नुवाकोटको २ वटै निर्वाचन क्षेत्रमा निर्वाचन अधिकृतको कार्यालय स्थापना- वाग्मती - कान्तिपुर समाचार

नुवाकोटको २ वटै निर्वाचन क्षेत्रमा निर्वाचन अधिकृतको कार्यालय स्थापना

कृष्ण थापा

नुवाकोट — प्रतिनिधिसभा र प्रदेशसभा सदस्य निर्वाचन गराउन जिल्लामा मुख्य निर्वाचन अधिकृतसहित निर्वाचन अधिकृतको कार्यालय स्थापना गरिएको छ । बिहीबार जिल्ला सदरमुकाम विदुरस्थित नुवाकोट अदालत परिसरमा मुख्य निर्वाचन अधिकृतको कार्यालय स्थापना गरिएको हो । 

विदुर नगरपालिका- २ को प्रिफेब भवनमा कार्यालय स्थापना गरिएको छ । आगामी मंसिर ४ गते आइतबार हुने निर्वाचनका लागि जिल्ला न्यायाधीश एवं मुख्य निर्वाचन अधिकृत मदनबहादुर धामीले कार्यालयको बोर्ड राखेर कार्यालय उद्घाटन गरेका थिए ।

उक्त कार्यालयले नुवाकोटको निर्वाचन क्षेत्र नम्बर २ को निर्वाचन गराउने छ भने अर्को निर्वाचन क्षेत्र नम्बर १ को कार्यालय तादी गाउँपालिका ३ खरानीटारमा स्थापना गरिएको छ ।

मुख्य निर्वाचन अधिकृत धामीले स्वच्छ र भयरहित वातावरणमा निर्वाचन हुने बताए । मनोनयनदेखि सबै कामकारबाही यही कार्यालयबाट हुनेछ भने अन्य कार्यालयको पनि सुपरिवेक्षण गरिने मुख्य निर्वाचन अधिकृतको कार्यालयले जनाएको छ ।

निर्वाचनका लागि नुवाकोटमा मतदानस्थल र मतदान केन्द्र कायम भैसकेका छन् । निर्वाचनमा १ सय ३२ वटा मतदानस्थल र २ सय ८७ वटा मतदान केन्द्र कायम गरिएको छ ।

अधिकांश मतदानस्थल विद्यालयहरूमा, केही स्वास्थ्य चौकी लगायतका भवनमा रहेका छन् । नुवाकोटमा २ लाख ३९ हजार मतदाता छन् ।

प्रकाशित : आश्विन २०, २०७९ १४:१५
प्रतिक्रिया
पठाउनुहोस्

दार्चुलाका १४ मतदान केन्द्र अतिसंवेदनशील

मनोज बडू

दार्चुला — आगामी मंसिर ४ गते हुने प्रतिनिधिसभा र प्रदेशसभा निर्वाचनका लागि जिल्लामा १ सय १४ मतदान केन्द्र तोकिएका छन् । तीमध्ये सुरक्षाको दृष्टिकोणले १४ मतदान केन्द्र अति संवेदनशील रहेको जिल्ला सुरक्षा समितिले जनाएको छ । 

सुरक्षा संवेदनशीलताका हिसाबले १४ मतदान केन्द्र अतिसंवेदनशील रहेको छन् । जिल्ला सुरक्षा समितिको बैठकले २३ मतदान केन्द्र संवेदनशील र ७७ वटा समान्य सूचीमा राखेका छ । मतदान केन्द्रको वर्गीकरण गर्दै सोहीअनुसारको सुरक्षा योजना बनाइने जिल्ला सुरक्षा समिति संयोजक एवं प्रमुख जिल्ला अधिकारी दीर्घराज उपाध्यायले जानकारी दिए । उनले मतदान केन्द्रको वर्गीकरण गरी सुरक्षाकर्मी परिचालनको योजना बनाइने बताए ।

भौगोलिक विकटता, मतदाता र मतदान केन्द्रको दूरी र सुरक्षा पोस्टको पहुँच गत वैशाखमा सम्पन्न भएको स्थानीय तहको चुनावको समीक्षासहितका विभिन्न सूचकलाई आधार मानेर मतदान केन्द्रको वर्गीकरण गरिएको हो । अतिसंवेदनशील र संवेदनशील सूचीमा परेका मतदान केन्द्रमा सोहीअनुसारको सुरक्षा प्रबन्ध मिलाइने उनले बताए । सुरक्षा अधिकारीका अनुसार निर्वाचन सामाग्री लैजाने र मतदानसँगै मतदानपश्चात सुरक्षा व्यवस्था प्रबन्ध, जनशक्ति व्यवस्थापन आदिको प्रबन्ध संवेदनशीलताका आधारमा गरिने सुरक्षा समितिले जनाएको छ ।

सबैजसो स्थानीय तहका केही मतदानस्थल एवं केन्द्र अतिसंवेदनशील सूचीमा रहेका छन् । योसँगै संवेदनशीलताका आधारमा चारवटै सुरक्षा निकाय एकसाथ परिचालन गर्ने नीति बनाइएको प्रमुख जिल्ला अधिकारी उपाध्यायले बताए । सुरक्षा समितिका अनुसार हरेक स्थानीय तहमा नेपाली सेना, सशस्त्र प्रहरी र नेपाल प्रहरीको उपस्थित हुनेछ । पहिलो घेराभित्र रहेको सुरक्षा निकायभित्र ३० मिनेटभित्रै ब्याक फोर्स पुग्ने व्यवस्था गरिने समितिले जनाएको छ ।

प्रकाशित : आश्विन २०, २०७९ १४:१३
पूरा पढ्नुहोस्
प्रतिक्रिया
पठाउनुहोस्
×