भूकम्प पीडितले पाएनन् अनुदान- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

भूकम्प पीडितले पाएनन् अनुदान

टीकाप्रसाद भट्ट

रामेछाप — घर निर्माण सकेको वर्ष दिन पुग्दा पनि रामेछापका भूकम्प पीडितले अझै अनुदानको रकम पाउन सकेका छैनन् । तर वैदेशिक स्रोत फुकुवा नहुँदा जिल्लामा निकासा भएको २० करोड रुपैयाँ भने सरकारी ढुकुटीमै थन्किएको छ । 

प्राविधिकबाट निरीक्षण सकेका घरहरूको अनुदान नपाउँदा पीडितहरूले डकर्मी र निर्माण सामग्री खरिदको रकम भुक्तानी गर्न कठिनाइ झेल्दै आएका छन् । ‘चुनाव प्रचारमा जाँदा पनि जनताले किस्ताको बारेमा सोधपुछ गर्छ; चुनाव सकिएपछि पनि दिनहुँ वडा कार्यालयमा किस्ता नपाएकै गुनासो लिएर आउनेहरूको संख्या बढेको छ‚’ रामेछाप नगरपालिका ८ का वडाध्यक्ष सन्तोष तामाङले भने‚ ‘जनप्रतिनिधि हुनेबित्तिकै नागरिकको समस्या समाधानका लागि जिल्ला दौडन थालेको छु ।’

तामाङ मात्र होइन, जिल्लाका अधिकांश वडामा निर्वाचित जनप्रतिनिधिको सबैभन्दा ठूलो समस्या नै भूकम्पको किस्ता नपाएको भन्ने गुनासो समाधान गर्नु रहेको छ । मन्थली १२ का वडाध्यक्ष खिलेन्द्रबहादुर खत्री भन्छन्‚ ‘अरु काम एकातिर, भूकम्पको किस्ताको काम एकातिर बराबरजस्तै छ । उनले नागरिकले घर बनाएको वर्ष दिन कट्दा पनि अनुदान पाउन नसकेकोमा चिन्ता व्यक्त गरे ।

२०७२ सालको विनाशकारी भूकम्पमा परेर भत्किएका घरको पुनर्निर्माणका लागि रामेछाप जिल्लामा विश्व बैंकले सहयोग गर्दै आएको छ । अनुदान वितरणको काम गर्ने जिम्मेवारी पाएको सघन शहरी तथा भवन निर्माण विभाग रामेछापका आयोजना प्रमुख सुरेशकुमार वाग्लेले वैदेशिक स्रोत फुकुवा नहुदा किस्ता वितरणमा ढिलाइ भएको बताए ।

‘हामीले विगतमा निकाशा फुकुवा भएको करिब २१ करोड रुपैयाँ अनुदान वितरण गरिसकेका छौं‚’ वाग्ले भन्छन्‚ ‘अझै रामेछापमा करिब ३० करोड रुपैयाँ आवश्यक छ । त्यसमध्ये २० करोड रुपैयाँ केहि दिनअघि मात्र निकाशा भएको तर उक्त रकमको वैदेशिक स्रोत फुकुवा नहुँदा भुक्तानी गर्न मिलेको छैन । स्रोत फुकुवा हुनासाथ हामी २० करोड रुपैयाँ वितरण गर्न सक्ने गरी तयारी अवस्थामा छौं‚’ उनले भने ।

रामेछापमा करिब ५९ हजार भूकम्पपीडित निजी आवास बनाउनका लागि तीन पटक गरी ३ लाख अनुदान पाउनेको सूचीमा समावेश छन् । साविकको राष्ट्रिय पुनर्निर्माण प्राधिकरणले अनुदान नपाउने सूचीमा राखेका कतिपयले पुनरावेदन गरेकाले उक्त सूची अझै बढ्ने जनाइएको छ । रामेछापबाट पुनरावेदन गर्नेको संख्या करिब ४ हजार ३ सय रहेको छ ।

प्रकाशित : जेष्ठ १४, २०७९ १७:०४
प्रतिक्रिया
पठाउनुहोस्

उदयपुरको त्रियुगामा कांग्रेसको अग्रता कायमै

डिल्लीराम खतिवडा

उदयपुर — स्थानीय तह निर्वाचनअन्तर्गत उदयपुरको त्रियुगा नगरपालिकामा मतगणना जारी छ । शनिबार अपराह्न ४ बजेको परिणामअनुसार नेपाली कांग्रेसबाट मेयरका उम्मेदवार बसन्तकुमार बस्नेतले १ हजार ९५० मन्तान्तरले अग्रता लिइरहेका छन् । बस्नेतले ९ हजार ६ सय ४५ मत प्राप्त गरेका छन् ।

उनलाई पछ्याइरहेका नेकपा एमालेका भागवत राउतले ७ हजार ६९५ मत पाएका छन् । तेस्रो स्थानमा रहेको नेकपा(एकीकृत समाजवादी)का उम्मेदवार बलदेव चौधरीले ६ हजार ९५७ मत प्राप्त गरेको मुख्य निर्वाचन अधिकृतको कार्यालयले जनाएको छ ।

त्यसैगरी उपमेयरमा कांग्रेसकै सरिता राईले ८ हजार ६३१ मत लिएर अग्रता कायम गरेकी छन् । उनलाई एमालेकी महेश्वरी राईले ८ हजार ४७४ मतका साथ पछयाइरहेकी छन् । उनीहरुको मतान्तर १५७ मात्र छ । तेस्रो स्थानमा रहेकी माओवादी केन्द्रकी गीता खड्का कार्कीले ५ हजार ३०७ मत प्राप्त गरेकी छन् ।

१६ वडा रहेका त्रियुगा नगरपालिकामा अहिलेसम्म १, २, ३ , ४ ,५, १३ , १४,१५ र १६ समेत ८ वडाको मतगणना सम्पन्न भइसकेको सहायक निर्वाचन अधिकृत दिलीप मगरले बताए ।

यहाँ ६० हजार मतदाता रहेकोमा ४१ हजार ८ सय ९८ मत खसेको छ । अहिलेसम्म २७ हजार ९ सय ७५ मतमात्रै गणना गरिएको छ । मतदान विवादका कारण निर्वाचन सम्पन्न भएको ११ दिनपछि मतगणना सुरु भएको हो ।

प्रकाशित : जेष्ठ १४, २०७९ १६:५३
पूरा पढ्नुहोस्
प्रतिक्रिया
पठाउनुहोस्
×