पहिरोले पोल ढलेपछि धादिङमा विद्युत् अवरुद्ध- वाग्मती - कान्तिपुर समाचार

पहिरोले पोल ढलेपछि धादिङमा विद्युत् अवरुद्ध

सरिता श्रेष्ठ

धादिङ — पहिरोले विद्युत् पोलमा क्षति पुगेपछि तारुघाट – धादिङबेसी ३३ केभी प्रसारण लाइन खण्ड अवरुद्ध भएको छ । जसकारण धादिङबेसी आसपासका क्षेत्रका बासिन्दा प्रभावित बनेका छन् ।

देवीघाट सवस्टेशनबाट आएको तारुघाट – धादिङबेसी ३३ केभी प्रसारण लाइन खण्डमा सोमबार बिहान तारुकाको दोभानेमा पहिरो गएर पोल र तारमा क्षति पुगेको विद्युत कार्ययल धादिङले जनाएको छ ।

विद्युत कार्यालय धादिङका अनुसार पहिरोले २ वटा पोल भाँचिएका छन् । १० वटा विद्युत पोलमा क्षति पुगेको छ। तारहरु चुँडिएका छन्।

सडकको पहुँचमार्ग नभएको ठाउँमा पोल नै भाँचिएकोले तत्काल मर्मत गर्न सकिने अवस्था नभएको बताइएको छ । नयाँ लाइन बनाउनुपर्ने भएकोले विद्युत सेवा पुन सञ्चालन गर्न करिब २ दिन लाग्ने विद्युत कार्यालय धादिङले जनाएको छ।

प्रकाशित : श्रावण ३०, २०७९ १६:०५
प्रतिक्रिया
पठाउनुहोस्

आगामी चुनावमा एमालेले बहुमत ल्याउँछ : पोखरेल

कान्तिपुर संवाददाता

काठमाडौँ — प्रमुख प्रतिपक्ष दल नेकपा (एमाले)का वरिष्ठ उपाध्यक्ष ईश्वर पोखरेलले मंसिर ४ गते हुने प्रतिनिधिसभा र प्रदेशसभा निर्वाचनमा आफ्नो पार्टीले बहुमत ल्याउने दाबी गरेका छन् । 

स्थानीय तह निर्वाचनमा जनताको लोकप्रिय मत पाएको दाबी गर्दै एमालेले आगामी प्रतिनिधिसभा र प्रदेशसभा निर्वाचनमा बहुमत ल्याउने वरिष्ठ उपाध्यक्ष पोखरेलको तर्क थियो ।

पार्टीनिकट विद्यार्थी संगठन अनेरास्ववियूले सोमबार काठमाडौंमा आयोजना गरेको एक कार्यक्रममा बोल्दै उनले उम्मेदवार तय गर्दा व्यवस्थापकीय कमजोरी भएका कारण स्थानीय तह निर्वाचनमा आफ्नो पार्टी पहिलो शक्ति बन्न नसकेको उल्लेख गर्दै अब हुने प्रतिनिधिसभा र प्रदेशसभा निर्वाचनमा आफ्नो पार्टीले त्यस्तो गल्ती नगर्ने प्रतिबद्धतासमेत व्यक्त गरे । जित्ने र टिक्नेहरुलाई मात्रै पार्टीले सो निर्वाचनमा उम्मेदवार बनाउने वरिष्ठ उपाध्यक्ष पोखरेलले बताए ।

‘आउने निर्वाचनमा नेकपा (एमाले)ले बहुमतका साथ प्रतिनिधिसभामा पनि आफ्नो प्रतिनिधित्व गर्छ । म यो तपाईंहरुलाई बताउनु चाहन्छु । अब तपाईंहरूको मनमा प्रश्न उठन सक्छ–हिजो स्थानीय तह निर्वाचनमा त भएन नि ? स्थानीय तह निर्वाचनमा हामीले जनताको सर्वाधिक लोकप्रिय मत प्राप्त गर्‍यौं । यो हाम्रो दाबी मात्रै होइन, निर्वाचन आयोगको बुलेटिनमा उल्लेख गरिएको कुरा हो । स्थानीय तह निर्वाचनमा उम्मेदवारी दिने सन्दर्भमा व्यवस्थापकीय कमजोरी भएकाले हामीले सोचेजस्तो परिणाम ल्याउन नसकेको हो । अब हामी आउने चुनावमा समयमै उम्मेदवारी दिन्छौं । जित्नेलाई उठाउँछौं, टिक्नेलाई उठाउँछौं । भदौ अन्तिमसम्म हामी चुनावको उम्मेदवारको टुंगो लगाउँछौं । अब बस्ने स्थायी समिति, पोलिटब्युरो र केन्द्रीय कमिटी बैठकले त्यसका लागि आवश्यक मापदण्ड तय गर्नेछ,’ उनले भने ।

वरिष्ठ उपाध्यक्ष पोखरेलले भदौंको अन्तिमसम्ममा आफ्नो पार्टीले प्रतिनिधिसभा र प्रदेशसभा निर्वाचनको उम्मेदवारसमेत तय गरिसक्ने बताए । मापदण्ड तय गर्न स्थायी समिति, पोलिटब्युरो र केन्द्रीय कमिटीको बैठक भदौ दोस्रो हप्ताका लागि तय गरिएको उनको भनाइ थियो ।

प्रकाशित : श्रावण ३०, २०७९ १६:०१
पूरा पढ्नुहोस्
प्रतिक्रिया
पठाउनुहोस्
x
×