दोलखामा नयाँ उम्मेदवारका चुनौती

दोलखा — दोलखामा प्रतिनिधिसभा सदस्यका लागि २ नयाँ अनुहारबीच प्रतिस्पर्धा हुने भएको छ । जसमा गठबन्धनबाट माओवादी केन्द्रका गंगा कार्की र एमालेबाट बालकृष्ण शिवाकोटी छन् । कार्की र शिवाकोटीसहित राष्ट्रिय प्रजातन्त्र पार्टीका सहायक महामन्त्री विजयी खड्का पनि पहिलो पटक नै संसदीय चुनावमा प्रतिस्पर्धा गर्दै छन् ।

झन्डै ३ दशकदेखि कम्युनिस्टको ‘पकड क्षेत्र’ को रूपमा रहेको यो जिल्लामा यसपटक पनि मुख्य प्रतिस्पर्धा बामपन्थी उम्मेदवारबीच नै हुने देखिएको छ । २०५१ को मध्यावधि निर्वाचनमा कांग्रेस नेता स्वर्गीय भीमबहादुर तामाङ साविकको क्षेत्र–१ मा विजयी भएका थिए । त्यसयता यहाँ वामपन्थी उम्मेदवारले नै जितेका छन् । २०६४ मा जिल्लाका दुवै क्षेत्रमा माओवादीले जितेको थियो । त्यसपछिका सबै प्रतिनिधिसभा सदस्य निर्वाचनमा एमालेले जित्दै आएको छ । यो पटक सत्ता गठबन्धनबाट उम्मेदवार माओवादी नेता कार्कीलाई निर्वाचित हुन कांग्रेसको भर पर्नुपर्नेछ ।

एमालेबाट पूर्वसञ्चारमन्त्री पार्वत गुरुङ र पूर्वपर्यटनमन्त्री आनन्दप्रसाद पोखरेललाई पछि पार्दै व्यवसायी शिवाकोटीले टिकट हत्याएका हुन् । तर, कार्कीलाई पराजित गर्न उनलाई निकै मिहिनेत गर्नुपर्ने देखिन्छ । गत स्थानीय निर्वाचनमा गठबन्धनले जिल्लाका ९ मध्ये ७ वटा स्थानीय तहको प्रमुख जितेको थियो । वडाध्यक्षको मतभार हेर्दा एमालेभन्दा गठबन्धन नै अघि छ । गठबन्धनले वडाध्यक्षमा ४८ हजार ७ सय ८२ मत पाउँदा एमालेले ३९ हजार ३ सय २० मत मात्रै प्राप्त गरेको थियो ।

२०४६ सालबाटै भूमिगत भई माओवादी आन्दोलनमा होमिएका कार्की हाल पार्टीको पोलिटब्युरो सदस्य छन् । जिल्लामा माओवादीका संस्थापक नेतासमेत रहेका उनले पार्टी र सरकार दुवैमा खासै अवसर पाएका छैनन् । दिगो विकास र जिल्लाको स्तरोन्नतिका लागि गठबन्धनले आफूलाई अघि सारेको बताउँछन् उनी । ‘संविधान निर्माण भइसक्यो, अब आर्थिक समृद्धि मुख्य कुरा हो,’ उनले भने । लामो राजनीतिक यात्रामा आफू सधैंभरि जनताकै नजिक रहेकाले चुनाव जित्नेमा उनी विश्वस्त छन् ।

जिल्लामा निजी क्षेत्रबाट ठूलो लगानी भित्र्याउन सुरु गरेको जस भने शिवाकोटीलाई जान्छ । उनी आफू भाषणमा भन्दा पनि काममा विश्वास गर्ने व्यक्ति भएको बताउँछन् । ‘काममा विश्वास गर्ने भएकाले पार्टीले जिल्लाको भाग्य बदल्न मलाई पठाएको हो,’ उनले भने । खासगरी यहाँको पर्यटन र कृषि क्षेत्रलाई प्राथमिकतामा राखेको उनको भनाइ छ । उनी कालिञ्चाक केवलकारका सञ्चालकसमेत हुन् ।

गठबन्धनकै एक घटक कांग्रेसका कार्यकर्ताको असन्तुष्टि व्यवस्थापन गर्न कार्कीलाई चुनौती छ भने शिवकोटीलाई स्थानीय निर्वाचनमा आफ्नै कार्यकर्ताले गरेको अन्तरघातलाई व्यवस्थापन गर्नुपर्ने चुनौती छ । यस्तै, पछिल्लो समय जिल्लाभर संगठन विस्तार गरेको राप्रपाले विजय खड्कालाई मैदानमा उतारेको छ ।

गठबन्धन र एमालेका असन्तुष्ट पक्षको मत आफूले पाउनेमा उनी ढुक्क छन् । ‘हाम्रा एजेन्डा जनतालाई प्रस्ट पार्नेछौं,’ उनले भने,‘जनताले विगतका दलहरूका गतिविधिकै कारण पनि राप्रपालाई सघाउनेछन् ।’ राष्ट्रिय स्वतन्त्र पार्टीका जगदीश खरेलको पनि चुनौती ठूला दलसामु छ । जिल्लामा १ लाख ६० हजार ४ सय मतदाता छन् ।