रसुवागढी नाकाबाट दुईतर्फी व्यापार र आवागमन सुरु गर्न चीनलाई नेपालको आग्रह- वाग्मती - कान्तिपुर समाचार

रसुवागढी नाकाबाट दुईतर्फी व्यापार र आवागमन सुरु गर्न चीनलाई नेपालको आग्रह

बलराम घिमिरे

रसुवा — रसुवागढी नाकाबाट दुईतर्फी व्यापार र आवागमन सुचारू गर्न नेपालले चिनियाँ पक्षलाई अनुरोध गरेको छ । बुधबार नेपाल र चीनका प्रतिनिधीबीच भर्चुअल माध्यमबाट भएको काउन्टरपार्ट बैठकमा नेपाली पक्षले चिनियाँ अधिकारीहरूलाई रसुवागढी नाका दुईतर्फी रुपमा सञ्चालन गर्न अनुरोध गरेको रसुवाका प्रमुख जिल्ला अधिकारी नवराज जैसीले बताए ।

बैठकमा नेपाली पक्षले चीन सरकारको अनुदानमा रसुवाको टिमुरेमा निर्माणाधीन सुक्खा बन्दरगाहलाई आवश्यक प्रक्रिया पूरा गरी छिट्टै निर्माण सम्पन्न गर्न आग्रह गरेको छ । त्यस्तै चिनियाँ सरकारले निर्माण गर्ने स्याफ्रुबेँसी-रसुवागढी सडकखण्डको निर्माण थालनी यथाशक्य चाँडो सुरु गरिदिन आग्रह गरेको छ ।

चीनको केरुङमा व्यापार व्यावसाय गरेका केही नेपालीहरू कोभिड-१९ का कारण भएको लकडाउनपछि केरुङ फर्किन नपाएको र अहिलेसम्म पनि केरुङमा घरभाडा तिर्नु परिरहेको गुनासोको सम्बन्धमा आवश्यक सहजीकरण गरिदिन चिनिया पक्षसँग अनुरोध गरिएको प्रजिअ जैसीले बताए ।

मित्रराष्ट्र चीनको तर्फबाट पनि बैठकमा विभिन्न विषयहरू प्रस्तुत गरिएका थिए । नेपाल र चीनबीच सौहार्दपूर्ण सम्बन्ध कायम रहेकोमा खुसी व्यक्त चिनियाँ पक्षले सीमा सुरक्षा तथा स्थिरताका लागि विशेष निगरानी र सतर्कता अपनाइदिन नेपाली पक्षलाई अनुरोध गरेको छ । यसैगरी बैठकमा सीमापार अपराध नियन्त्रणका लागि आवश्यक सहयोग, समन्वय सहजीकरण गरिदिन नेपाली पक्षसँग आग्रह गरेका छन् ।

नेपाल सरकारको तर्फबाट जिल्ला प्रशासन कार्यालय रसुवाका प्रमुख जिल्ला अधिकारी जैसी र मित्रराष्ट्र चीन सरकारको तर्फबाट सीमा तथा अध्यागमन प्रमुख वाङ सिहोङले भर्चुअल बैठकको नेतृत्व गरेका थिए ।

प्रकाशित : आश्विन १२, २०७९ १९:०७
प्रतिक्रिया
पठाउनुहोस्

पासाङ ल्हामु मार्गको बनुवा घुम्ती नजिकै सवारी साधन फस्ने समस्या बढ्दै

बलराम घिमिरे

रसुवा — रसुवाको उत्तरगया गाउँपालिका ५ बनुवा घुम्ती नजिकै पासाङ ल्हामु मार्गमा दिनहुँ सवारी साधन फस्ने समस्या बढेको छ । पहिरोका कारण गत साउन २५ गतेदेखि अवरुद्ध पासाङ ल्हामु मार्ग पुन: सञ्चालनमा आए पनि उक्त स्थानमा सवारी साधन फस्ने समस्या देखापरेको हो ।

सडक निर्माण गरिएको स्थानमा हिलो भएको कारण सडक भासिँदा सवारी साधन फस्ने गरेको हो । दिनहुँ सवारी साधन बाटोमै फसेर सडक अवरुद्ध हुने गरेको छ । सडकमा सवारी फस्दा चीनबाट आयात भएका सामग्री राजधानी लैजान, जिल्लामा सञ्चालित विकास निर्माणका सामग्री भित्र्याउन तथा चाडबाडको समयमा खाद्य सामग्री ढुवानी गर्न समस्या भएको छ ।


अवरुद्ध सडक खुलाउन हिलोमा फसेका सवारी साधनललाई यात्रु तथा चालकहरूले धकेल्ने र डोरीले तानेर निकाल्ने गर्दै आएका छन् । सडक निर्माण भए पनि राम्रोसँग ग्राभेल हुन नसकेको भन्दै यात्रु र चालकहरू आक्रोशित भएका छन् ।

उक्त स्थानमा गत साउन २४ गते रातिको अविरल वर्षाले पहिरो जाँदा सडकमा क्षति पुगेको थियो । पहिरोले उत्तरगया गाउँपालिका-५ नौबिसे र बनुवा घुम्तीमा रहेका घरहरू जोखिममा परेका थिए ।

प्रकाशित : आश्विन १२, २०७९ १६:३६
पूरा पढ्नुहोस्
प्रतिक्रिया
पठाउनुहोस्
×