कालिज फार्ममा पसेको चितुवा दुई दिनपछि नियन्त्रणमा
दोलखा — सदरमुकाम चरिकोट नजिकैको कालिज फार्ममा पसेको चितुवालाई सदर चिडियाखानाबाट आएको टोलीले नियन्त्रणमा लिएको छ ।
भीमेश्वर नगरपालिका– ७ मा रहेको दूधपोखरी वाइल्ड लाइफ एग्रो विथ रिसोर्टमा शनिबार रातिदेखि पसेको चितुवालाई दुई दिनपछि सोमबार बिहान नियन्त्रणमा लिइएको हो । चितुवालाई डार्टिङ गरी लठ्याएर नियन्त्रणमा लिइएको डिभिजन वन कार्यालयका प्रमुख थिरबहादुर कार्कीले बताए ।
नियन्त्रणमा लिइएको चितुवालाई खोरमा राखेर डिभिजन वन कार्यालय लगिएको छ । कालिज फार्ममा पसेर चितुवाले ५ सयभन्दा बढी कालिज मारेको थियो । नियन्त्रणमा आएको चितुवा सामान्य घाइते रहेको कार्कीले बताए ।
चितुवाको डिभिजन वन कार्यालयमा थप उपचार गरेर घना जंगलको बीचमा लगेर छाडिने उनले बताए । फार्ममा पसेको चितुवा स्थानीयले लखेटने प्रयास गरेपनि सबैतिर तारजाली लगाएका कारण चितुवाले स्थानीयलाई नै आक्रणम गर्ने प्रयास गरेको थियो ।
स्थानीयलाई आक्रमण गरेपछि ढुंगामुढा गरेर चितुवालाई घाइते बनाएका थिए । वन कार्यालयले हानीनोक्सानी नपुर्याउन आग्रह गरेपछि फार्म सञ्चालकले चितुवालाई फार्मभित्रै थुनेर राखेका थिए ।
प्रकाशित : श्रावण ९, २०७९ १२:१६