दोलखामा एक लाखभन्दा बढीले लगाए खोप- वाग्मती - कान्तिपुर समाचार

दोलखामा एक लाखभन्दा बढीले लगाए खोप

केदार शिवाकोटी

दोलखा — जिल्लाभर १२ वर्षमाथिका एक लाखभन्दा बढीले खोप लगाएका छन् । दोलखामा बुधबारसम्म एक लाख १० हजारले पहिलो डोज खोप लगाएका छन् भने ९७ हजारले दोस्रो डोज खोप लगाएका छन् ।

जिल्लाका १७ हजार विद्यार्थीलाई कोरोनाविरुद्धको पहिलो डोज खोप लगाइएको छ । विद्यालयमै पुगेर १२ वर्षदेखि १७ वर्ष उमेर समूहका १७ हजार विद्यार्थीलाई पहिलो डोज खोप लगाइएको हो ।

तीन स्थानीय तहका ८ हजार विद्यार्थीलाई बुधबार दोस्रो डोज खोप लगाइएको जिल्ला स्वास्थ्य कार्यालयका प्रमुख अर्जुन पौडेलले बताए । उनका अनुसार विद्यार्थीलाई विद्यालयमै बोलाएर दोस्रो डोज खोप लगाइएको हो । हालसम्म ६० प्रतिशत १२ देखि १७ वर्ष उमेर समूहकालाई खोप दिइएको उनले बताए । सरकारले खोप लगाउन विद्यालय खोल्ने अनुमति दिएपछि जिल्लाभरका विद्यालयमा धमाधम खोप अभियान सुरु भएको प्रमुख पौडेलले बताए ।

जिल्लाभरका १२ देखि १७ वर्ष उमेरका समूहलाई खोप लगाउन थालेका छौं,’ उनले भने, ‘जिल्लाका सबै विद्यालयमै पुगेर छुटेकालाई पहिलो डोज खोप दिइरहेका छौं, लगाइसकेकालाई दोस्रो डोज खोप दिन्छौं ।’ जिल्लाभर आलोपालो गरेर स्थानीय तहका विद्यालयमा खोप अभियान सुरु गरिएको उनले बताए । जिल्लामा अहिलेसम्म १८ वर्षमाथिका ९४ हजारलाई पहिलो डोज खोप लगाइसकेको उनले बताए । उनका अनुसार ९० हजारले दोस्रो डोज खोप लगाइसकेका छन् । बुस्टर डोज खोप भने अत्यन्तै न्यून रहेको छ । बुधबारसम्म जम्मा २४ सय २२ जनाले मात्रै खोप लगाएका छन् । ‘सरकारले अग्रपंक्तिकालाई मात्र बुस्टर डोज खोप लगाउन भनेपछि खोप लगाउनेको संख्या कम भएको हो,’ उनले भने, ‘खोप अपुग भएकाले कतिपयले बुस्टर डोज लगाउने संख्या पनि न्यून छ ।’ पहिलो डोज खोप लगाउन छुटेकालाई चरिकोटमा हरेक शुक्रबार खोप दिइने गरेको उनले बताए । तेस्रो लहर सुरु भएपछि खोप लगाउन आउनेको संख्या बढेको कार्यालयले जनाएको छ ।

दुर्गममा पुगेन खोप
जिल्लाको विकट विगु गाउँपालिका-१ लप्चीका बासिन्दाले पहिलो डोज खोप लगाएको ६ महिना बितिसक्दा समेत दोस्रो डोज खोप पाएका छैनन् । जिल्लाको विकट क्षेत्र लप्चीमा ३० जना जतिलाई मात्रै पहिलो डोज खोप दिइएको थियो । उनीहरूले अहिलेसम्म दोस्रो डोज खोप पाएका छैनन् । अझै ४० भन्दा बढीले पहिलो डोज खोपसमेत लगाउनै छुटेको स्वास्थ्य कार्यालयका प्रमुख पौडेलले भने ।

अन्दाजका भरमा अति विकट क्षेत्रमा कम खोप लैजाँदा लप्चीबासीले खोप नपाएका हुन् । ‘लप्चीमा खोप लैजाने बेला जनसंख्या कम होला भनेर अन्दाजका भरमा लग्यौं,’ उनले भने, ‘आधाभन्दा बढीले खोप लगाउनै पाएनन्, सेनाको हेलिकोप्टर प्रयोग गरेर भए पनि खोप लैजान्छौं ।’ उनका अनुसार विकट क्षेत्र भएकाले हिँडेर खोप लैजान असम्भवजस्तै भएकाले पहिलो डोज खोप लगाएकालाई पनि दोस्रो डोज दिन नसकिएको हो ।

हाल हिमपातले लप्चीबासी लुमनाङ झरेका छन् । जिल्लाको विकट गौरीशंकर गाउँपालिका-९ को बेदिङमा भने दोस्रो डोज खोप दिइएको छ । २ दिनको पैदल हिँडेरै स्वास्थ्यकर्मीले बेदिङमा खोप लगाएको कार्यालयले जनाएको छ ।

प्रकाशित : माघ १३, २०७८ १६:४९
प्रतिक्रिया
पठाउनुहोस्

नेपालमा थप ८ हजार १७ संक्रमित, ५ हजार २९२ निको

कान्तिपुर संवाददाता

काठमाडौँ — नेपालमा ८ हजार १७ कोरोना संक्रमित थपिएका छन् । स्वास्थ्य तथा जनसंख्या मन्त्रालयले २४ घण्टामा एन्टिजेन र पीसीआर विधिबाट २१ हजार ८०८ परीक्षण हुँदा ८ हजार १७ जना संक्रमित थपिएको बिहीबार जानकारी दिएको हो ।

१५ हजार ७३६ पीसीआर परीक्षण गर्दा ५ हजार ८१६ मा संक्रमण पुष्टि भएको र ६ हजार ७२ मा एन्टिजेन परीक्षण हुँदा २ हजार २०१ मा पोजिटिभ देखिएको छ ।

२४ घण्टामा निको हुनेको संख्या भने ५ हजार २९२ रहेको मन्त्रालयले तथ्यांकमा उल्लेख छ । योसँगै हालसम्म ८ लाख ३७ हजार ४ जना निको भएका छन् ।

२४ घण्टामा कोरोनाबाट १५ जनाको मृत्यु भएको छ । यससँगै नेपालमा कोरोनाबाट मृत्यु हुनेको संख्या ११ हजार ६८७ पुगेको छ ।

२४ घण्टामा ५ लाख ५४ हजार ५६६ जनाले खोप लगाएको मन्त्रालयले जनाएको छ । यस्तै सक्रिय संक्रमितको संख्या भने ९० हजार ५ सय ७६ पुगेको छ ।

यसअघि शनिबार कोरोना संक्रमणबाट १६ जनाको मृत्यु भएको थियो ।

प्रकाशित : माघ १३, २०७८ १६:३६
पूरा पढ्नुहोस्
प्रतिक्रिया
पठाउनुहोस्
×