स्याफ्रुबेंसी रसुवागढी सडक खण्ड अवरुद्ध
रसुवा — सुक्खा पहिराका कारण स्याफ्रुबेंसी रसुवागढी सडक खण्ड अवरुद्ध भएको छ । गोसाइँकुण्ड गाउँपालिका–३ कलाङकुलुङ आसपास क्षेत्रमा करिब ७० मिटर माथिबाट मंगलबार बिहान आएको सुक्खा पहिराले राजमार्ग अवरुद्ध भएको हो । राजमार्ग अवरुद्ध भएपछि माहवाहक कन्टेनर बाटोमा नै रोकिएका छन् ।
प्रमुख जिल्ला अधिकारी नवराज जैसीले पहिरो पन्छाउनका लागि स्थानीयस्तरमा सञ्चालित जलविद्युत् आयोजना र सडक कार्यालयको एक्स्काभेटर उपकरण प्रयोगमा ल्याउन लागिएको जानकारी दिए । यसका लागि तीनवटै सुरक्षा निकाय परिचालन गरिएको उनले बताए ।
पहिरास्थलमा निरन्तर स-साना ढुंगा झर्ने क्रम जारी रहेकाले पन्छाउन समस्या परेको बताइएको छ ।