कान्तिपुर वेबसाईट
AdvertisementAdvertisement
२३.१२°C काठमाडौं
काठमाडौंमा वायुको गुणस्तर: १३४

काङरिङमा १४ वर्षपछि विद्यालय भवन

राजकुमार कार्की

रानीवास,सिन्धुली — स्थानीयले माग गरेको १४ वर्षपछि कमलामाई नगरपालिका–१३ को काङरिङमा जस्ताको छाना लगाएर तीन कोठे विद्यालय भवन निर्माण सम्पन्न भएको छ । २०६४ सालमा थाकलको छाना लगाएर काठले बेराघेरा गरी सञ्चालनमा ल्याएको विद्यालय पछिल्लो समय जीर्ण बनेको थियो । रंगीन जस्ताको छाना लगाएर चिटिक्क पारिएको बालज्योती प्राविको भवन निर्माण सम्पन्न भएपछि स्थानीय हर्षित भएका छन् ।

काङरिङमा १४ वर्षपछि विद्यालय भवन

कमलामाई नगरपालिकाको चार लाख र त्यति नै रकम बराबरको स्थानीयको श्रमदानमा निर्माण भएको विद्यालय भवनको कमलामाई नगरपालिका प्रमुख खड्गबहादुर खत्रीले उद्घाटन गरेका छन् । विद्यालयमा खानेपानी, शौचालय, बालविकास कक्षा, थप शिक्षकको व्यवस्था गर्न स्थानीयले माग गरेका छन् । विद्यालयको भवन निर्माण भएपछि अब पठनपाठनमा सहज हुने भन्दै स्थानीय रमाएका थिए ।

पाँच कक्षासम्म सञ्चालन भएको विद्यालयमा ४५ जना विद्यार्थी रहेका छन् । नजिकको अर्को विद्यालय पुग्न दुई घन्टा हिँड्नुपर्ने भन्दै विद्यालय टिकाउन स्थानीयले गरेको प्रयास प्रशंसनीय भएको नगरप्रमुख खत्रीको भनाई थियो । मदन भण्डारी राजमार्ग भएर कमलामाई नगरपालिका–१३ को रानीवास पुगेपछि कमलानदी झोलुंगे पुलबाट पार गर्दै एक घण्टाको उकालो काटेपछि काङरिङ गाउँ भेटिन्छ । गाउँको सिरान सालघारी जंगलको आडमा विद्यालय छ । काठको पटाहले बेरेर सानो झुुपडी जस्तो विद्यालय भवन तीनकोठाको चिटिक्क बनाउन सकेको व्यवस्थापन समितिका अध्यक्ष हस्तबहादुर मोक्तान दंग थिए । 'नगरपालिकाबाट सुरुमा तीन लाख परेको थियो', उनले भने, ‘भवनमा चाहिने सामान खरिद गरि २८ घरधुरीले महिनादिन श्रमदान गरेपछि ठडियो । जस्ताको लागि एक लाख थप रकम आयो । केही रिण लागेको छ ।’ काम सुरु भएको दुज्ञ महिना बित्दानबित्दै विद्यालय भवन सम्पन्न भएकोमा अध्यक्ष मोक्तान लगायतलाई नगरपालिकाका तर्फबाट नगरप्रमुख खत्रीले बधाई ज्ञापन गरेका थिए । भवन निर्माण सम्पन्न गर्दा ५५ हजार ऋण लागेको छ ।

स्थानीय तह भएर जनप्रतिनिधिले सरकार चलाएको पाँच वर्ष पुग्न लाग्दा अन्तिममा आएर भवन बनेको छ । काङरिङमा विद्यालय जाने उमेर समूहका ५०/६० जना विद्यार्थी रहेका छन् । सक्नेले बेसीमा झरी अर्को विद्यालयमा पठाएका छन् । बिहान खाए बेलुकी के खाउँ भन्ने अभिभावक धेरै भएकाले अर्को विद्यालयमा पठाउन नसकेकोमा वल्ल भवन बनेकाले अब राम्रो हुनेमा स्थानीय कुलबहादुर विक आशावादी छन् । 'बालबालिकाहरु अर्को विद्यालय पुग्न घण्टौं हिँड्नु पर्ने भएपछि माग बमोजिम प्रावि स्वीकृत भयो', उनले भने, ‘विद्यालय त आयो तर पढाउने ठाउँ छैन् । सामुदायिक वनको केही लगानी र स्थानीयको श्रमदानमा नाम मात्रको भवन ठड्याएका थियौं । अहिले तीन कोठे बनेपछि हामी विपन्नको लागि यो महल नै भएको छ ।’

भएभरका विद्यार्थीहरुलाइ एउटै कक्षामा राखेर पढाउनु पर्ने बाध्यताको अन्त्य भएको प्रअ पवित्रा कट्टेलले सुनाइन् । बालविकास कक्षा र शिक्षकको माग गरेकी उनलाई नगरप्रमुख खत्रीले पहल लिने वचन दिए । एक जना राहत शिक्षक र विद्यालय कर्मचारीले मात्र सबै कक्षा धान्न गाह्रो भएको उनको गुनासो थियो । प्रअ कट्टेल राहत शिक्षक हुन् । विद्यालयमा अध्ययनरत बालबालिकालाई छात्रवृत्ति प्रदान गर्न स्थानीय यादव सुवेदीले छोराको विहेभोज खर्च जोगाएर ५० हजार रुपैयाँ अक्षय कोषका लागि प्रदान गरेका छन् ।

प्रकाशित : फाल्गुन ३०, २०७८ १२:४९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?