धादिङमा खुकुरी प्रहारबाट एमाले कार्यकर्ता घाइते

आक्रमणबाट त्रिपुरासुन्दरी गाउँपालिका १ का २५ वर्षीय हरि श्रेष्ठ, २६ वर्षीय रामशरण श्रेष्ठ र ३५ वर्षीय लेकबहादुर विक गम्भीर घाइते भएका छन् । घटनाका घाइतेहरुलाई सल्यानटार प्राथमिक स्वास्थ्य केन्द्रमा उपचारपछि थप उपचारका लागि काठमाडौंस्थित मनमोहन अस्पतालमा उपचार भइरहेको छ । आक्रमणमा सामान्य घाइते १० जनाभन्दा बढी रहेको एमाले धादिङका अध्यक्ष भूमि त्रिपाठीले जानकारी दिए ।

आक्रमणपश्चात् एमाले धादिङले विज्ञप्ति जारी गर्दै घटनामा संलग्नलाई कडा कारबाही माग गरेका छन् ।

घटनामा कांग्रेस कार्यकर्ताहरुको संलग्नता रहेको अध्यक्ष त्रिपाठीले आरोप लगाए । वडाध्यक्षका उम्मेदवार भिमप्रसाद भट्टको आदेशमा एमालेको जुलुसमा अन्धाधुन्ध खुकुरी प्रहार गरेको एमालेको आरोप छ ।