सिन्धुली — एक सय २९ वर्ष जेल सजाय तोकिएका फरार अभियुक्तलाई प्रहरीले पक्राउ गरी मंगलबार सिन्धुली अदालतमा पेस गरेको छ । चोरी तथा डकैती मुद्दामा तनहुँ जिल्ला अदालतबाट एक सय २९ वर्ष ७ महिना १५ दिन कैद तोकिएका सिन्धुली तीनपाटन–१ बेलघारीका ३० वर्षीय मगर कान्छा भनिने भेषबहादुर थापा समातिएका हुन् ।
उनलाई १४ लाख ८३ हजार ३ सय ४७ रुपैंयाँ जरिवानाको समेत फैसला भएको थियो । डीएसपी मनोजकुमार लामाका अनुसार ६ जबर्जस्ती चोरी मुद्दा र १२ डाँका चोरी मुद्दामा थापा २०७१ वैशाख १७ र २०७२ जेठ ४ मा दोषी ठहर भएका थिए ।