अस्तायो काजलकली हात्ती- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

अस्तायो काजलकली हात्ती

रमेशकुमार पौडेल

चितवन — सौराहामा लामो समय जंगल सफारीका लागि प्रयोग भएको पोथी हात्ती काजलकलीको आइतबार मृत्यु भएको छ । लगभग ७० वर्षको उक्त हात्ती बुढ्यौलीका कारण मरेको हो । अन्तिम समयमा उठ्नै नसक्ने गरेर ढलेको सो हात्तीको दयनीय तस्बिर सामाजिक सञ्जालहरूमा आएपछि धेरै जनाले चासो व्यक्त गरेका थिए ।

दाँत झरेको र पाचन प्रणालीले समेत काम गर्न छाडेपछि हात्ती कमजोर हुँदै गएर ढलेको सरकारी अधिकारीहरू दाबी गर्छन् । तर उक्त हात्ती गत वर्ष भारत बिक्री हुन लाग्दा अन्तर्राष्ट्रिय सन्धि साइटिसको प्रावधानविपरीत भएको भनेर मुद्दा परेपछि सौराहा नै फर्काइएको थियो ।

उक्त हात्ती न किनेको भनिएका भारतीय मालिकको हात पर्‍यो न बिक्री गरेको भनिएका सौराहाका व्यवसायीले जिम्मा लिए । भारतीयले नै दुई जना माहुते खटाएपछि काजलकली सौराहाका होटल व्यवसायी श्रीलाल परियारको हात्तीसारमा अर्को हात्तीसँगै बसेको थियो । रेखदेख, आहारा र उपचार नियमित दिँदै आए पनि अशक्त र बुढो भएका कारण गत हप्ता हात्ती ढलेको थियो ।

काजलकली सौराहाका व्यवसायी मधुकर रेग्मीले भारतीयलाई बेचेको चर्चा छ । तर रेग्मी उक्त कुरा अस्वीकार गर्छन् । उनले २०७४ सालसम्म आफूले हात्ती राखेको र त्यो हात्ती मरेपछि कुनै हात्ती नपालेको कान्तिपुरलाई बताए । काजलकलीको विषयमा आफूलाई अनावश्यकरूपमा जोडेको उनको भनाइ छ ।

प्रकाशित : असार १२, २०७९ २१:०५
प्रतिक्रिया
पठाउनुहोस्

कटुवा पेस्तोलसहित पक्राउ

रमेशकुमार पौडेल

चितवन — कटुवा पेस्तोल, नगद, सुन र मोबाइल फोनसेटसहित चितवन प्रहरीले आइतबार बिहान एक जनालाई समाएको छ । जेठमा कटुवा पेस्तोलसहित पक्राउ परेका एक व्यक्तिलाई हिरासतमा राखेर अनुसन्धान गर्ने क्रममा अर्को व्यक्ति पनि समातिएको चितवन प्रहरीले जनाएको छ ।

प्रहरीले आइतबार बिहान साढे ६ बजेतिर भरतपुर महानगरपालिका–५ बाट ३२ वर्षका प्रकाश विकलाई गिरफ्तार गरेको हो ।

चितवन जिल्ला प्रहरी कार्यालयका प्रवक्ता रहेका प्रहरी नायब उपरीक्षक (डिएसपी) नरहरि अधिकारीका अनुसार भरतपुर–८ घर भएका विक सो ठाउँमा डेरा गरी बस्थे । उनको डेराबाट कटुवा पेस्तोल एक थान र त्यसमा प्रयोग हुने दुईवटा गोली बरामद भएको छ । त्यसै गरी नगद एक लाख १४ हजार रुपैयाँ, लकेट सहितको एउटा सुनको सिक्री र पाँच थान मोबाइल फोनसेट पनि बरामद भएको डिएसपी अधिकारीले बताए ।

चितवन प्रहरीले जेठ २३ गते भरतपुर महानगरपालिका–६ घर भएका दिपक पुनमगरलाई भरतपुर–४ बाट कटुवा पेस्तोलसहित समाएको थियो । पुनलाई प्रहरीले हातहतियार तथा खरखजनासम्बन्धी अपराधमा मुद्दा दायर गर्न हिरासतमा राखेर अनुसन्धान सुरु गरेको छ । सोही मुद्दाको अनुसन्धानको सिलसिलामा सोधपुछ हुँदा प्रकाश पनि फक्राउ परेको डिएसपी अधिकारीले बताए ।

प्रकाशित : असार १२, २०७९ २०:३३
पूरा पढ्नुहोस्
प्रतिक्रिया
पठाउनुहोस्
x
×