हेटौंडाको डाटा सेन्टरमा लागेको आगो निभाइयो

जिल्ला प्रहरी कार्यालय मकवानपुरका प्रहरी निरीक्षक रामचन्द्र घिमिरेका अनुसार दिउँसो ३ बजेबाट लागेको आगो साँझ करिब ५ बजे पूर्ण रुपमा नियन्त्रणमा आएको हो ।

आगो निभाउन हेटौंडा उपमहानगरका दुईवटा दमकलसहित नेपाली सेना, वडा प्रहरी कार्यालय, जिल्ला प्रहरी कार्यालय, वाग्मती प्रदेश प्रहरी कार्यालय र हेटौंडा उपमहानगरको नगर प्रहरीको टोली परिचालन गरिएको थियो । आगलागीबाट भएको क्षतिको विस्तृत विवरण भने आइनसकेको प्रहरीले जनाएको छ ।

सेन्टरलाई राष्ट्रिय सूचना प्रविधि केन्द्र सिंहदरबारको ‘ब्याकअप’को रुपमा प्रयोग गरिँदै आएको थियो । करिब साढे तीन वर्ष अगाडिदेखि यस सेन्टर सञ्चालनमा आएको हो । आगलागीका कारण कार्यालयबाट प्रवाह हुने सम्पूर्ण सेवा पूर्ण रुपमा बन्द गरिएको इञ्जिनियर अभिनाष झाले जानकारी दिए ।

‘आगलागीबाट के कति क्षति भएको छ भन्ने थाहा भएको छैन । हाम्रो कार्यालयबाट हुने सबै सेवा हाललाई अवरुद्ध भएको छ । धेरै सरकारी कार्यालयहरूको सर्भर डाउन हुन सक्छ । हामी हाम्रो सेवालाई रिकभर गरेर छिटोभन्दा छिट्टो बन्द भएको सर्भरहरू सञ्चालन गर्ने कोसिस गर्नेछौं,’ उनले भने ।