चितवनमा भाले गैंडा मृत भेटियो
चितवन — चितवनको भरतपुरमा एउटा भाले गैंडा मृत फेला परेको छ । भरतपुर महानगरपालिका–१६ मा करिब १६ वर्षको भाले गैंडा मृत भेटिएको डिभिजन वन कार्यालय चितवनका सूचना अधिकारी बालकृष्ण खनालले जानकारी दिए ।
सिद्धिगणेश सामुदायिक वनबाट करिब ५०० मिटर पूर्वतर्फ विजयनगरको गणेश मन्दिर जानेबाटो छेउको जैघाँस भएको खेतमा गैंडा मृत फेला परेको हो । घटनापछि प्राविधिकको टोलीबाट शव परीक्षण भएको छ ।
उनले भने, 'मारिएको हो या कालगतीले मरेको भनेर रिपोर्टपछि मात्रै थाहा हुन्छ ।' डिभिजन वन, चितवन राष्ट्रिय निकुञ्ज र राष्ट्रिय प्रकृति संरक्षण कोष (एनटिएनसी)का प्राविधिक टोलीले मृत गैडाको व्यवस्थापन गरेको छ ।
गैंडाको खाग र खुरसहित सबै अङ्ग सुरक्षित छ । मृत गैंडाको शरीरमा कुनै चोट पनि देखिएको छैन । गैंडाको सिङ र खुर डिभिजन वनको झनझने पोष्टमा सुरक्षित राखिएको छ ।
प्रकाशित : मंसिर २७, २०७८ २०:२७