भ्युटावरसहित १३ तले भवन बनाउँदै हेटौंडा उपमहानगरपालिका

उपमहानगर प्रमुख हरिबहादुर महतको रोहबरमा सोमबार प्रमुख प्रशासकीय अधिकृत शिवराज चौलागाईं र निर्माण कम्पनी लामा–रसुवा–बानियाँ जेभीका तर्फबाट ऋषिराज बानियाँबीच भवन निर्माणसम्बन्धी सम्झौता भएको हो ।

७७ करोड ९३ लाख ७२ हजार रुपैयाँ लागत अनुमानमा बोलपत्र आह्वान गरिएकामा ४७ करोड ९३ लाख ७२ हजार रुपैयाँमा लामा–रसुवा–बानियाँ जेभीले ३ वर्षभित्रै निर्माण सक्ने गरी ठेक्का सकारेको थियो ।

हेटौंडा–४ हुप्राको चौरमा निर्माण गरिने भवनको दुई तलामा अन्डरग्राउन्ड पार्किङ रहनेछ । चारतिरबाट लिफ्ट, दुईवटा भर्‍याङ र भ्युटावर पनि निर्माण गरिने प्रमुख प्रशासकीय अधिकृत चौलागाईंले बताए । एक बिघा ६ कट्ठामा निर्माण हुने भवनमा सिनेमा हल, सभाहलसमेत रहनेछ ।