धादिङमा बजार अनुगमन तीव्र- वाग्मती - कान्तिपुर समाचार

धादिङमा बजार अनुगमन तीव्र

सरिता श्रेष्ठ

धादिङ — धादिङका होटल तथा खाद्यान्न पसलमा अनुगमन तीव्र पारिएको छ । चाडपर्व आउनुपूर्व हरेक वर्षजस्तै यस वर्ष पनि अनुगमन कार्यलाई तीव्रता दिइएको जिल्ला प्रशासन कार्यालय धादिङले जनाएको छ । प्रशासन कार्यालय र जिल्ला घरेलु कार्यालय धादिङको संयुक्त आयोजनामा जिल्लाको राजमार्ग क्षेत्र, धादिङबेसी बजार क्षेत्र तथा ग्रामीण क्षेत्रका बजार अनुगमन गरिएको हो ।

अनुगमनका क्रममा सोमबार पृथ्वी राजमार्गअन्तर्गत गजुरी, बेनिघाट रोराङ र सिद्धलेक गाउँपालिकामा सञ्चालित होटल, पसल, कोल्ड स्टोर्स तथा सप्लायर्सहरूलाई जरिवानासमेत गरिएको छ । चारवटा होटल तथा खाजाघर, आठवटा सप्लायर्स तथा किराना पसल गरी १२ वटा फर्महरूको अनुगमन गरिएको थियो । अनुगमनका क्रममा करिब १५ हजार ६ सय रुपैयाँ बराबरको म्याद गुज्रेका र अखाद्य वस्तुहरू जफत गरी नष्ट गरिएको छ ।

अनुगमन समितिले मापदण्डविपरीत सञ्चालनमा आएका राजमार्ग क्षेत्रका ६ वटा पसललाई कारबाहीस्वरुप जरिवाना गराएको छ । बेनिघाट रोराङ ३, शीतल बजारमा सञ्चालित होटल तीन भाइलाई १० हजार, भैरवीनाथ भोजनालयलाई २० हजार, श्रवण होटललाई ५ हजार, गजुरी गाउँपालिका २ मा सञ्चालित दनै सप्लायर्सलाई ५ हजार, रावल सप्लायर्सलाई ५ हजार र सिद्धलेक गाउँपालिका १ बैरेनीको वारीपारी इन्टरप्राइजेजलाई ५ हजार रुपैयाँ जरिवाना तिराइएको छ ।

अनुगमन टोलीले जिल्लाको नेत्रावती डबजोङ, त्रिपुरासुन्दरी गाउँपालिकामा पनि अनुगमन गरिएको छ । नेत्रावती डबजोङ ३ र ४ मा ८ वटा किराना पसल र एउटा होटलमा अनुगमन गरिएको छ । ९ वटा फर्ममा गरिएको अनुगमनमा १० हजार २ सय रुपैयाँ बराबरको म्याद गुज्रेका तथा सडेगलेका सामानहरूसमेत जफत गरिएको छ । अनुगमनका क्रममा जे.पी. श्रेष्ठ इन्टरप्राइजेजलाई १० हजार, श्रेष्ठ स्टोर्सलाई ५ हजार, सामरी सप्लायर्सलाई ५ हजार र प्रेमिका किराना स्टोर्सलाई ५ हजार रुपैयाँ जरिवाना तिराइएको छ ।

त्रिपुरासुन्दरी गाउँपालिका २ को कमल किराना स्टोरलाई ५ हजार, सुमन फार्मेसीलाई ५ हजार रुपैयाँ जरिवाना तिराइएको छ । ग्रामीण क्षेत्रमा सञ्चालित किराना पसलहरूमा म्याद गुज्रिएका सामानहरू बढी भेटिने गरेका छन् । कारबाहीमा परेका होटलहरूले निर्धारित मूल्यभन्दा बढी रकम लिएको; सरसफाइमा ध्यान नदिएको पाइएकाले जरिवाना तिराइएको जिल्ला प्रशासन कार्यालय धादिङले जनाएको हो । उपभोक्तालाई सचेत बन्न र गुनासो गर्ने बानी बसाल्न जिल्ला अनुगमन टोलीले आग्रहसमेत गरेको छ ।

आफ्ना व्यवसायहरू दर्ता गरी व्यवस्थित रुपमा सञ्चालन गर्न धादिङ उद्योग वाणिज्य संघ र स्थानीय तहहरूले पनि अनुरोध गरिरहेका छन् । नीलकण्ठ नगरपालिका ३ का वडाध्यक्ष राजकुमार श्रेष्ठले आफ्ना व्यवसाय स्थलमा सबैले देख्ने ठाउँमा मूल्यसूची राख्न, म्याद नाघेको तथा अखाद्य सामान बिक्री नगर्न अनुरोध गरेको छ । ‘ढक तराजु अनिवार्य प्रमाणित गरेको हुनुपर्छ’, उनले भने, ‘चाडपर्वमा भीडभाड हुने र दैनिक उपभोग्य सामानहरूको मूल्य बढाइने भएका कारण सचेत रहनुपर्छ ।’

चाडपर्वको मौका छोपेर विशेष त पृथ्वी राजमार्गअन्तर्गत धादिङ जिल्लामा सञ्चालित होटलहरूले खाना, खाजाको मूल्य बढी लिने गरेको गुनासो यात्रुहरूले गर्दै आइरहेका छन् । बढी नै मूल्य तिरे पनि स्वच्छ, ताजा र गुणस्तरको वस्तु तथा चीजहरू खान पाएका छैनन् । गत भदौ दोस्रो साता १८ वटा होटल तथा खाजा घरहरूको अनुगमन गरिएकोमा ११ वटा होटललाई कारबाही गरिएको थियो । जिल्लाका विभिन्न स्थानमा अखाद्य वस्तुको बिक्री भएको; तोकिएको मूल्यभन्दा बढी रकम लिएको र सरसफाइमा ध्यान नदिएको भन्ने गुनासो आएपछि बजार अनुगमनलाई तीव्रता दिइएको बताइएको छ ।

प्रकाशित : आश्विन ११, २०७९ १८:०४
प्रतिक्रिया
पठाउनुहोस्

भारतमा बन्ने भयो आइफोन १४

प्रिमियम ब्रान्ड किन्ने ट्रेन्ड भारतमा पनि
कान्तिपुर संवाददाता

काठमाडौँ — एप्पलले आफ्नो पछिल्लो उत्पादन आइफोन १४ भारतमा बनाउने घोषणा गरेको छ । विख्यात अमेरिकी प्रविधि कम्पनी एप्पलले आफ्ना केही प्रोडक्सन युनिट चीनबाट निकालेसँगै भारतमा उत्पादन प्रारम्भ गर्ने बताएको हो ।

‘आइफोन १४ मा हामीले अभूतपूर्व नयाँ प्रविधिहरू र महत्वपूर्ण सुरक्षा प्रबन्ध समावेश गरेका छौं,’ सोमबार सार्वजनिक गरिएको विज्ञप्तीमा एप्पलले भनेको छ, ‘भारतमा आइफोन १४ बनाउन पाउँदा हामी उत्साहित छौं ।’ एप्पलको प्रमुख आइफोन असेम्ब्लर (पाटपुर्जा एकत्रित गरेर सामान बनाउने कम्पनी), फक्सकनले चेन्नइ नजिकको श्रीपेरुम्बडुर भन्ने ठाउँमा अवस्थिति कारखानाबाट आइफोन १४ बनाउन लागेको छ ।

एप्पलले सन् २०१७ देखि भारतमा आइफोन बनाउन थालेको थियो । तर, यसअघि सँधै पूराना मोडल मात्रै असेम्बल गर्ने गरिएकोमा यसपाली पहिलो पटक नयाँ तथा प्रिमियम मोडल बनाउन लागिएको हो । कम्पनीले हालै मात्र क्यालिफोर्नियास्थित मुख्यालयबाट एप्पल १४ सावर्जनिक गरेको थियो । भारतमा बनेका फोनहरू विश्व बजारमा विक्रि गर्ने कम्पनीले जानकारी दिएको छ ।

अबको केही दिनमै भारतमा बनेका आईफोन १४ स्थानीयबासीले किन्न पाउनेछन् । कुल उप्पादनको ५ प्रतिशत आईफोन १४ भारतमा निर्माण गरिने अनुमान गरिएको छ । सन् २०२५ सम्ममा एप्पलले कुल उत्पादनको २५ प्रतिशत आइफोनहरू भारतमा असेम्बल गर्ने लक्ष्य लिएको बताइन्छ । चीनभन्दा बाहिर उत्पादन क्षमता बढाउन र भारतीय उपभोक्तालाई आकर्षित गर्न एप्पलले यो कदम चालेको विज्ञहरूको भनाइ छ । एप्पलका आइफोनहरू अझै पनि सबैभन्दा धेरै चीनमा बन्ने गरेका छन् ।

कोभिड महामारी रोकथामका लागि चीनमा अझै लकडाउन जारी रहेकाले त्यहाँका कारखानाबाट भनेजति काम हुन सकेका छैनन् । यसले एप्पलको वितरण प्रणालीलाई प्रभाव पारिरहेको बताइन्छ । भारतले भने विद्युतीय उपकरणहरूको स्थानीय उत्पादन वृद्धि गर्न सहुलियत सुविधा दिएको छ । विश्वको दोस्रो ठूलो स्मार्टफोन बजारका रूपमा रहेको भारतमा एप्पलले विक्रि विस्तार गर्न खोजिरहेको थियो । गत वर्ष भारतमा एप्पललको ३.८ प्रतिशत मात्रै बजार हिस्सा थियो । सामसङ र साओमीका कम मूल्यका फोनको त्यहाँ दबदबा छ ।

अल्ट्रा–प्रिमियम सेगमेन्ट (महँगा फोन) मा भने आइफोन नै भारतमा सबैभन्दा धेरै विक्रि हुने फोनमा पर्छ । ४५ हजार भारतीय रुपैयाँभन्दा बढी मूल्यका आइफोनहरू रुचाइने गरिएको छ । ‘भारतमा एप्पलको बलियो माहोल छ,’ काउन्टरप्वाइन्ट रिसर्चका अनुसन्धाता तरुण पाठकले सीएनबीसीसँग भनेका छन्, ‘प्रिमियम ब्रान्ड किन्ने ट्रेन्ड चलिरहेका विश्वका बीसभन्दा देशमध्ये भारत पनि एक हो ।’

प्रकाशित : आश्विन ११, २०७९ १७:५६
पूरा पढ्नुहोस्
प्रतिक्रिया
पठाउनुहोस्
×