चितवन निकुञ्ज ५० वर्षमा

दुर्लभ वन्यजन्तु एकसिंगे गैंडा र पाटे बाघ संरक्षणका लागि चितवन निकुञ्ज स्थापना भएको हो । बाघ र गैंडाको मुख्य बासस्थल चितवन निकुञ्ज बनेको छ । ‘यसको सफलताले नेपालभित्र अन्यत्र पनि संरक्षण गतिविधि सञ्चालित छन्,’ निकुञ्जका प्रमुख संरक्षण अधिकृत हरिभद्र आचार्यले भने ।

नेपालभर ७ सय ५२ गैंडा रहेकोमा चितवन निकुञ्ज र आसपासको क्षेत्रमा सबैभन्दा धेरै ६ सय ९४ गैंडा छन् । त्यसैगरी देशभरका वन र निकुञ्ज आरक्षमा ३ सय ५५ बाघ रहेकोमा चितवन निकुञ्जमा सर्वाधिक १ सय २८ बाघ छन् । अन्य जीवजनावर पनि निकुञ्जका कारण जोगिएका छन् ।

‘वन्यजन्तु संरक्षणका साथै स्थानीयसँग सहकार्यका लागि मध्यवर्तीको अवधारणा पनि चितवनमै सबैभन्दा पहिला लागू भएको हो,’ आचार्यले भने । चितवन निकुञ्ज वन्यजन्तु अवलोकनका लागि देशको पहिलो पर्यटकीय गन्तव्य हो ।