सिन्धुलीमा बुस्टर डोज लगाउन सुरु

सदरमुकामको कमलामाई नगरपालिकामा भने बिहीबारदेखि नै उक्त खोप लगाउन सुरु भएको हो। कोभिसील्ड र भेरोसेल खोपको दोस्रो मात्रा लगाएको छ महिना पुगेका अग्रपंक्तिमा खटिनेलाई तेस्रो मात्रा (बुस्टर डोज) खोप लगाउन सुरु गरिएको कार्यालयका सूचना अधिकारी सूर्य घिमिरेले जानकारी दिए ।

स्वास्थ्यकर्मी, कर्मचारी, सुरक्षाकर्मी, सरसफाईकर्मी, पत्रकार लगायतलाई तोकिएको खोप केन्द्रबाट तेस्रो मात्रा बुस्टर डोज खोप सबै पालिकामा दुई दिन लगाइने छ । सिन्धुलीमा ९ वटै स्थानीय तहमा गरी कोरोना विरुद्धको खोपको पूर्ण मात्रा लगाउनेको संख्या एक लाख १२ हजार २१३ पुगेको छ । खोपको पहिलो मात्रा भने एक लाख ४४ हजार २०४ जनाले लगाएका छन् ।

जिल्लामा दोस्रो मात्रा नलगाउने ३० हजारभन्दा बढी रहेका छन् । कार्यालयको कोभिड–१९ जनस्वास्थ्य अधिकृत कृतिषा थिङका अनुसार अहिले संक्रमित २६२ मध्ये ९ जना कोभिड अस्पतालमा र बाँकी सबै बिरामी होमआइसोलेसनमा बसेर उपचार गरिरहेको बताइएको छ । कोरोनाको संक्रमण दर बढ्दै गएपछि सिन्धुली अस्पतालको मूल गेटमै १८ वर्ष उमेर समूहमाथिका नागरिकलाई नियमित रुपमा कोरोना बिरुद्धको खोप लगाउने कार्य भइरहेको कार्यालयले जनाएको छ ।