नुवाकोटमा मनाइयो सोनाम ल्होछार - वाग्मती - कान्तिपुर समाचार
कान्तिपुर वेबसाईट
AdvertisementAdvertisement

नुवाकोटमा मनाइयो सोनाम ल्होछार 

कृष्ण थापा

नुवाकोट — जिल्लामा विविध कार्यक्रम गरी २८५९ औं सोनाम ल्होछार मनाइएको छ । नेपाल तामाङ घेदुङ नुवाकोटको आयोजनामा शनिबार विदुर नगरपालिका-४ बट्टारमा ल्होछार कार्यक्रम सम्पन्न भएको हो । कार्यक्रमका प्रमुख अतिथि एवं नुवाकोट १ (१) बाट वाग्मती प्रदेश सदस्यमा निर्वाचित सांसद राधिका तामाङले तामाङ जातिको संस्कृति र आफ्नो पहिचानको जगेर्ना गर्न यस्ता कार्यक्रमले सघाउने विश्वास व्यक्त गरिन् । 

नेपाल तामाङ घेदुङका केन्द्रीय सचिव तथा कार्यक्रम संयोजक जयमान वाइबाले तामाङ संस्कार र संस्कृतिको विकास गर्न कार्यक्रम आयोजना गरिएको बताए । कार्यक्रममा तामाङ समुदायमा प्रचलित गीत, संगीत र नाच प्रस्तुतित गरिएको थियो ।

कार्यक्रममा जिल्ला समन्वय समिति प्रमुख रजिन्द्रविक्रमसिंह ठकुरी, बेलकोटगढी नगरपालिकाका प्रमुख जगतबहादुर गुरुङ, पञ्चकन्या गाउँपालिकाका अध्यक्ष तेजबहादुर तामाङ, प्रमुख जिल्ला अधिकारी नारायणप्रसाद रिसाल, सुरक्षा निकायका पदाधिकारी, विभिन्न संघसंस्थाका पदाधिकारी र सर्वसाधारणको उपस्थिति थियो ।

विश्वका तामाङले आ-आफ्नो अनुकूलतामा फरक-फरक दिन र समयमा ल्होछार पर्व मनाउने गरे पनि यस वर्ष ल्होछारको मुख्य दिन आइतबार माघ ८ गते परेको छ । आइतबार केन्द्र सरकारले सार्वजनिक बिदा समेत दिएको छ ।





प्रकाशित : माघ ७, २०७९ १८:२०
प्रतिक्रिया
पठाउनुहोस्

कञ्चनपुरमा १५ किलो चरेससहित दुई पक्राउ

भवानी भट्ट

कञ्चनपुर — कञ्चनपुर प्रहरीले १५ किलोग्रामभन्दा बढी चरेससहित दुई जनालाई पक्राउ गरेको छ । जिल्ला प्रहरी कार्यालयको टोलीले बझाङको केदारस्यु गाउँपालिका-७ का करन धामी र कञ्चनपुरको शुक्लाफाँटा नगरपालिका-१२ का महेशप्रसाद भट्टलाई शुक्रबार साँझ पक्राउ गरेको हो । धामी कञ्चनपुरको भीमदत्त नगरपालिका-३ तिलकपुर र भट्ट शुक्लाफाँटा-१२ बाट पक्राउ गरेका हुन् । 

धामीबाट १५ किलो ५२० ग्राम र भट्टबाट ७५ ग्राम चरेस बरामद भएको जिल्ला प्रहरी कार्यालय कञ्चनपुरका प्रहरी निरीक्षक भरतराज गिरीले बताए । गिरीका अनुसार धामी तिलकपुरमा आफन्तको घरमा बस्छन् । उनले आफन्तकै घरभित्र लुकाइराखेको अवस्थामा चरेस बरामद भएको बताए । उनकै सूचनाका आधारमा शुक्लाफाँटा नगरपालिका- १२ का भट्ट पनि पक्राउ परेका हुन् । धामीले भट्टलाई चरेस बिक्री गरेको जानकारी दिएका थिए ।

प्रकाशित : माघ ७, २०७९ १८:०५
पूरा पढ्नुहोस्
प्रतिक्रिया
पठाउनुहोस्
×