मेलम्ची र यांग्रीमा मतदान पुन: सुरु
सिन्धुपाल्चोक — जिल्लाको मेलम्ची नगरपालिका वडा ४ ज्यामिरे र पाँचपोखरी थाङपाल गाउँपालिका–२ यांग्री मतदान केन्द्रमा मतपत्रको विवाद कारण रोकिएको मतदान पुन: सुरु गरिएको छ ।
जिल्ला निर्वाचन कार्यालयका विकास विकास रिजालका अनुसार मेलम्ची नगरको ज्यामिरे स्वाथ्यचौकीको बुथमा विभिन्न दलका कार्यकर्ताबीच ठेलामठेल समेत भएको थियो ।
अशक्त र अपांग मतदातालाई आफन्तले नभइ दलका प्रतिनिधिले मतदान गर्न सघाएपछि एकाएक ज्यामिरेमा विवाद सुरु भएको थियो, दलबीच हात हालाहालको अवस्था बनेपछि मतदाता त्रसित भएका थिए ।
ज्यामिरेमा झडपको अवस्थालाई नियन्त्रणमा लिन नेपाली सेनाले हतियार तेर्स्याएको तस्बिर सामाजिक सञ्जालमा भाइरल भएको छ ।
त्यसैगरी पाँचपोखरी थाङपाल गापाको यांग्री मतदान केन्द्रमा एउटा मतपत्रमा निर्वाचन अधिकृतको हस्ताक्षर छुटेको मतपत्र भेटिएपछि झगडाले पूरै तनावग्रस्त बनाएको थियो । सो मतदान केन्द्रमा तत्काल सुरक्षाकर्मीले चर्को झडप हुन रोकेपछि आहिले त्यहाँ अवस्था सामान्य बनेको जिल्ला प्रहरी नायब उपरीक्षक दक्षकुमार बस्नेतले बताए ।
‘बाह्रबिसे नगरको १ मा झडपले मतदान रोकिएको छ, भने अन्यमाझैं मेलम्ची र यांग्रीमा अवस्था सामान्य भएकाले मतदान सुरु गरिएको छ, ’ उनले भने ।
प्रकाशित : वैशाख ३०, २०७९ १२:४७