घरदैलोमै भत्ता र स्वास्थ्य परीक्षण - वाग्मती - कान्तिपुर समाचार
कान्तिपुर वेबसाईट
AdvertisementAdvertisement

घरदैलोमै भत्ता र स्वास्थ्य परीक्षण 

नगेन्द्र अधिकारी

काभ्रे — नमोबुद्ध नगरपालिकाले घरदैलोमै सामाजिक सुरक्षा वितरण थालेको छ । नगरले पूर्ण अशक्त वर्ग, बैंकिङ सेवासम्म पुग्न नसक्ने लाभग्राहीहरुलाई भत्ता वितरण गर्न वित्तीय संस्थाहरुसँग समन्वय र सहकार्य गरी स्थानीयस्तर र वडास्तरमै घुम्ती बैंकिङ सेवा उपलब्ध गराउने निर्णय गरेको थियो ।

वडा नं १ बाट भत्ता वितरण सुरु गरेको नगर प्रमुख कुन्साङ लामाले जानकारी दिए । ‘सामाजिक सुरक्षा भत्ता बैंकिङ प्रणालीबाट वितरण गरिने भए पनि नगरको भौगोलिक अवस्था, अशक्तहरुलाई घरदैलोमा नै सेवा दिने निर्णय गरेका थियौं, त्यसलाई प्राथमिकता दिएर कार्यान्वयन गरेका हौं,’ नगर प्रमुख लामाले भने, ‘अन्य वडामा पनि क्रमशः कार्यान्वयन गर्दै जान्छौं ।’

प्रमुख प्रशासकीय अधिकृत शिवप्रसाद लम्सालले सबै वडामा वितरण गर्ने गरी तालिका सार्वजनिक गरिएको बताए । धेरै ग्रामीण भूभाग समेटेर बनेको नगरपालिकाको केन्द्र भकुण्डेबेंसीमा मात्रै बैंकका शाखा छन् । सामाजिक सुरक्षा भत्ता लिने लाभग्राही घण्टौं हिँडेर र बोकिएर बैंकसम्म आउने गरेका छन् । घण्टौं लाम बस्नुपर्दा उनीहरुले सास्ती पाउने गरेका छन् ।

पनौती नगरपालिकाले पनि ७० वर्ष पुगेका जेष्ठ नागरिकलाई घरदैलो स्वास्थ्य परीक्षण सेवा सुरु गरेको छ । नगर प्रमुख रामशरण भण्डारी पदबहाली गर्ने क्रममा उक्त निर्णय गरेका थिए । वडा नं १, ७ र १२ मा सुरु भएको घरदैलो स्वास्थ्य परीक्षण सेवा क्रमशः अरु वडामा पनि विस्तार हुने भण्डारीले जानकारी दिए । मधुमेह, उच्च रक्तचापलगायतका अन्य परीक्षण गरिएको छ ।

प्रकाशित : श्रावण १९, २०७९ १६:२०
प्रतिक्रिया
पठाउनुहोस्

सातै प्रदेशमा देखाइँदै 'सरी मम'

कान्तिपुर संवाददाता

काठमाडौँ — लागूऔषधमाथि बनेको फिल्म 'सरी मम'लाई सातै प्रदेशमा देखाइने भएको छ । लागूऔषधविरुद्धको अभियानको रुप मा प्रदर्शनमा आउने फिल्मलाई नेपाल नेपाल जेसिजले समन्वय गर्ने भएको छ ।

देशभर रहेका नेपाल जेसिजको १ सय ७४ शाखाहरुले यो फिल्मलाई अभियानको रुपमा अगाडि बढाउने बताइएको छ । सामाजिक विषयवस्तुमा आधारित यो फिल्म लागूऔषधमा फसेका युवाहरूलाई लक्षित गरी निर्माण गरिएको हो ।

नवीन बोगटीको निर्देशनमा बनेको यो फिल्ममा बिनोद लामाको कथा समावेश छ । कथालाई आयुष बुढाथोकी र सरोज पौडेलले लेखेका हुन् । मेकअप आर्टिस्टका रुपमा फिल्म क्षेत्रमा प्रवेश गरेका बिनोद फिल्मका कार्यकारी निर्मातासमेत हुन् ।

फिल्ममा सरोज खनाल, सरिता लामिछाने, प्रभात पल, एलिस राई, आरवी कटुवाल, विहान श्रेष्ठ, युनिशा बजगाईंलगायतको अभिनय छ । फिल्मलाई दीर्घ गुरुङले खिचेका हुन् भने सम्पादन प्रितम पाण्डेले गरेका हुन् । फिल्मका निर्माता सिनेटर खेमराज अधिकारी र रोजिता तामाङ हुन् ।

प्रकाशित : श्रावण १९, २०७९ १६:००
पूरा पढ्नुहोस्
प्रतिक्रिया
पठाउनुहोस्
×