मन्थलीमा निकास नहुँदा सडकमै भेल- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

मन्थलीमा निकास नहुँदा सडकमै भेल

टीकाप्रसाद भट्ट

रामेछाप — रामेछापको जिल्ला सदरमुकाम मन्थली हरेक वर्षायाममा हिलो र धूलो हुने गरेको छ । स्थानीय खोलाखोल्सीहरूको उचित निकास नहुँदा सडकमै भलबाढी बग्ने गर्छ । 


सडक कालोपत्र भए पनि अलिकति पानी पर्नासाथ सडकमा भलको पानी बग्न थाल्छ । खोल्सीहरू जथाभावी फर्काउँदै आफ्नो संरचना निर्माण गर्नेले पानीको निकासका बारेमा चासो नदिँदा समस्या अझ थपिँदो छ । सडक डिभिजन कार्यालय खुर्कोटका सुपरभाइजर शंकर कार्की भन्छन्, ‘परम्परादेखि खोला बग्ने स्थानमा कजवे बनाएका थियौं । कजवेको निकास बन्द गरेर घर बनेका छन् ।’

साविकमा खोलाखोल्सीसमेत नापी भएकाले बजार क्षेत्रमा समस्या हुन थालेको हो । नापी भएको र लाखौं रुपैयाँ आनामा जाने जग्गामा खोला अन्यत्र फर्काएर घर बन्छ भने किन नबनाउने भन्ने होडबाजी नै छ । सबैको जग्गा बचाएर पानी तर्काउन सम्भव नभएकाले खोला सडकबाटै बग्ने अवस्था रहेको उनले बताए ।

आकाशे क्षेत्रमा साविकमा ३ वटा खोल्सीको पानी झर्ने गरेको थियो । अहिले ३ वटै खोल्सीको पानीको बहाव क्षेत्रमा स्थानीयले संरचना निर्माण गरिसकेका छन् । पानी बग्ने ठाउँ छेकेर घर बनाएकाले हरेक वर्ष सडक हिलाम्मे हुने गरेको छ । मन्थली बजारदेखिको सडक किनारका नालाबाट बगेको पानी बसपार्कमा पुग्छ । तर बसपार्क क्षेत्रबाट नालाको निकास नभएकाले उक्त क्षेत्र हिलाम्मे हुने गरेको छ । ‘बजारदेखिको पानी ल्याएर हाम्रो जग्गामा छोडेका छन्,’ स्थानीय मनोज माझी भन्छन् । ‘सडक तथा नाला नहुँदा बसपार्क नजिक वर्षायाममा खहरे बग्छ ।’

मन्थली नगरपालिकाका प्रमुख लब श्रेष्ठ निकासका लागि पहल भइरहेको बताउँछन् । ‘सहर हिलो र धूलोमुक्त बनाउन र सधैंको डुबान समस्या कम गर्न बसपार्कबाट तामाकोसी किनारसम्म निकास बनाउने प्रयास भइरहेको छ । केही जग्गामा सहमति गर्न बाँकी रहेकाले सरोकारवालासँग बसेर छलफल चलाउँदै छौं ।’

प्रकाशित : असार १२, २०७९ ११:३७
प्रतिक्रिया
पठाउनुहोस्

१२ वर्षपछि बल्ल पुल तयार

कान्तिपुर संवाददाता

लुम्बिनी — रुपन्देहीको देवदह–तिलोत्तमा–मोतीपुर–लुम्बिनी सडक खण्डको तिनाउ नदीमा निर्माणाधीन पुल १२ वर्षमा सम्पन्न भएको छ । ०६७ असार २५ गते ठेक्का सम्झौता भएको पुल १२ वर्ष पुग्नै लाग्दा उद्घाटन भएको हो । गृहमन्त्री बालकृष्ण खाँणले शनिबार पुल उद्घाटन गरेका हुन् ।

भौतिक पूर्वाधार तथा यातायात मन्त्रालय, सडक विभाग, संघीय सडक सुपरीवेक्षण तथा अनुगमन कार्यालय र सडक डिभिजन बुटवलको आयोजनाका रुपमा पुल निर्माण सम्पन्न भएको हो । एलिट कन्स्ट्रक्सन प्रालि काठमाडौंले निर्माण ठेक्का लिएको पुलको आधा भागमा ढुंगा भेटिएपछि काम रोकिएको थियो । लामो समयपछि त्रिभुवन विश्वविद्यालयको इन्जिनियरिङ इन्स्टिच्युटका प्राज्ञको टोलीले अध्ययन गरी नक्सा परिवर्तन गर्ने सुझाव दिएपछि मात्र भौतिक पूर्वाधार मन्त्रालयले स्वीकृती दिई सडक डिभिजनले पुनः काम गरेको हो ।

देश विकासमा भूमिका खेल्ने पूर्वाधार निर्माणलाई सरकारले उच्च प्राथमिकतामा राखेर अघि बढेको गृहमन्त्री खाँणले बताए । ‘तीन वर्षमा सम्पन्न गर्नुपर्ने पुल निर्माण गर्न विश्वविद्यालय निर्माण गरेजति समय लाग्यो,’ उनले भने, ‘शिलान्यास भएको १२ वर्षमा बल्ल निर्माण सम्पन्न भयो ।’ यो पुल देशकै अनुपम उदाहरण र नमुना पुल बनेको उनले बताए । ‘यस पुलको निर्माणले बुद्ध सर्किट जोड्ने गरी मानिसको आवतजावत तथा चार नगरको भाइचारामा थप टेवा पुग्नेछ,’ गृहमन्त्री खाँणले भने, ‘साथै आन्तरिक पर्यटन प्रवर्द्धनका लागि पनि पुलले महत्त्वपूर्ण भूमिका निर्वाह गर्नेछ ।’

पुल ११ मिटर चौडा र १ सय ८५ मिटर लामो रहेको छ । १३ करोड ८३ लाख १५ हजार ३ सय ७८ रुपैयाँ लागत अनुमान गरिएको पुल ११ करोड ७२ लाख ८८ हजार ९ सय ७ रुपैयाँमा ठेक्का सम्झौता भएको सडक डिभिजन कार्यालय बुटवलका इन्जिनियर अशोक पौडेलले बताए । उनका अनुसार अन्तिमपटक थप गरिएको पुलको निर्माण सम्पन्न मिति असार २५ गतेका लागि तोकिएको थियो ।

प्रकाशित : असार १२, २०७९ ११:३७
पूरा पढ्नुहोस्
प्रतिक्रिया
पठाउनुहोस्
×