अनिल परियार हत्या प्रकरण : महिना दिनपछि तीन जना पक्राउ
चितवन — नेपाली कांग्रेसका कार्यकर्ता भरतपुरका अनिल परियारको हत्या भएको महिना दिनपछि चितवन प्रहरीले तीन जनालाई पक्राउ गरेर अनुसन्धान सुरू गरेको छ । घटनामा संलग्न अन्यको खोजी भइरहेको प्रहरीको भनाइ छ ।
चितवन जिल्ला प्रहरी कार्यालयका प्रवक्ता डिएसपी नरहरि अधिकारीका अनुसार गिरफ्तार हुनेमा भरतपुर-१५ का ३५ वर्षीय विश्व भन्ने हेमन्त बास्तोला, भरतपुर-१२ का २३ वर्षका राहुल परियार र चितवन माडी घर भइ भरतपुर-१५ मा डेरा गरी बस्ने वर्ष २५ का रोहित सिलवाल रहेका छन् । बास्तोला काठमाडौं र अरू चितवनमै समातिएका हुन् । कांग्रेसको वाग्मती प्रदेश अधिवेशन प्रतिनिधि परियारको वैशाख २५ गते साँझ हत्या भएको थियो । भरतपुर महानगरपालिका-१२ बस्ने परियारलाई भरतपुर-७ कृष्णपुरको प्लटिङ फुटबल मैदान नजिक धारिलो हतियार प्रहार गरेर ज्यान लिएको प्रहरीले जनाएको छ ।
स्थानीय तह निर्वाचनको माहोल उत्कर्षमा रहेका बेला हत्या घटना भएको थियो । उक्त घटनाको भोलिपल्ट नेपाल तरूण दल चितवनले भरतपुरमा विरोध प्रदर्शन गरेको थियो । त्यसअघि स्वस्फूर्त प्रदर्शनमा उत्रेका परियारका समर्थकले केही गाडी पनि तोडफोड गरेका थिए ।
परियार केही आपराधिक गतिविधिमा संलग्न भएको आरोपमा पक्राउ परेका व्यक्ति थिए । प्रहरीका अनुसार उनी ज्यान मार्ने उद्योग गरेको अपराधमा एक वर्षअघि मात्रै समातिएर पछि छुटेका थिए । परियार हत्याको कारण प्रहरीले अझैसम्म केही खुलाउन सकेको छैन । घटनामा संलग्न मुख्य व्यक्तिसमेत पक्राउ परेका छैनन् ।
