सिन्धुलीमाडीमा आगलागी- वाग्मती - कान्तिपुर समाचार
कान्तिपुर वेबसाईट
AdvertisementAdvertisement

सिन्धुलीमाडीमा आगलागी

राजकुमार कार्की

सिन्धुली — सिन्धुलीको कमलामाई नगरपालिका–६ रातमाटामा भिषण आगलागी भएको छ । त्यहाँस्थित शाह आइरन एन्ड इलेक्ट्रिक सेन्टरमा मंगलबार १० बजेदेखि आगलागी हुँदा करोडौंको धनमाल जलेर नष्ट भएको छ ।

प्रारम्भिक जानकारी अनुसार विद्युत् सट भएर हर्डवेयरको गोदामबाट आगलागी सुरु भएको थियो । जस्ताको छाना लगाएर २० वटा गोदामको कोठामा रहेको सबै सामान आगलागीमा परेको छ ।

कमलामाई नगरपालिकाको दमकलले आगो निभाउने प्रयास गरिरहेको भएपनि अहिलेसम्म आगो निभेको छैन । प्रहरीका अनुसार हार्डवेयरको गोदामा आगोले चाँडो टिप्ने सामान भएकाले आगलागी पूरै नियन्त्रणमा लिन नसकिएको हो । आगलागी नियन्त्रणमा आइनसकेकाले के कति क्षति भयो भन्ने आकलन हुन नसकेको प्रहरीले बताएको छ । संचालक सिकन्दर शाहका अनुसार आगलागीबाट ५ करोडभन्दा बढीको सामान जलेर नष्ट भएको छ ।

हार्डवेयर, विद्युत्, प्लाई, लगायतका सामान गोदाममा भण्डारण गरिएको थियो । स्थानीय, सशस्त्र र जनपथ प्रहरीले आगोले नभेटेको सामान सुरक्षितस्थानतर्फ फालिरहेका छन् । आगलागी भएपछि मानिसको भीड भएकाले बीपी राजमार्गसमेत अवरुद्ध भएको छ ।

आगलागी नियन्त्रणमा लिने प्रयास भइरहेको सिन्धुली प्रहरीका डिएसपी मनोजकुमार लामाले जानकारी दिए । शाह आइरनसँगै रहेको कनिस्का इन्टरप्राइजेजमा पनि आगलागिले क्षति पुर्‍याएको जनाइएको छ ।

प्रकाशित : मंसिर १४, २०७८ १२:११
प्रतिक्रिया
पठाउनुहोस्

एमाले महाधिवेशन : मतदानमा सहभागी भएनन् ३९ प्रतिनिधि

कान्तिपुर संवाददाता

काठमाडौँ — नेकपा (एमाले)को दसौं महाधिवेशनअन्तर्गत पदाधिकारी र केन्द्रीय सदस्यका लागि भएको निर्वाचनको मतदान सम्पन्न भएको छ । नेतृत्व चयनका लागि भएको मतदानमा ३९ जना प्रतिनिधि अनुपस्थित भएका छन् ।

एमाले केन्द्रीय निर्वाचन आयोगका सदस्य बाबुराम दाहालका अनुसार २१५३ मतदातामध्ये २११४ जनाले मतदान गरेका हुन् ।

मंगलबार बिहान ४ बजे केपी शर्मा ओलीले विद्युतीय मतदान गरेपछि सुरु भएको मतदान प्रक्रिया केही बेरअघि सम्पन्न भएको हो । बिहान २ बजेदेखि चुनाव हुने बताइए पनि ४ बजेलाई सरेको थियो । एमाले दसौँ महाधिवेशन केन्द्रीय निर्वाचन आयोगका अनुसार करिब ३ घण्टामा पूर्ण नतिजा आइसक्ने छ ।

पदाधिकारीमा अध्यक्ष, उपाध्यक्ष र सचिवमा मतदान भएको हो । त्यस्तै, विभिन्न क्लस्टरका केन्द्रीय सदस्यमा पनि मतदान भइरहेको छ । अध्यक्षमा केपी शर्मा ओली र भीम रावलले उम्मेदवारी दर्ता गराएका थिए ।

त्यस्तै, ६ जना उपाध्यक्षमा ७ जनाको उम्मेदवारी परेको थियो भने ७ सचिवका लागि ९ नेताले उम्मेदवारी दर्ता गराएका थिए । एमालेका वरिष्ठ उपाध्यक्ष, महासचिव, उपमहासचिव सर्वसम्मत निर्वाचित भएका छन् । अधिकांश क्लस्टरबाट केन्द्रीय सदस्य निर्विरोध निर्वाचित हुँदा केहीमा मात्रै चुनाव हुने भएको छ ।

खुला सदस्य ८४ जनाका लागि १०५ जनाले उम्मेदवारी दर्ता गराएका थिए । त्यस्तै, प्रदेश १ खुला र महिला क्लस्टरमा निर्वाचन भएको हो । सुदूरपश्चिमको महिला क्लस्टरमा पनि निर्वाचन भएको छ । दलित खुला सदस्य, थारु खुला सदस्य, पिछडिएको क्षेत्र खुला सदस्यका लागि पनि निर्वाचन भएको छ ।

प्रकाशित : मंसिर १४, २०७८ ११:४७
पूरा पढ्नुहोस्
प्रतिक्रिया
पठाउनुहोस्
×