयताको शपथ ग्रहण गरेका छन् । मुख्यमन्त्री शालिकराम जम्कट्टेलले मुख्यमन्त्री नियुक्त भएको १७ औं दिनमा दोस्रो पटक मन्त्रिपरिषद् विस्तार गरी पूर्णता दिएका हुन् ।

हेटौंडा–१० स्थित प्रदेश प्रमुखको कार्यालयमा नवनियुक्त मन्त्रीहरूलाई प्रदेश प्रमुख यादवचन्द्र शर्माले पद तथा गोपनीयताको शपथ ग्रहण गराएका थिए । नेकपा एमालेबाट मन्त्रिपरिषद्‌मा एकालाल श्रेष्ठ श्रम रोजगार तथा यातायात, रामेश्वर श्रेष्ठ स्वास्थ्य र केशव पोखरेलले कृषि तथा पशुपन्छी विकास मन्त्रालयको जिम्मेवारी प्राप्त गरेका छन् ।

माओवादी केन्द्रबाट युवराज दुलालले भौतिक पूर्वाधार विकास, गंगानारायण श्रेष्ठ आन्तरिक मामिला तथा कानुन र कुमारी मोक्तानले सामाजिक विकास मन्त्रालयको जिम्मेवारी प्राप्त गरेका छन् ।

राप्रपाका डम्बर तामाङ पर्यटन, उद्योग तथा सहकारी तथा राजु विष्ट वन तथा वातावरण मन्त्रालयको जिम्मेदवारी प्राप्त गरेका छन् ।

विनाविभागीय मन्त्री रहेका उद्धव थापाले खानेपानी, ऊर्जा तथा सिचाईं मन्त्रालयको जिम्मेवारी प्रदान गरिएको छ । एमालेबाट यसअघि जगनाथ थपलिया आर्थिक मामिला तथा योजनामन्त्री नियुक्त भइसकेका छन् ।

वाग्मतीमा अब ११ सदस्यीय मन्त्रिपरिषद् भएको छ । प्रदेशमा मन्त्रालयको संख्या १४ बाट घटाइएको हो ।

प्रकाशित : माघ ११, २०७९ १४:२९
प्रतिक्रिया
पठाउनुहोस्

तुइन खोलामा पुल बनाउन दैनिक चार घण्टा सडक बन्द

रमेशकुमार पौडेल

चितवन — नारायणगढ मुग्लिन सडक संघीय राजधानी काठमाडौं र पर्यटकीय सहर पोखरालाई देशको पूर्वी र पश्चिम भेगसँग जोड्ने मुख्य राजमार्ग हो । तर पछिल्ला पाँच वर्षयता वर्षायाममा यो सडक पहिरो गएर घण्टौं बन्द हुने गर्दछ । यो पटक हिउँदमा पनि नारायणगढ मुग्लिन सडक दैनिक चार घण्टा बन्द भइरहेको छ । सुरुमा पुस ५ गतेदेखि एक महिनालाई भनेर गरेको बन्द फेरि महिना दिन थपिएको छ । पुल बनाउन यसरी सडक बन्द गर्नु पर्ने बाध्यता आएको हो ।

नारायणगढ मुग्लिन सडक पुरानो सडक भए पनि साँघुरो थियो । ७२ सालमा यो सडकलाई एसियाली मापदण्ड अनुसारको दुई लेनको फराकिलो सडक बनाउन काम सुरु भयो । झण्डै सवा तीन वर्ष लगाएर सडक फराकिलो बनाए पनि पुल पुरानै थिए । ३६ किलो मिटर सडकमा १८ वटा पुल छन् । तीमध्ये तीनवटा पुल दुई वर्षअघि फराकिलो बनाए पनि बाँकी १५ वटा पुल फराकिलो बनाउन ७६ सालको चैत्र १० मा सम्झौता भएको थियो ।

नारायणगढ मुग्लिन सडक, नागढुंगा मुग्लिन सडक (पश्चिम खण्ड) आयोजनाका सूचना अधिकारी रहेकका इन्जिनियर कृष्ण आचार्यका अनुसार पाँचवटा पुल पहाड काटेर निर्माण भइरहेका छन् । मुग्लिन नजिकको चिसेन्जी, तुईन खोला, कालिखोला, तोपे खोला र सिमलतालको पुलको जग राख्न तथा पहुँच मार्ग बनाउन आडको पहाड काट्नु परेको छ ।

सडक आडको अग्लो पहाड काट्दा माथिबाट ढुंगा खसेर तल सडकमा गुडेका गाडीमा लाग्न सक्ने खतरा देखेपछि गाडी रोकेर काम गर्नुपर्ने बाध्यता आएको इन्जिनियर आचार्यले बताए । पहाड काट्नु पर्ने अन्य पुलको काम सकिएको छ । तर चिसेन्जी र तुईन खोलामा धेरै नै काम बाँकी रहेपछि गाडी बन्द गर्ने समय एक महिना थप भएको आचार्यले बताए । यी दुईमध्ये तुईन खोलाको काम झनै गाह्रो छ ।

तुईन खोलाको मुग्लिन तर्फको भागको पहाड ६० मिटर अग्लो थियो । पुलको ११ मिटर फराकिलो मुखका लागि यो पहाड पूर्णरुपमा हटाउनु पर्ने हुन्छ । तर अहिलेसम्म माथिबाट १५ मिटर मात्रै काटेर सकेको आचार्यले जानकारी दिए । गाडी रोकिएका बेलामा सातवटा मेसिनले धमाधम काम गर्दछन् । तर ठाडो भिरमा कडा चट्टान भएका कारण काट्न सजिलो भने छैन । त्यसैले आउँदो फागुन ५ भित्र ४५ मिटर पहाड काटेर सक्न गाह्रै छ ।

आधा पहाड काटेर सके अहिलेको जस्तो दिनमा चार घण्टा गाडी रोकेर काम गर्न नपर्ने आचार्यले बताए । नारायणगढ मुग्लिन सडक, नागढुंगा मुग्लिन सडक (पश्चिम खण्ड) आयोजनाका प्रमुख किरण कार्कीले यो सडक हुँदै दैनिक १५ हजारको हाराहारीमा गाडी ओहर दोहर गर्ने बताए । त्यसैले लामो समय गाडी रोकेर काम गर्न चुनौतीपूर्ण छ । अवस्था हेरेर नियन्त्रित विष्फोट मार्फत पहाड फुटाउन पनि पर्न सक्ने कार्कीले बताए ।


प्रकाशित : माघ ११, २०७९ १४:२०
पूरा पढ्नुहोस्
प्रतिक्रिया
पठाउनुहोस्
×