चितवनमा सेप्टिक ट्यांकीमा खसेर दुई जनाको निधन- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

चितवनमा सेप्टिक ट्यांकीमा खसेर दुई जनाको निधन

रमेशकुमार पौडेल

चितवन — सेप्टिक ट्यांकी सफा गर्ने क्रममा बुधबार चितवनमा दुई जनाको निधन भएको छ । चितवन जिल्ला प्रहरी कार्यालयले दिएको जानकारी अनुसार मृत्यु हुनेमा कपिलवस्तु शिवराज नगरपालिका-९ बस्ने २४ वर्षका छतिराम थारू र  २३ वर्षका राम चौधरी रहेका छन् ।

भरतपुर महानगरपालिका-१९ तमु टोलको रामप्यारी गुरूङको घरको सेप्टिक ट्यांकी सफा गर्ने क्रममा घटना भएको चितवन प्रहरीले जनाएको छ । डिएसपी नरहरि अधिकारीका अनुसार साँझ साढे ६ बजेतिर सफा गर्ने क्रममा छतिराम थारू चिप्लेर ट्यांकीमा खसेका थिए । छतिराम खसेपछि उनलाई झिक्न भन्दै राम चौधरी ट्यांकीमा छिरेका थिए । छतिराम र राम साला-भेना रहेको प्रहरीले जनाएको छ ।

घटनापछि नेपाली सेना, प्रहरी र सशस्त्र प्रहरी उद्धारका लागि गएको थियो । दुवैको शव निकालेर पोस्टमार्टममा लागि साँझ ८ बजेर ५५ मिनेट जाँदा भरतपुरको सरकारी अस्पताल पठाएको डिएसपी अधिकारीले बताए ।

प्रकाशित : जेष्ठ २५, २०७९ २१:२५
प्रतिक्रिया
पठाउनुहोस्

जिल्ला समन्वय समिति कञ्चनपुरमा कांग्रेसको मात्रै उम्मेदवारी

भवानी भट्ट

कञ्चनपुर — जिल्ला समन्वय समिति कञ्चनपुरमा प्रमुख, उपप्रमुखदेखि सदस्य सबैमा नेपाली कांग्रेसका उम्मेदवारको मात्रै उम्मेदवारी दर्ता भएको छ । प्रमुख, उपप्रमुखसहित ९ जना सदस्यको मात्रै उम्मेदवारी परेको मुख्य निर्वाचन अधिकृतको कार्यालयले जनाएको छ । 

जिल्ला समन्वय समितिको प्रमुखमा दुर्गा बोहरा र उपप्रमुखमा रामकुमारी रानाको मात्रै उम्मेदवारी परेको छ । यसैगरी, सदस्यहरुमा जयसिंह विष्ट, रामसिंह भण्डारी, मोहन महता, अञ्जुदेवी राना, लिला चौधरी, चन्द्रा देवी थापा र विमलाकुमारी सार्की रहेका छन् । स्थानीय तहको प्रम्खु उपप्रमुखमा कांग्रेसको एकल बहुमत भएकाले उनीहरु निर्विरोध हुने देखिन्छ ।

मुख्य निर्वाचन अधिकृत मदनबहादुर धामीका अनुसार बिहीबार उम्मेदवारमाथि दाबी/विरोध, शुक्रबार उम्मेदवारी फिर्ता र शनिबार मतदानको कार्यक्रम तय भएको छ ।

प्रकाशित : जेष्ठ २५, २०७९ २०:४७
पूरा पढ्नुहोस्
प्रतिक्रिया
पठाउनुहोस्
×