कोरोना संक्रमण बढेपछि गोकुलगंगा गाउँपालिका बन्द
रामेछाप — कोरोना संक्रमण तीव्र रुपमा फैलिएपछि रामेछापको गोकुलगंगा गाउँपालिकाले ५ दिनका लागि गाउँपालिका कार्यालय बन्द गरेको छ ।
सोमबार पालिकाकी उपप्रमुख राधिका नेवारले सूचना प्रकाशित गरी माघ ३ गते देखि ७ गतेसम्म गाउँपालिकाबाट सम्पादन हुने अत्यावश्यक बाहेकका सबै सेवा बन्द रहने जानकारी दिएकी छन् ।
पालिकामा रहेका जनप्रतिनिधि र कर्मचारीसमेतलाई कोरोना संक्रमण बढेको नेवारले सूचनामा उल्लेख गरेकी छन् । रामेछापमा पछिल्लो साता कोरोना संक्रमण बढेपछि गोकुलगंगा गाउँपालिकाले यस्तो निर्णय गरेको हो ।
नेकपा एमालेको जिल्ला अधिवेशनबाट फर्किएका अधिकांश प्रतिनिधिहरू रुघा, खोकी र ज्वरोको संक्रमणबाट ग्रस्त भएपछि जिल्लामा कोभिड १९ को परीक्षण पनि तीव्र पारिएको छ ।
परिक्षण गराएका अधिकांश व्यक्तिहरूको रिपोर्ट पोजिटिभ देखिएको छ । जिल्लामा सक्रिय कोरोना पोजिटिभको संख्या ८८ रहेको छ ।
प्रकाशित : माघ ३, २०७८ १६:२२