४८ वर्षअघि हराएको शाक्यमुनि बुद्धको मूर्तिको प्रतिस्थापन- वाग्मती - कान्तिपुर समाचार

४८ वर्षअघि हराएको शाक्यमुनि बुद्धको मूर्तिको प्रतिस्थापन

ज्योति श्रेष्ठ

काभ्रे — बनेपा नगरपालिका–८ स्थित बहि टोलबाट हराएको अष्टधातुबाट निर्मित शाक्यमुनि बुद्धको मूर्तिको ४८ वर्षपछि प्रतिस्थापन गरिएको छ । २०३१ सालमा बहि मन्दिरबाट हराएको शाक्यमुनि बुद्धको मूर्ति भेटिएपछि बुधबार स्थानीय र नगरपालिकाको संयुक्त पहलमा त्यही ठाउामा प्रतिस्थापन गरिएको हो ।

४८ वर्षपछि भेटिएको मूर्तिलाई बाजागाजासहित बनेपा बजार परिक्रमा गरी प्रतिस्थापन गरिएको बनेपा नगरपालिकाका प्रमुख शान्तिरत्न शाक्यले जानकारी दिए । उनका अनुसार गुर्जुहरुले (शाक्य समुदायको पुजारी) मन्दिरमा पूजापाठ गरेर उक्त मूर्ति प्रतिस्थापन गरिएको हो ।

यसरी भेटियो मूर्ति

बहि मन्दिरबाट हराएको २६ इन्च लम्बाइ र ८० केजी तौल भएको शाक्यमुनि बुद्धको मूर्ति २०३१ सालमा हराएको थियो । मूर्ति हराएपछि महिनौसम्म स्थानीय, प्रहरी र प्रशासनले महिनौंसम्म खोजी गरे । मूर्तिमा लगाइएको माला बनेपाको करुणामार्गस्थित नागपोखरी नजिकै भेटिएपछि सोही स्थान वरपर मूर्ति भेटिने आशंकामा पोखरी सफा गरेर पनि खोज्ने प्रयास गरिएको बहि ज्ञानमाला भजन खल: का अध्यक्ष नरेन्द्रराज श्रेष्ठले जानकारी दिए । उनका अनुसार बनेपा आसपासका बजार क्षेत्रमा धेरैसम्म खोजियो तर कही भेटिएन । ‘भेटिने आश पनि मारिसकेका थियौं,’ उनले भने ।

मूर्ति हराएपछि बहि ज्ञानमाला भजन खल:का पदाधिकारीले मूर्ति खोजिदिन पुरातत्व विभागलाई अनुरोध गरेको थियो । खोज्दै जाने क्रममा २०३५ सालमा काठमाडौंको एयरपोर्टमा भेटिएपछि विभागले सो मूर्ति सुरक्षाका लागि राष्ट्रिय संग्राहलयमा राखेको राष्ट्रिय संग्राहलयका निर्देशक जयराम श्रेष्ठले जानकारी दिए । भेटिएको मूर्ति मन्दिरमा प्रतिस्थापनका लागि बहि ज्ञानमाला भजन खल:बाट माग भएतापनि मन्दिरको जिर्ण अवस्था र असुरक्षाका कारण पुरातत्व विभागले मूर्तिलाई संग्राहलयमै राखिएको निर्देशक श्रेष्ठले बताए ।

बहि ज्ञानमाला भजन खल:ले २०७१ सालदेखि नै मूर्तिलाई मन्दिरमा प्रतिस्थापन गर्ने तयारी गरेको थियो । तर २०७२ सालको भूकम्पका कारण मन्दिरमा पनि सामान्य क्षति भयो । २०७५ सालमा मन्दिरको पुर्न:निर्माण गर्न पुरातत्व विभागले निर्देशनका साथै १ करोड रुपैयाँ बजेट विनियोजन गर्‍यो । दुई वर्षमा मन्दिरको पुन:निर्माण सम्पन्न गरेपछि बहि ज्ञानमाला भजन खल:ले मूर्ति प्रतिस्थापनका लागि विभागलाई पुन: पत्रचार गरेको बहि ज्ञानमाला भजन खल:का अध्यक्ष श्रेष्ठले बताए । उनका अनुसार मूर्ति प्रतिस्थापनका लागि सबै कागजात जुटाउन अलि समय खर्चिनुपर्‍यो । ‘२०७९ मा भदौमा विभागले मन्दिरको अनुगमन गर्‍यो, अनुगमनपश्चात सबै ठिक छ भनेर मूर्ति प्रतिस्थापनका लागि विभागले स्वीकृति दियो,’ उनले भने, ‘मूर्ति प्रतिस्थापनको लागि उत्तम साइत मंसिर १४ गते जुर्‍यो, संग्राहलयबाट मूर्ति फिर्ता ल्याउन सफल भयौं ।’

लामो समयपछि मूर्तिलाई फिर्ता ल्याइ मन्दिरमा प्रतिस्थापन गर्न सक्नु नै नगरको लागि ठूलो सफल्ता भएको बनेपा नगर प्रमुख शान्तिरत्न शाक्यले बताए । उनका अनुसार मूर्ति र मन्दिरको सुरक्षाका लागि सीसी क्यामेरा, साइरन, बत्ती, लगायत मजबुत संरचनाको व्यवस्थापन गरिएको छ । मूर्तिको संरक्षण गर्नु स्थानीय, समुदाय, नागरिक समाज सबैको दायित्व भएको बताउादै नगर प्रमुख शाक्यले भने, ‘यो मन्दिरसँगै नगरमा रहेका अन्य मठमन्दिर, गुम्बाहरुको संरक्षणका लागि पनि नगरपालिकाले कार्ययोजना बनाएर काम गरिरहेको छ ।’

प्रकाशित : मंसिर १५, २०७९ ०८:५०
प्रतिक्रिया
पठाउनुहोस्

झिनो मतान्तरका हारजित

सबैभन्दा कम ६ मतान्तरमा एमालेका सुधीर पौडेल स्याङ्जा १ (२) बाट प्रदेशसभामा निर्वाचित 
प्रतीक्षा काफ्ले

कास्की — झिनो मतान्तरका कारण स्याङ्जा १ (२) को चुनावी नतिजा अन्यत्रभन्दा बढी चासोको विषय रह्यो । ६ मत बढी पाएर एमालेका सुधीर पौडेल प्रदेशसभा सदस्यमा निर्वाचित भए भने कांग्रेसका बुद्धिबहादुर रानाले पराजय व्यहोर्नुपर्‍यो । 


यहाँ पौडेलले १७ हजार ४ सय ४१ मत ल्याउँदा उनका निकटतम प्रतिस्पर्धी कांग्रेसका रानाले १७ हजार ४ सय ३५ मत ल्याएका थिए । यो प्रदेशमै सबैभन्दा कम मतान्तरको हारजित हो । मंसिर ४ मा सम्पन्न प्रतिनिधिसभा र प्रदेशसभा निर्वाचनको मत परिणाम सार्वजनिक भएको छ ।

चुनावी नतिजा सार्वजनिक भएअनुसार प्रतिस्पर्धीको हारजित थोरै मतान्तरमा भएको छ । गण्डकी प्रदेशमा प्रतिनिधिसभाका १८ निर्वाचन क्षेत्रमध्ये १७ वटामा चुनावी परिणाम आइसकेको छ । प्रदेशसभातर्फ ३६ मध्ये निर्वाचन क्षेत्रमध्ये ३४ वटाको मत परिणाम सार्वजनिक भइसकेको छ । स्याङ्जा २ को मतगणना भने १० दिनपछि सुरु हुने भएको छ । राजनीतिक दलका विवादका कारण मतगणना रोकिएको थियो । बुधबार मात्रै निर्वाचन आयोगले मतगणना गर्न निर्देशन दिएको हो ।

चुनावी नतिजा आएकामध्ये प्रतिनिधिसभातर्फ १ र प्रदेशसभातर्फ ५ क्षेत्रमा रोचक हारजित भएको छ । यी क्षेत्रमा झिनो अर्थात् ५ सयभन्दा कम मतान्तरले प्रतिनिधिसभा र प्रदेशसभा सदस्य चुनिएका छन् । कांग्रेस १ र एमाले ५ ठाउँमा ५ सयभन्दा कम मतले हारजित भएका छन् । झिनो मतान्तरले जित्नेमा माओवादीका पनि छन् ।

म्याग्दी प्रदेशसभा २ का माओवादी उम्मेदवार रेशम जुग्जालीले एमाले उम्मेदवार यामबहादुर गर्बुजालाई १ सय १ मतान्तरले पराजित गरे । रेशमले ९ हजार ४ सय ५४ मत ल्याउँदा एमालेका गर्बुजाले ९ हजार ३ सय ५३ मत ल्याए । प्रदेशसभातर्फ मुस्ताङ २ बाट कांग्रेसका विकल शेरचनले एमालेका चन्द्रमोहन गौचनलाई १ सय ५८ मतले जितेका थिए । शेरचनले २ हजार ७ सय २३ मत प्राप्त गर्दा एमालेका गौचनले २ हजार ५ सय ६५ मत पाए ।

यी दुई स्थानमा झिनो मतले विजयी हुनेमा कांग्रेसका उम्मेदवार छन् । हार्नेहरू एमाले उम्मेदवार हुन् । गुरुङले एमालेका उम्मेदवार इन्द्रधारा डादु विष्टलाई २५० मतले हराउँदै मुस्ताङ (१) मा कांग्रेसका नम्डु गुरुङ प्रदेशसभा सदस्य चुनिए । नम्डुले १ हजार ४८ मत पाउँदा एमालेका इन्द्रधाराले ७ सय ९३ मत ल्याएका थिए ।

मनाङ (१) मा पनि कांग्रेस उम्मेदवारले एमाले उम्मेदवारलाई थोरै मतान्तरले हराए । कांग्रेसका मुनीन्द्रजंग गुरुङ र एमालेका राजनबहादुर गुरुङको मतान्तर ३ सय ३० छ । ५ सयको झिनो मतान्तरले हार जित हुनेमा प्रतिनिधिसभातर्फ मनाङ छ । मनाङमा कांग्रेसका टेकबहादुर गुरुङले थोरै मतान्तरले जित हात पारे ।

प्रकाशित : मंसिर १५, २०७९ ०८:४३
पूरा पढ्नुहोस्
प्रतिक्रिया
पठाउनुहोस्
×