बीपी राजमार्गमा खाल्डैखाल्डा- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

बीपी राजमार्गमा खाल्डैखाल्डा

कान्तिपुर संवाददाता

सिन्धुली — सवारी चाप, क्षमताभन्दा बढी भारका साधन र न्यून गुणस्तरको चलाउँदा बीपी राजमार्गको बनेपा–बर्दिबास खण्डमा खाल्डैखाल्डा भएका छन् । चार महिना अगाडि टालटुल पारिएका खाल्डा फेरि उस्तै बनेका छन् । बर्खा अगाडि मर्मत भएको नेपालथोक–धुलिखेल चौथो खण्डमा ५० किलोमिटर पार गर्न तीन घण्टाभन्दा बढी समय लाग्ने गरेको चालकको गुनासो छ ।

‘पुल नभएको ठाउँमा त खाल्डाखुल्डी छँदै थियो, अहिले धेरैजसो स्थानमा कालोपत्र उप्किएर सडक भत्किएको छ,’ बोलेरो चालक गीता पहाडीले भने, ‘डेढ घण्टा लाग्ने ३० किलोमिटर पार गर्न तीन घण्टाभन्दा बढी समय लाग्छ ।’ बर्दिबादेखि सिन्धुली, सिन्धुलीमाडी–खुर्कोट, खुर्कोट–नेपालथोक खण्डमा पनि धेरै ठाउँमा खाल्डाखुल्डी हुनुका साथै सडक भत्किएको छ । खुर्कोट बजारनजिक सुनकोसीले सडक झार्दा एकतर्फी बनाइएको छ ।

सवारी व्यवस्थापन र समयमा उचित मर्मत सम्भार नहुँदा राजमार्गमा दुर्घटना बढ्ने र चाडबाडमा हुने चापमा धेरै समय लाग्ने स्थानीय कृष्णहरि घिमिरे बताउँछन् । उनी भन्छन्, ‘सवारी चाप बढ्दो छ, सडक साँघुरो र खाल्डा भएकाले दुर्घटना खतरा भएको हो ।’ अत्यधिक सवारी चाप र सडक मर्मतलाई ध्यान नदिँदा बीपी राजमार्ग कुरूप बन्न थालेको छ । राजमार्गसँग जोडेर भवन निर्माण गर्ने क्रममा घडेरी खार्दा पनि खाल्डैखाल्डा भएका छन् । २६ अर्ब लगानीमा उक्त राजमार्ग बनाएको हो । पछिल्लो समय सुनकोसी आसपासमा क्रसर उद्योग खुल्नेक्रम बढेसँगै राजमार्गमा टिपरसमेत धेरै गुड्न थालेका छन् । बर्दिबास–सिन्धुली–बनेपा सडक आयोजनाका प्राविधिक रमेश आचार्यका अनुसार वर्षाले क्षति पुगेको सडकमा खाल्डाखुल्डी भएका कतिपय स्थानमा मर्मतको काम भइरहेको बताउँछन् ।

प्रकाशित : आश्विन ९, २०७९ ०७:०६
प्रतिक्रिया
पठाउनुहोस्

होटलमा अवैध गतिविधि, मापदण्ड मान्न अटेर

ग्राहकको इमेल ठेगानासँगै परिचय खुल्ने प्रमाणपत्रसहित फाराम भराउनुपर्ने, विदेशीको हकमा पासपोर्टको फोटोकपी अनिवार्य
ग्राहक होटलमा प्रवेश गरेको र फर्किएको समयसमेत राख्नुपर्ने
लिला श्रेष्ठ

काठमाडौँ — २०७५ असोज १ मा काठमाडौंको स्युचाटारबाट हराएकी २१ वर्षीय एक युवती कलंकीको होटलमा बलात्कृत भइन् । परिवारका सदस्यले उनी हराएको निवेदन प्रहरीमा दिएपछि खोजतलास गर्दा उनलाई तीन जनाले होटलमा लगेर सामूहिक बलात्कार गरेको पुष्टि भयो । २०७७ साउन २९ मा कलंकीकै होटलमा अर्की युवतीलाई फेसबुकमार्फत सामान्य चिनजानका युवकले जबर्जस्ती बलात्कार गरे । 

२०७९ जेठ २९ मा बौद्धको एक होटलमा २४ वर्षीय युवतीमाथि तीन जनाले सामूहिक बलात्कार गरेका थिए । प्रहरी अनुसन्धानमा ती युवतीलाई दरबारमार्गबाट जबर्जस्ती होटल पुर्‍याएर बलात्कार गरिएको अनुसन्धानमा खुल्यो । उक्त घटनामा होटल सञ्चालकको नै मिलेमतो देखिएपछि उनलाई प्रतिवादी बनाएर मुद्दा चलाइएको थियो ।

किशोरी तथा युवती/महिलालाई होटलमा पुर्‍याएर जबर्जस्ती बलात्कार गरिएका यी प्रतिनिधिमूलक घटना हुन् । कतिपय यस्ता अपराधमा होटल/रेस्टुराँ सञ्चालकको संलग्नता पनि खुलेका छन् । गृह मन्त्रालय र संस्कृति, पर्यटन तथा नागरिक उड्डयन मन्त्रालय, जिल्ला प्रशासन कार्यालय लगायतबाट बनाइएका होटल/रेस्टुराँ तथा रात्रि व्यवसाय सञ्चालनसम्बन्धी मापदण्ड तथा प्रशासनबाट जारी गरिएका निर्देशनमा कोही होटलमा आएमा स्थायी/अस्थायी ठेगाना खुल्ने परिचयपत्र/कागजात राख्नुपर्ने प्रावधान छ । त्यस्ता प्रावधान राख्नुको उद्देश्य होटल/रेस्टुराँलाई व्यवस्थित र मर्यादित बनाउनका लागि हो । तर, जबर्जस्ती करणी, यौन दुर्व्यवहार तथा अन्य आपराधिक गतिविधि र योजना होटल/रेस्टुराँबाटै हुने गरेका घटना बाहिरिँदै जाँदा त्यहाँका गतिविधिमाथि सरकारी नियमन नभएको देखिन्छ ।

त्यसो त होटल/रेस्टुराँले सरकारले बनाएका मापदण्डसमेत पालना गरेको देखिँदैन । २०७९ भदौ ५ मा राष्ट्रिय क्रिकेट टोलीका तत्कालीन कप्तान सन्दीप लामिछानेले एक नाबालिग किशोरीलाई गौशालाको होटलमा लगेर जबर्जस्ती करणी गरेको उजुरी प्रहरीमा दर्ता भयो । उक्त जाहेरीमाथि प्रहरीले अनुसन्धान गरिरहेको छ । होटलमा बास बस्न आउनेसँग हरेकका परिचय र नातासम्बन्ध खुलाएर अभिलेख राख्नुपर्ने प्रावधान सरकारले यसअघि पटक–पटक ल्याएको थियो । त्यस दिन सन्दीपले किशोरीलाई होटलमा लगेकोबारे बुझ्दा होटलका कर्मचारी बोल्नै चाहेनन् । प्रहरी स्रोतका अनुसार लामिछानेले किशोरीसँग आफ्नो सम्बन्ध र परिचयपत्र खुल्ने कागजात नखुलाई बसेका थिए ।

गृह मन्त्रालयका प्रवक्ता फणीन्द्रमणि पोखरेलले होटल/रेस्टुराँलगायत व्यवसायलाई व्यवस्थित, मर्यादित र अनुशासित बनाउन तथा सरकारले तोकेका कार्यविधि/मापदण्ड पालनामा सम्बन्धित होटल/रेस्टुराँ सञ्चालक, जिल्ला प्रशासन, प्रहरी र स्थानीय सरकार जिम्मेवार बन्नुपर्ने बताए । उनले आफू जोखिममा छु भन्ने लागेमा अपराध नहुँदै पीडितले घटनाबारे सुरक्षा निकाय र त्यहीकै आन्तरिक सुरक्षा संयन्त्रलाई जानकारी गराउन सक्ने तर यसमा कसैको ध्यान नगएको बताए । ‘घटना भएको लामो समयपछि मात्रै उजुरी आउँदा तथ्य/प्रमाण नष्ट हुन सक्ने जोखिम रहेकोले यसबारे पीडित पक्ष अझ बढी सचेत हुनुपर्ने र समयमै कानुनी कारबाहीका लागि जानुपर्ने हो, तर यहाँ अपराध भइसकेपछि मात्रै घटना बाहिर आउने क्रम बढी देखियो ।’

सरकारबाट जारी गरिएका होटल/रेस्टुराँ तथा रात्रिकालीन व्यवसाय सञ्चालनसम्बन्धी मापदण्डका प्रावधान पालना मात्रै भए पनि यस्ता अपराध न्यूनीकरणमा सहयोग पुग्ने देखिन्छ । त्यसका लागि प्रशासन, स्थानीय तह र सम्बन्धित पालिका तथा व्यवसाय सञ्चालन गर्ने बढी जवाफदेही भने हुनुपर्छ । होटल सञ्चालकले व्यवसाय गर्दा आफ्नो कर्तव्य, जिम्मेवारी र नागरिकको सुरक्षालाई बेवास्ता गर्दै मापदण्डलाई समेत ख्याल गरेका छैनन् । होटलमा हुने यस्ता अपराध रोकथाम र न्यूनीकरणमा होटल सञ्चालक जवाफदेही र गम्भीर नबनेका तथ्य प्रहरीमा परेका उजुरीबाट पनि स्पष्ट हुन्छ ।

गृह मन्त्रालयले गत वर्ष जारी गरेको मापदण्डमा होटल सञ्चालकले होटलमा आउने ग्राहकको परिचय खुल्ने प्रमाणपत्रसहित व्यक्तिगत विवरणको फाराम भराउनुपर्छ । विदेशीको हकमा पासपोर्टको फोटोकपी अनिवार्य राख्नुपर्ने प्रावधान छ । इमेल ठेगाना सहितको ग्राहकको व्यक्तिगत विवरण, होटलमा प्रवेश गरेको र फर्किएको समयसमेत राख्नुपर्ने हुन्छ । यसप्रति व्यवसायीले अटेर गरेका छन् ।

होटल एसोसिएसन नेपाल (हान) का सचिव साजन शाक्यले होटलमा बास बस्न आउने ग्राहक (जोडी) विवाहित वा नजिकको नाता (परिवार, आफन्त, सँगी) खुल्ने परिचयपत्र हुन आवश्यक रहेको बताए । व्यक्तिगत परिचय खुल्ने प्रमाणलाई कडाइ नगर्दा पछिल्लो समय होटलमा यौनजन्य अपराधका घटनाहरू बढेको तथ्य फेला परेको उनको भनाइ छ । नगरकोट नाल्दुम पर्यटन विकास समितिका अध्यक्ष नवीन गुरुङले भने नगरकोट आएर होटलमा बस्न चाहने ग्राहक (पाहुना) को व्यक्तिगत विवरणपछि मात्र होटलमा प्रवेश गर्ने गरेको बताए । ‘विद्यालय/कलेज पोसाकमा आएका व्यक्तिलाई होटलमा बास बस्ने गरी प्रवेश गराइएको छैन, सबै होटललाई परिचय खुल्ने विवरण, सँगै आउने व्यक्तिको नातासम्बन्ध, कार्यक्रमको उद्देश्य खुलेपछि मात्र प्रवेश गराउन संघको निर्देशन छ ।’

सरकारले १८ वर्ष मुनिका बालबालिकालाई मादक पदार्थ तथा सुर्तीजन्य पदार्थ प्रयोगमा रोक लगाएको छ । डान्सबार, रेस्टुरेन्ट एन्ड बार, लाइभ ब्यान्ड, लाउन्ज बारलगायतमा बालबालिकालाई प्रवेश निषेध गरिएको छ । तर, १८ वर्षमुनिका बालबालिका/किशोरीलाई प्रतिष्ठित कहलिएकै व्यक्तिले होटलसम्म पुर्‍याएर जबर्जस्ती करणी गरेको, बालयौन दुराचारका घटनामा समेत होटल सञ्चालक, प्रशासन, प्रहरीलगायत सम्बन्धित निकाय बेखबर छ । अनुगमन शून्य छ । पीडितले प्रहरीमा उजुरी गरेपछि मात्र होटलमा आपराधिक गतिविधि हुने गरेको पुष्टि हुन्छ । केही वर्षअघि सुन्दरी प्रतियोगितामा सहभागी एक युवतीलाई होटलमा पुर्‍याएर नशालु पदार्थ सेवन गराई जबर्जस्ती करणी गर्ने कन्सल्टेन्सी सञ्चालक तथा कार्यक्रम आयोजक मनोज पाण्डे गत जेठ ७ मा पक्राउ परेका थिए ।

यस्ता हरेक घटनामा आरोपित मात्र नभई घटना घटाइएको स्थान होटलको समेत सूक्ष्म अनुसन्धान र छानबिन हुनुपर्ने अधिवक्ता मीरा ढुंगाना बताउँछिन् । ‘कतिपय होटलले विवाह दर्ताको कार्डसमेत मागेको रेकर्ड पनि छ,’ उनले भनिन्, ‘यौनजन्य हिंसा, अपराध न्यूनीकरणका लागि होटल सञ्चालक पनि जिम्मेवार हुन आवश्यक छ । होटलको पनि आफ्नै नियम, निर्देशिका होलान्, पालना हुनुपर्छ ।’ सम्बन्धित निकायले अनुगमन गरी नियम कार्यान्वयन गराउनुपर्ने उनी बताउँछिन् ।

काठमाडौंका प्रमुख जिल्ला अधिकारी घनश्याम उपाध्याय क्रिकेटर लामिछाने जोडिएको घटना र होटलको विषयमा प्रहरीले अनुसन्धान गरिरहेको भन्दै पन्छिएका छन् । नाबालिकामाथिको जबर्जस्ती करणी घटनामा सम्बन्धित होटल पनि जिम्मेवार हुन्छ तर आरोपित नै पत्ता नलागेको अवस्थामा जवाफ दिन उपयुक्त नभएको उनले बताए । उनले व्यवसाय सञ्चालन गर्दा तोकिएका मापदण्ड र सर्त पालना गर्नु सम्बन्धित सबै पक्षको दायित्व रहेको बताए । प्रशासनले पनि यसमा आफैं र सुरक्षाकर्मीमार्फत नियमन, अनुगमन र निगरानी गर्ने गरेको उनको भनाइ छ ।

प्रकाशित : आश्विन ९, २०७९ ०७:०५
पूरा पढ्नुहोस्
प्रतिक्रिया
पठाउनुहोस्
×