मन्थलीमा जमिन धाँजा फाट्यो, ११ परिवार जोखिममा- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

मन्थलीमा जमिन धाँजा फाट्यो, ११ परिवार जोखिममा

टीकाप्रसाद भट्ट

रामेछाप — अविरल वर्षाले घरभन्दा माथिको जमिन धाँजा फाँटेर झर्न थालेपछि जोखिममा परेका रामेछापको मन्थली नगरपालिका १२ गेलुका ११ परिवार जोखिममा परेका छन् । घर माथिको जमिन सर्न थालेपछि ६ परिवारलाई अन्यत्र सारिएको छ । उनीहरुको वस्तुभाउ र खेती भने पहिरो बग्ने क्षेत्रमै रहेकाले आउजाउ भइरहेको छ ।

अन्य ५ परिवारलाई समेत तत्काल अन्यत्र सार्नुपर्ने अवस्था छ ।

जमिन फुटेर बस्तीतर्फ सर्न थालेको स्थानमा शुक्रबार प्रमुख जिल्ला अधिकारी एवं विपद् व्यवस्थापन समितिका अध्यक्ष दिपककुमार पहाडीलगायतको टोलीले अवलोकन गरेको छ । जमिनमा १ फिटसम्म चौडा धाँजा देखिएकोले नजिकै बसोबास गर्ने परिवारलाई सुरक्षित स्थानमा अस्थायी बसोबास गर्न पहाडीले निर्देशन दिएका छन् । उनले सरकारले उक्त क्षेत्रको भौगर्भिक सर्वक्षण गराई बस्ती स्थानान्तरणतर्फ आवश्यक पहल गर्ने बताए ।

मन्थली १२ का वडाध्यक्ष खिलेन्द्रबहादुर खत्रीले जोखिम क्षेत्रमा वसोबास गर्ने योगेन्द्र अधिकारी, कृष्णमाया अधिकारी, तोरण अधिकारी, केशव अधिकारी, भोजबहादुर अधिकारी र मोहन अधिकारीलाई तत्काल सुरक्षित जग्गा खोजेर बसोबास गराइएको र अन्यलाई पनि स्थानान्तरण गर्ने बताए । उनले नजिकै उनीहरुकै सुरक्षित जग्गा रहेकाले तत्कालका लागि बसोबास गर्न सामाग्रीको अभाव रहेको औंल्याए ।

यसैबीच गेलु ११ मा गेलु अस्पताल निर्माण गर्दाको बाहिरी पर्खाल भत्कँदा त्यसभन्दा तल रहेका २ परिवार उच्च जोखिममा छन् । अस्पतालभन्दा अगाडिको पर्खाल झरेर बस्तीतिर सरिरहेकोले थप जोखिमबाट जोगाउन तत्काल उक्त संरचना पुनर्निर्माण गर्नुपर्नेमा खत्रीले जोड दिएका छन् ।


प्रकाशित : श्रावण २०, २०७९ २२:०३
प्रतिक्रिया
पठाउनुहोस्

निजामती कर्मचारी अस्पतालमा साढे दुई वर्षदेखिको आन्दोलन फिर्ता

कान्तिपुर संवाददाता

काठमाडौँ — निजामती कर्मचारी अस्पताल र आन्दोलन चिकित्सक तथा कर्मचारीबीच सहमति भएको छ । अस्पतालका कार्यकारी निर्देशक डा विधाननिधि पौडेल, डाक्टर एसोसिएसन अफ सिभिल सर्भिस अस्पतालका अध्यक्ष डा सुमनबाबु मरठ्ठा र अस्पताल निजामति कर्मचारी युनियनका अध्यक्ष सन्तोष धिमालबीच तीन बुँदे सहमति भएको अस्पतालका आर्थिक तथा प्रशासन विभाग प्रमुख कृष्ण सापकोटाले जानकारी दिए । 

सहमतिअनुसार चिकित्सक र कर्मचारीले विगत साढे दुई वर्षदेखि आन्दोलन गर्दै आएको सबै कार्यक्रम फिर्ता भएका छन् । उनका अनुसार सहमतिअनुसार चिकित्सक र कर्मचारी संघले राखेका मागलाई सम्बोधनका लागि अस्पताल व्यवस्थापन समितिमा पेश गर्ने र कर्मचारीसँग सरोकार राख्ने विषयमा कर्मचारी संघसँग छलफल गरिनेछ ।

डाक्टर्स एसोसिएसन अफ सिभिल सर्भिस अस्पतालका अध्यक्ष डा मरठ्ठाले आफूले उठाएका माग सम्बोधन गर्ने भएपछि केही समयका लागि आन्दोलन स्थगित गरेको बताए । 'सर्वोच्च अदालतले पनि एकपटकका लागि सीमित आन्तरिक प्रतियोगिता गरी स्थायी गर्ने आदेश दिएको छ,' उनले भने, 'स्थायी गर्ने प्रक्रियामा अस्पतालले अगाडि बढाउने र हाम्रा अधिकांश माग पूरा गर्ने सहमति भएको छ ।' सहमतिपछि अस्पताललमा चिकित्सक र कर्मचारी संघले आफ्ना माग राखि टाँगिएको कालो ब्यानर हटाइएको छन् ।

विभिन्न आठ बुँदे माग राखी चिकित्सक र कर्मचारी आन्दोलनरत रहेका थिए ।


प्रकाशित : श्रावण २०, २०७९ २१:५५
पूरा पढ्नुहोस्
प्रतिक्रिया
पठाउनुहोस्
×