कर्मचारीलाई कोरोना भएपछि दोलखा प्रशासनमा सेवा बन्द
दोलखा — कर्मचारीलाई कोरोना संक्रमण भएपछि जिल्ला प्रशासन कार्यालय दोलखाले अत्यावश्यक बाहेकका सेवा बन्द गरेको छ ।
जिल्ला प्रशासनका कार्यालय दोलखाले मंगलबार जारी गरेको सूचनामा कार्यालयका केही कर्मचारीमा कोरोना संक्रमण र अन्यमा मिल्दोजुल्दा लक्षण देखिएपछि सेवा बन्द गरेको जनाएको छ ।
प्रशासनले सेवा दिँदै आएको नागरिकता, राहदानी, राष्ट्रिय परिचयपत्र बुधबारबाट ५ दिन आइतबारसम्म वितरण स्थगित गरेको छ । कार्यालयका प्रशासकीय अधिकृत औलखबहादुर आलेद्वारा जारी सूचनामा नागरिकता र राष्ट्रिय परिचयपत्र वितरण तत्कालका लागि स्थगित गरिएको उल्लेख छ ।
यसअघि नागरिकता र राष्ट्रिय परिचयपत्र बनाउनेको भिड बढेपछि संक्रमणको जोखिम बढेको भन्दै आलोपालो नियम लागू भएको थियो ।
प्रकाशित : माघ ११, २०७८ १८:१९