घोर्थली–कालिञ्चोक ३० किमि सडक निर्माण- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

घोर्थली–कालिञ्चोक ३० किमि सडक निर्माण

कान्तिपुर संवाददाता

सिन्धुपाल्चोक — सिन्धुपाल्चोकको त्रिपुरासुन्दरी गाउँपालिका–१ को घोर्थली हुँदै दोलखाको प्रसिद्ध तीर्थस्थल कालिञ्चोक मन्दिर जोड्ने गरी ३० किलोमिटर सडक निर्माण भएको छ । प्रदेश सरकारको ४० लाख बजेटमा दुर्गम घोर्थली गाउँबाट कुरी बजार छेउसम्म सडक निर्माण भएको हो ।

पुस पहिलो साता सडकको ट्र्याक दोलखा र त्रिपुरासुन्दरीको सीमाभेगमा पुर्‍याइएको भए पनि कुरी बजारका केही स्थानीयको विरोधपछि काम रोकिएको थियो । आइतबार सडक निर्माण सकिएको हो ।

पर्यटकीय सडक जोडिएपछि त्रिपुरासुन्दरी र बाह्रबिसे नगरपालिकाका स्थानीयमा खुसी छाएको छ । घोर्थलीका ३० जना स्थानीय यही सडक हुँदै कालिञ्चोक दर्शन गर्न कुरी बजार पुगेका त्रिपुरासुन्दरी–१ का ८५ वर्षीय वडाध्यक्ष कर्णबहादुर खड्काले बताए । ‘सडकले पर्यटकीय प्रवर्द्धनमा टेवा पुग्ने विश्वास छ,’ उनले भने ।

त्रिपुरासुन्दरी–३ का अध्यक्ष र गाउँपालिकाका भौतिक पूर्वाधार अनुगमन समितिका संयोजक सुकदेव रिसालका अनुसार महिना दिनदेखि रोकिएको सडकको काम सुरु गर्न कुरीका स्थानीय प्रतिनिधि, होटल व्यवसायी, प्रहरीलगायतबीच छलफलपछि सहमति भएको थियो । उनले विवाद नहोस् भन्न दुवै जिल्लाको सीमासाँध स्पष्ट गर्न जिल्ला मालपोत र अन्य निकायमा अनुरोध गर्दै कागजी प्रक्रिया गरिएको उल्लेख गरे ।

जिल्लाकै चर्चित मन्दिर लट्टेश्वर महादेव, पिस्कर गाउँ, सहिद इलेविरे थामीको सालिकस्थल, थामी संग्रहालयजस्ता महत्त्वपूर्ण स्थानसँग कालिञ्चोक जोड्ने योजना रहेको त्रिपुरासुन्दरी गाउँपालिकाले जनाएको छ । ‘यो बाटो खाडीचौर हुँदै भन्दा धेरै कम दूरीमा छ । त्यसका साथै अनेक तीर्थस्थल र पर्यटकीय स्थान हुँदै कालिञ्चोक मन्दिर पुग्न सकिन्छ,’ उनले भने ।

प्रकाशित : माघ ३, २०७८ १२:५३
प्रतिक्रिया
पठाउनुहोस्

बैठकमै नगई ५ वर्षदेखि तलब

प्रकाश बराल

बागलुङ — गत स्थानीय निर्वाचनमा विजयी यहाँका दुई जना जनप्रतिनिधिले एक दिन पनि बैठकमा सहभागी नभई सेवा/सुविधा लिएका छन् ।

बागलुङको काठेखोला–२ मा एमालेबाट निर्वाचित वडा सदस्य चिरन थापा र कांग्रेसबाट निर्वाचित जयबहादुर थापाले बैठकमा भागै नलिईकन रकम बुझेका हुन् । उनीहरूले मासिक १३ हजार ५ सय रुपैयाँ बुझिरहेका छन् । यहाँ २०७४ वैशाख ३० मा स्थानीय तहको निर्वाचन भएको थियो ।

निर्वाचनमा विजयी भएपछि उनीहरू शपथग्रहणमा आएका थिए । शपथग्रहणमा आएपछि कर्मचारीले बैंक खाता नम्बर र फोन नम्बर टिपेर राखेका थिए । ‘बैठकमा फोनबाट बोलाउने, पत्र पनि पठाउने चलन छ तर उहाँहरू आउनुभएको छैन,’ एक कर्मचारीले भने, ‘पटकपटक खबर भइरहेकै छ, वास्ता भने गर्नु हुन्न ।’ बरु उनीहरूले बेलाबेला फोन नम्बरसमेत फेर्ने गरेकाले खोज्नसमेत समस्या भएको उनले बताए ।

सदस्य जयबहादुर थापाले पहिलो बैठकमै फरक दलका रूपमा अपमान गरेकाले बैठकमा नगएको बताए । ‘एमालेले जितेको छ, म कांग्रेसको परें, सुरुमै हेपाहा प्रवृत्ति देखाए,’ उनले भने, ‘त्यसपछि बैठकमा गएको छैन ।’ घरमै बसेर गाईभैंसी र खेतीपातीमा लागेको उनले बताए । उनले ५ वर्षदेखि नै मासिक १३ हजार ५ सय रुपैयाँ भने खाइरहेका छन् । ‘जनप्रतिनिधिको हाजिरी हुँदैन, बैठकमा आए नआएको विषयले तलब नदिने भन्ने छैन, त्यसैले पठाएका छौं,’ प्रशासकीय अधिकृत मनोज कार्कीले भने, ‘तलब गइरहेको छ, पर्दैन पनि भन्नुभएको छैन ।’ थापाले सेवा सुविधा पाएको विषयमा भने केही बोलेनन् ।

अर्का सदस्य चिरन थापाले पनि अहिलेसम्म बैठकमा भाग लिएका छैनन् । वडा अध्यक्ष विद्यापति शर्माले उनी एक–दुईपल्ट बैठकमा आएको दाबी गरे । ‘बैठकमा नआए पनि दुवै जनाले मलाई सधैं सहयोग गर्नुभएको छ, मैले ल्याएका योजनामा साथ दिनुभएको छ,’ उनले भने, ‘वडा र गाउँपालिकाको बैठकमा किन आउनु भएन, त्यो उहाँले जान्ने कुरा हो ।’ गाउँपालिका अध्यक्ष अमरबहादुर थापाले पनि दुई सदस्य सहभागी नभएको बताए । अन्य जनप्रतिनिधिले वडाको बैठकसहित कार्यपालिका र गाउँसभामा सक्रिय सहभागिता जनाउने गर्छन् ।

साथै योजना अनुगमन, मूल्यांकन तथा अन्य विकास निर्माणका काममा पनि सहयोग गरेको थापाले बताए । खटिने जनप्रतिनिधिले भने काममा लाग्दा तलब मात्र नभई आफ्नो पैसा पनि खर्च हुने बताए । ‘दैनिक काममा खटिँदा हजारौं रकम खर्चसमेत हुन्छ, नहिँड्नेलाई त बचत होला,’ कार्यपालिका सदस्य टीका संगम विकले भने ।

प्रकाशित : माघ ३, २०७८ १२:४९
पूरा पढ्नुहोस्
प्रतिक्रिया
पठाउनुहोस्
×