सिन्धुलीमा ४ प्रतिशत मत बदर- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

सिन्धुलीमा ४ प्रतिशत मत बदर

राजकुमार कार्की

सिन्धुली — आसन्न प्रतिनिधिसभा र प्रदेशसभाको प्रत्यक्ष निर्वाचनमा जिल्लाभर खसेको मतमध्ये ४ प्रतिशत बदर भएको छ । प्रतिनिधिसभाका २ निर्वाचन क्षेत्रमा १ लाख १८ हजार ८ सय ४० मत खसेकोमा ४ हजार ९ सय २९ मत बदर भएको हो ।


प्रदेशसभातर्फका चार क्षेत्रमा १ लाख १९ हजार ९ सय ९३ जनाले मतदान गरेकोमा ३ हजार ८ सय ९२ मत बदर भएको छ । यो खसेको मतको ३ प्रतिशत हो ।

क्षेत्र–१ मा ६३ हजार २ सय ९६ मत खसेकोमा २ हजार ५ सय ७ मत बदर भएको छ । क्षेत्र–२ मा ५६ हजार ६ सय ३३ मत खसेकोमा २ हजार ४ सय २२ मत बदर भएको मुख्य निर्वाचन अधिकृतको कार्यालयले जनाएको छ ।

मत बदर हुनुमा मतदाता शिक्षा नपाउनुलाई मुख्य कारण औंल्याइएको छ । मतदाता शिक्षा दिने नाममा निर्वाचन आयोगले निर्णय मात्रै गरेको तर कार्यान्वयनमा ध्यान नदिएकाले धेरै मत बदर भएको सञ्चारकर्मी वरुण लामिछाने बताउँछन् । ‘गाउँमा मतदाता शिक्षा पुगेकै छैन । सदरमुकाममा नमुना मतदान भनेर कर्मचारी र पत्रकारले फोटो खिच्छन् । यसैबाट मतदाता शिक्षा पुर्‍याएको भन्दै जिल्ला निर्वाचन कार्यालयले झारा टार्छ । अनि मत बदर हुने नै भयो नि,’ उनले भने ।

निर्वाचन गराउन मतदान केन्द्रमा खटिने कर्मचारीले नबुझाइदिँदा पनि बदरको दर धेरै रहेको अर्का स्थानीय ईश्वर बस्नेतले बताए । ‘कर्मचारीहरूले मतदाताले मत दिएको चुनाव चिह्न हेर्न त मिल्दैन तर नजान्नेलाई एउटा मतपत्रमा एउटा मात्र छाप लगाउनुपर्नेछ जस्ता सामान्य ज्ञान दिन भने सकिन्छ,’ उनले भने, ‘हाम्रो क्षेत्रमा यस्तै अलमलमा परेका मतदाताको मत बदर हुन पुगेको हो ।’

मत बदर हुनुको अर्को कारण अशिक्षा पनि हो । कतिपय ठाउँमा दलकै कार्यकर्ताले पनि चाहिनेभन्दा बढी ठाउँमा स्वस्तिक छाप लाउन सिकाएको पाइएको उनको भनाइ छ । जिल्ला निर्वाचन कार्यालयले भने बदर मत संख्या न्यून गर्न जिल्लाका ९ वटै स्थानीय तहमा नमुना मतदान गरी मतदाता शिक्षा अभियान चलाएको जनाएको छ । धेरैजसो मतदाता साक्षर नरहेकाले घरदैलो गर्दा दलका नेता–कार्यकर्ताले पनि मतदाता शिक्षा दिन जरुरी रहेको कार्यालय प्रमुख पुष्पा झा बताउँछिन् । ‘हामीले मतदाता शिक्षा दिन सक्दो प्रयास गरेकै हौं, ठूलो क्षेत्र र कम जनशक्ति भएकाले दलहरूले पनि मतदातालाई जागरुक बनाउन कोसिस गर्नुपर्थ्यो,’ उनले भनिन् ।

प्रकाशित : मंसिर १२, २०७९ ०८:०२
प्रतिक्रिया
पठाउनुहोस्

नेयमर फर्कने ब्राजिलको विश्वास

एएफपी

दोहा — छैटौंपल्ट विश्वकप जित्ने अभियानमा रहेको ब्राजिललाई विश्वास रहेको छ, विश्व फुटबलका सबैभन्दा महँगा खेलाडी नेयमर चोटबाट फर्केर टिमको नेतृत्व गर्न सक्षम हुनेछन् । कतारमा ब्राजिलको पहिलो खेलमा नेयमरको घुँडामा चोट लागेको थियो । सर्बियाविरुद्ध प्राप्त २–० जितमा उनी खेलको अन्त्यतिर मैदानबाट बाहिर निस्केका थिए ।

पछि उनको एको चोट लागेको निश्चित भएको थियो । समूह ‘जी’ मा ब्राजिलले स्विट्जरल्यान्डको सामना गर्दा उनले नखेल्ने निश्चित मानिएको छ । डर त के थियो भने सम्भवतः उनले पूरा प्रतियोगिता नै खेल्न सक्ने छैनन् । डिसेम्बर १८ को फाइनल अगाडि उनी चोटबाट मुक्त हुन संघर्षरत रहने सम्भावना थियो ।

तर डिफेन्डर तथा पेरिस सेन्ट जर्मेन (पीएसजी) का साथी खेलाडी मारक्विन्होले नेयमर गहन उपचारमा संलग्न रहेको र पूर्ण निको भएर मैदानमा फर्कन प्रयासरत रहेको बताएका छन् । आइतबार आयोजित पत्रकार सम्मेलनमा मारक्विन्होले भने, ‘अहिले उनलाई गाह्रै भइरहेको छ ।’

उनी भन्छन्, ‘पहिलो खेलपछि उनी दुःखी थिए । यो सामान्य पनि हो, किनभने यही विश्वकपका लागि उनले कति धेरै सपना बुनेका छन् । अहिले परीक्षण र उपचार पनि उनी २४ घण्टा नै फिजियोथेरापी गरिरहेका छन् । यसले पनि देखाउँछ, उनी कति धेरै टिममा फर्कन चाहन्छन् । उनी ठ्याक्कै कहिले खेल्न सक्षम हुनेछन्, त्यो हामीलाई थाहा छैन । तर हाम्रो विश्वास छ, यो चाँडोभन्दा चाँडो हुनेछ ।’

ब्राजिली प्रशिक्षक टिटेले सर्बियाविरुद्धको खेललगत्तै नेयमरले प्रतियोगिताकै क्रममा खेल्न सक्षम हुने बताएका थिए । अहिले तिनै प्रशिक्षक ३० वर्षीय खेलाडीको खेल्न सम्भावनाबारे बचेर बोलिरहेका छन् । उनी नेयमर मात्र होइन, राइट ब्याक डानिलोले खेल्न नखेल्नेबारे दाबी गर्न सकिरहेका छैनन् । टिटे भन्छन्, ‘मलाई पूरा विश्वास छ, नेयमर र डानिलो यसै प्रतियोगितामा खेल्न सक्षम हुनेछन्, किनभने यो विश्वकप हो । तर चिकित्सकीय र आधिकारिक रूपमा यस्तै हुनेछ भनेर भन्न सक्ने स्थिति छैन । हामीलाई के विश्वास छ भने नेयमर मात्र होइन, डानिलोले पनि यसै विश्वकपमा खेल्नेछन् ।’

स्विट्जरल्यान्डका जेरडान साकिरी र प्रशिक्षक मुरत याकिन । तस्बिर : एएफपी

स्टेडियम ९७४ मा हुने खेलमा ब्राजिल स्विट्जरल्यान्डमाथि विजयी रहे, समूह चरणको एक खेल अगाडि नै त्यो अन्तिम १६ मा प्रवेशका लागि पर्याप्त रहन सक्नेछ । तर त्यसका लागि समूह ‘जी’ मा क्यामरुन र सर्बियाबीचको खेलको नतिजा भने कुर्नुपर्नेछ । त्यो हो भने डिसेम्बरको ५ अथवा ६ मा ब्राजिलले अन्तिम १६ को खेल खेल्नेछ । युभेन्ट्सका ३१ वर्षीय खेलाडी डानिलो पनि घुँडाको चोटबाट गुज्रिरहेका छन् र उनले पनि यो चोट सर्बियाविरुद्धको खेलमै बोकेका थिए ।

उनले खेल्न नसक्ने स्थितिमा स्विस टिमविरुद्ध रियल म्याड्रिडका एडेर मिलिटाओ अथवा ३९ वर्षीय डानी एलाभेसलाई उतारिनेछ । तर चर्चाको केन्द्रबिन्दु भने नेयमर नै रहेका छन् । ब्राजिली टिमको प्रदर्शन धेरे हदसम्म नेयमरकै खेलमा भर पर्ने मानिन्छ । सन् २०१४ को ब्राजिलमै भएको विश्वकपमा पनि नेयमर कोलम्बियाविरुद्धको क्वाटरफाइनल खेलमा घाइते भएका थिए । त्यसैले उनी जर्मनीविरुद्ध ७–१ को खेलमा उपस्थित थिएनन् ।

प्रकाशित : मंसिर १२, २०७९ ०७:५६
पूरा पढ्नुहोस्
प्रतिक्रिया
पठाउनुहोस्
×