रसुवामा चोरीका घटना बढ्दै- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

रसुवामा चोरीका घटना बढ्दै

बलराम घिमिरे

रसुवा — पछिल्लो समय रसुवा जिल्लाका विभिन्न स्थानमा चोरीका घटना बढ्न थालेका छन् । एक हप्ताको अवधिमा दुई गरी दर्जनौं घर, सहकारी तथा सरकारी भवनबाट चोरी भएको छ ।

पछिल्लो बिहीबार राति मात्रै उत्तरगया गाउँपालिका–५ मा रहेको दुई वटा सहकारीका कार्यालयमा चोरी भएको छ ।

कालिका बहुउद्देश्य सहकारी संस्था र जनजागरण वचत तथा ऋण सहकारी संस्थामा चोरी भएको हो । कालिका बहुउद्देश्य सहकारी संस्थाबाट ७३ हजार ४ सय ४५ चोरी भएको सहकारीका व्यवस्थापक गोविन्द घिमिरेले बताए ।

त्यस्तै उत्तरगया गाउँपालिका–४ कर्मीडाँडामा रहेको लहरेपौवा स्वास्थ्य चौकी र स्थानीयको घरमा पनि एकै पटक चोरी भएको छ । बिहीबार चोरी गर्ने व्यक्तिले जनजागरण वचत तथा ऋण सहकारी संस्थाको कार्यालय तोडफोडसमेत गरेको संस्थाका अध्यक्ष ओम आचार्यले बताए ।

कार्यालय तोडफोड गरे पनि संस्थाबाट चोरले नगद भने नलिएको उनले जानकारी दिए । दर्जनौं घर, सहकारी तथा सरकारी भवनबाट चोरी भए पनि अहिलेसम्म चोरीमा संलग्न व्यक्ति वा समूह पक्राउ परेका छैनन् ।

यस्तै अघिल्लो साता पनि कालिका गाउँपालिकाको कालिकास्थान धारापानी एवं बेतिनी तथा उत्तरगया गाउँपालिका–५ को माझगाउँ र बनुवा घुम्तीमा चोरीको घटना भएको थियो ।

कालिका गाउँपालिकामा विभिन्न स्थानमा सातवटा निजी घर तथा बेतिनीमा रहेको सामुदायिक स्वास्थ्य एकाइ साथै सहकारी संस्था र उत्तरगया गाउँपालिका–५ वडा कार्यालय निजी घरसमेत तोडफोड भएको भन्दै प्रहरीमा उजुरी परेको छ ।

त्यस्तै डेड महिनाअघि पनि उत्तरगया गाउँपालिका–२ डाँडागाउँ क्षेत्रमा दर्जनौं घरमा चोरी भएको थियो । चोरीमा संलग्न व्यक्तिको पहिचान गर्ने काम अगाडि बढिरहेको प्रमुख जिल्ला अधिकारी नवराज जैसीले बताए । जिल्लामा पछिल्लो समय चोरीको घटना बढ्दै गएकोमा स्थानीय प्रशासनले गम्भीर रुपमा लिएको जनाएको छ।

प्रकाशित : जेष्ठ १३, २०७९ १५:४५
प्रतिक्रिया
पठाउनुहोस्

चिकित्सक बिदामा बस्दा प्यूठान अस्पतालको पोष्टमार्टम सेवा रोकियो

कान्तिपुर संवाददाता

काठमाडौँ — चिकित्सक नहुँदा जिल्ला अस्पताल प्यूठानमा पोष्टमार्टम सेवा अवरुद्ध भएको छ । अस्पतालमा कार्यरत चिकित्सकहरु एकै पटक बाहिर जाँदा अस्पतालको सेवा  रोकिएको हो ।

अस्पतालमा कार्यरत एक जना एमडी र सात जना मेडिकल अफिसर अस्पतालमा उपस्थित नहुँदा सेवा प्रभावित भएको हो । अहिले जिल्ला अस्पताल प्यूठानमा पोष्टमार्टम सेवा बन्द भएको छ ।

अस्पतालका कार्यरत ८ जना कर्मचारी परीक्षा दिन जिल्ला बाहिर गएको र अन्य पदमा कार्यरत चिकित्सक नहुँदा सेवा प्रभावित भएको प्यूठान अस्पतालका सूचना अधिकारी खिमप्रसाद पार्धेले बताए ।

जनशक्ति नहुँदा सेवा रोकिएको र यसको विकल्प खोजी भइरहेको समेत उनले बताए । उनका अनुसार कर्मचारी नहुँदा सेवा राकिएको विषयमा मन्त्रालयमा जानकारी गराइसकिएको र केही समयमा सेवा पुन: सुरु हुने बताइएको छ ।

यसवाहेक जिल्लाका स्थानीय तहहरुमा पनि चिकित्सक जिल्ला बाहिर रहेकाले समस्या हुने गरेको पार्धेले जानकारी दिए । गौमुखी गाउँपालिका, ऐरावती गाउँपालिकाका चिकित्सकहरु पनि परीक्षा दिन जिल्ला बाहिर छन् । १७ गतेमात्रै चिकित्सकहरु जिल्ला फर्कने हुँदा त्यतिञ्जेलसम्म सेवा बन्द हुन सक्ने बताइन्छ ।

बिहीबार पोष्टमार्टमका लागि प्यूठान अस्पताल ल्याइएको शव अहिलेसम्म पनि अस्पतालमै राखिएको छ । शव पोष्टमार्टमका लागि अस्पतालमा आएका मृतकका आफन्तहरूका अनुसार अस्पताल प्रशासनले अहिले शव पोष्टमार्टमका लागि लमही वा बुटवल लैजान भनेको छ ।

प्रमुख जिल्ला अधिकारी सुनिता नेपालले भने अस्पतालमा रहेका अन्य चिकित्सकलाई जिम्बेवारी दिने गरी लुम्बिनी प्रदेश स्वास्थ्य मन्त्रालयमा समन्वय भएको बताइन् । अस्पतालमा दुई जना एमडी अहिले पनि रहेको स्वास्थ्य मन्त्रालयबाट पोष्टमार्टम गर्ने जिम्बेवारी दिइए सेवा पुन: सुरु हुने बताइन् ।

प्रकाशित : जेष्ठ १३, २०७९ १५:३२
पूरा पढ्नुहोस्
प्रतिक्रिया
पठाउनुहोस्
×