रोकिएन आचारसंहिता उल्लंघन
काभ्रे — निर्वाचन नजिकिँदै जाँदा दलहरूबाट आचारसंहिता उल्लंघन पनि बढेको छ । नियमन निकाय लिखित उजुरी खोज्ने प्रवृत्तिका कारण उल्लंघन रोक्न सकेको छैन । विपक्षीले उल्लंघन गरेको मौखिक उजुरी दिने दलहरू आफैंले नै पालना गरेका छैनन् ।
गाडीमा स्पिकर राखेर दलले भोट मागिरहेका छन् । ध्वनि प्रदूषण हुने गरी प्रचार गरे पनि सरोकारवालाले ‘सुनेको नसुन्यै गरेको’ बनेपा, बुडोलका स्थानीयले बताए । घरदैलोको नाममा मोटरसाइकल र्याली हुँदै आएको छ ।
नमोबुद्ध नगरपालिकाका निर्वाचन अधिकृत विष्णुप्रसाद ज्ञवालीले आचारसंहिता उल्लंघनका घटना हटाउन भनिएको र दललाई यसबारे पटक–पटक जारी गराएको बताए । पनौती नगरपालिकाका आचारसंहिता अनुगमन अधिकृतसमेत रहेका सहायक निर्वाचन अधिकृत इन्द्रप्रसाद अधिकारीले र्याली गरेको, निर्वाचन चिह्न अंकित क्यापको प्रयोग गरेको र डोजर प्रयोग गरेको मौखिक उजुरीको आधारमा सम्बन्धित पार्टीलाई हटाउन भनिएको बताए । बनेपाका निर्वाचन अधिकृत शारदा भण्डारीले रंगीन छपाइ गरेको उजुरी आएकाले हटाउन भनिएको बताइन् ।
पाँचखालका निर्वाचन अधिकृत जीवनप्रसाद दुलाल तोकिएको संख्याभन्दा बढी झन्डाको प्रयोग भएको भन्ने उजुरीपछि हटाउन भनिएको बताइन् । मण्डनदेउपुर नगरपालिकामा दलले ठूला आवाजमा प्रचार सामग्री बजाएको मौखिक उजुरी धेरै परेको छ । निर्वाचन अधिकृत शान्ता नेपाल मरासिनीले दललाई ध्यानाकर्षण गराएपछि हटाएको बताइन् ।
प्रकाशित : वैशाख २५, २०७९ ०७:५६