वाग्मती प्रदेशमा रक्तसञ्चार सेवा निःशुल्क
काठमाडौँ — वाग्मती प्रदेश सरकारले प्रदेशभित्रका स्थायी बासिन्दाका लागि निःशुल्क रक्तसञ्चार सेवा उपलब्ध गराउने भएको छ । हाल नेपाल रेडक्रस सोसाइटीलगायत संघसंस्थाबाट सञ्चालित रक्तसञ्चार सेवामा रक्तदाताले निःशुल्क रगत दान गरे पनि बिरामीले शुल्क तिर्नुपर्ने बाध्यता छ ।
प्रदेश सरकारले रगत, ब्लड ब्याग र रगत परीक्षण शुल्कमा सहुलियतको व्यवस्था गरेर निःशुल्क रक्तसञ्चार सेवा प्रदान गर्ने भएको हो ।
आर्थिक मामिला तथा योजनामन्त्री शालिकराम जम्मकट्टेलले बुधबार आगामी आर्थिक वर्ष २०७९/०८० का लागि बजेट प्रस्तुत गर्दै प्रदेशभित्रका स्थायी बासिन्दाहरूका लागि निःशुल्क रक्तसञ्चार सेवा उपलब्ध गराउने व्यवस्था गरिएको बताए ।
प्रकाशित : असार १, २०७९ १९:२२प्रतिक्रिया