पनौतीको १२ वर्षे मकर मेला स्थगित- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

पनौतीको १२ वर्षे मकर मेला स्थगित

कान्तिपुर संवाददाता

काभ्रे — प्रत्येक १२ वर्षमा पनौतीस्थित त्रिवेणीघाटमा लाग्ने मकर मेला स्थगित गरिएको छ । जिल्ला कोभिड–१९ संकट व्यवस्थापन समितिले २५ जनाभन्दा कम तथा भीडभाड नहुने गरी स्वास्थ्यसम्बन्धी सुरक्षा मापदण्ड अपनाएर मकर स्नान गर्न भने छुट दिएको छ ।

माघ १ देखि लाग्ने मेलामा देश, विदेशबाट १ लाखभन्दा बढी भक्तजन दर्शनका लागि आउने अनुमान थियो । भारतबाट जोगी तथा बाबाहरू मेला भर्न आइसकेका छन् । तर कोरोना संक्रमणको जोखिम भन्दै मेलाका रूपमा सञ्चालन नगर्ने निर्णय गरिएको समितिका संयोजकसमेत रहेका प्रमुख जिल्ला अधिकारी शिवराम पोखरेलले बताए ।

सूर्य धनु राशीबाट मकर राशीमा प्रवेश गर्ने दिन (माघ १) देखि एक महिनासम्म १२ वर्षमा एक पटक मेला लाग्ने भएकाले यसलाई मकर मेला भनिएको हो । पद्मावती, लीलावती र रद्रावतीको संगम त्रिवेणीघाटमा स्नान गरे सम्पूर्ण पाप मोक्ष हुने जनविश्वास छ ।

प्रकाशित : पुस २८, २०७८ ०७:५९
प्रतिक्रिया
पठाउनुहोस्

न्यु डायमन्ड र पुलिस शीर्षस्थानमा

कान्तिपुर संवाददाता

पोखरा — पोखरा रंगशालास्थित भलिबल प्रशिक्षण केन्द्रमा मंगलबार नेपाली राष्ट्रिय टिमकी कप्तान अरुणा शाही र श्रीलंकाकी राष्ट्रिय टिमकी कप्तान कविशा लक्षणीसम्मिलित टिमका खेलाडीबीच समन्वय अभाव प्रस्ट देखियो । श्रीलंकाका ३ खेलाडीसम्मिलित आयोजक टाइगर ग्रुपको खेल फितलो हुँदा होङबाजी न्यु डायमन्ड क्लबले ३–० को सोझो सेटमा खेल आफ्नो पक्षमा पार्‍यो । 

न्यु डायमन्ड ६ अंक जोड्दै दोस्रो टाइगर कप आमन्त्रित राष्ट्रिय क्लब च्याम्पियनसिप भलिबलमा महिलातर्फ शीर्षस्थानमा उक्लिएको छ । अरुणाको कप्तानी रहेको टाइगर ग्रुपमा श्रीलंकाका कविशा, आसाराप्पुलिगे शाक्य र प्रिथिका प्रमोधिनी सहभागी थिए । खेलाडीबीच तालमेल नमिल्दा एक सेट पनि टाइगरले आफ्नो पक्षमा पार्न सकेन । छोटो तयारी र कम समयको अभ्यासको परिणाम कोर्टमा झल्किएको थियो । न्यु डायमन्डले २५–१९, २५–१३, २५–१६ ले सेट जितेको थियो । प्लेयर अफ द म्याच न्यु डायमन्डकी प्रतिभा माली भइन् ।

न्यु डायमन्डकै सलिना श्रेष्ठ उत्कृष्ट डिफेन्डर भइन् । खेलमा पूर्वराष्ट्रिय खेलाडी परीक्षा गुरुङले पनि टाइगर ग्रुपबाट खेलेकी थिइन् । सात वर्षअघि बेलायत गएकी उनले पछिल्लोपल्ट चार वर्षअघि ढोरपाटन कप खेलेकी थिइन् । पोखराकी उनी बिदामा आएका बेला आयोजक टोलीबाट खेलेकी हुन् । सुरुको खेलमा ‘टिम सेट’ नभएकाले आगामी खेल सुध्रिदै जाने अपेक्षा उनले गरिन् ।

पुरुषतर्फ पुलिस क्लब गण्डकी प्रदेशलाई ३–० कै सोझो सेटमा हराएर शीर्षस्थानमा उक्लियो । पुलिसले २५–१८, २५–१९, २५–२० ले सेट जित्यो । दोस्रो जित दर्ता गर्दै पुलिसले ५ अंक जोडेको छ । पुलिसका विशाल बिक म्यान अफ द म्याच र भीम गाहा उत्कृष्ट डिफेन्डर भए ।

त्रिभुवन आर्मीको महिला र पुरुष दुवै टिमले एपीएफका दुवै टिमलाई पराजित गरे । पुरुषतर्फ आर्मीले एपीएफलाई ३–१ को सेटमा हरायो । पहिलो सेट १८–२५ ले गुमाएको आर्मीले त्यसपछि लगातार २५–१९, २५–२०, २५–१४ ले सेट जित्यो । आर्मीका मानबहादुर श्रेष्ठ म्यान अफ द म्याच र ईश्वरबहादुर थापामगर उत्कृष्ट डिफेन्डर भए ।

महिलातर्फ आर्मीले एपीएफको चुनौतीलाई ३–१ ले नै पन्छायो । पहिलो सेट २५–१६ ले आफ्नो पक्षमा पारेको आर्मीले दोस्रो सेट २२–२५ ले गुमायो । तेस्रो सेटमा आर्मी लयमा फर्किँदै २५–१५ को पुनरागमन जित निकाल्यो । चौथो सेटमा एपीएफको चुनौतीलाई आर्मीले २५–२१ ले मत्थर बनायो । आर्मीकी सफिया पुन प्लेयर अफ द म्याच र पुष्पा चौधरी उत्कृष्ट डिफेन्डर घोषित भए ।

प्रकाशित : पुस २८, २०७८ ०७:५८
पूरा पढ्नुहोस्
प्रतिक्रिया
पठाउनुहोस्
×